Gaa Nzukọ “Karịakwa Otú A”
1 Izukọta ọnụ adịwo oké mkpa mgbe nile nye ndị Jehova. Ndị Israel nwere ụlọ nsọ na ụlọ nzukọ ha dị ka ebe ndị e nwere maka ezi ofufe, mmụta Chineke, na mkpakọrịta na-enye ọṅụ. N’otu aka ahụ, ndị Kraịst mbụ ahapụghị ịdị na-ezukọta ọnụ. Ka nrụgide na ule na-arị elu n’oge ikpeazụ a dị oké egwu, mwusi ike n’ime mmụọ nke nzukọ ọgbakọ anyị na-ewusi dịkwa anyị mkpa—ọ dịkwa anyị mkpa “karịakwa otú a.” (Hib. 10:25) Rịba ihe atọ mere anyị ji aga nzukọ ama.
2 Maka Mkpakọrịta: Akwụkwọ Nsọ na-adọ anyị aka ná ntị ‘ịkasirịta ibe anyị obi na iwulirịta ibe anyị elu.’ (1 Tesa. 5:11) Mkpakọrịta nke ndị Chineke na-eji echiche ọma emejupụta uche anyị ma na-akwali anyị ịrụ ọrụ ọma. Ma ọ bụrụ na anyị akpapụ iche, ọ na-adịkarịrị anyị mfe ịnabata echiche nzuzu, nke ịchọ ọdịmma onwe onye nanị, ma ọ bụ ọbụna nke rụrụ arụ.—Ilu 18:1.
3 Maka Ntụziaka: Nzukọ ndị Kraịst na-enye usoro ntụziaka Bible na-adịgide adịgide a haziri iji debe ịhụnanya Chineke n’obi anyị. Ha na-enye ntụzi dị irè n’itinye “izu nile nke Chineke” n’ọrụ. (Ọrụ 20:27) Nzukọ na-azụ anyị na nkà nke ikwusa na ịkụzi ozi ọma ahụ, nkà ndị dị mkpa karịa ugbu a iji nwee ọṅụ na-enweghị atụ nke ịchọta na inyere ndị ga-anakwere eziokwu Bible aka.
4 Maka Nchebe: N’ajọ ụwa a, ọgbakọ bụ ebe mgbaba ime mmụọ n’ezie—ebe udo na ịhụnanya na-achị. Mgbe anyị nọ ná nzukọ ọgbakọ, mmụọ nsọ Chineke na-enwe mmetụta dị ike n’ahụ anyị, na-amịpụta mkpụrụ “ịhụnanya, ọṅụ, udo, ogologo ntachi obi, obiọma, ịdị mma, ikwesị ntụkwasị obi, ịdị nwayọọ, imeru ihe n’ókè.” (Gal. 5:22, 23) Nzukọ na-ewusi anyị ike iguzosi ike na ịkwụrụ chịm n’okwukwe. Ha na-akwadebe anyị ịdị njikere maka ule ndị dị n’ihu.
5 Site n’ịgachi nzukọ anya, anyị na-enwe ahụmahụ nke ihe ọbụ abụ ahụ kọwara, dị ka e dekọrọ n’Abụ Ọma 133:1, 3: “Lee, ka o si dị mma, ka o si dịkwa ụtọ nke ukwuu, bụ́ mbikọ nke ụmụnne, ọbụna ibikọ n’otu!” Ebe ọ bụla ndị Chineke na-eje ozi, na-ezukọkwa taa, “n’ebe ahụ ka Jehova nyere ngọzi ahụ iwu, bụ́ ndụ ruo mgbe ebighị ebi.”—Ọ bụ anyị dere okwu ụfọdụ n’ụdị dị iche.