‘Ndị Inyom Ndị Na-adọgbu Onwe Ha n’Ọrụ n’Ime Onyenwe Anyị’
1 Pọl ji okwu ndị ahụ dị n’elu kọwaa Traifina na Traifosa, bụ́ ụmụnna nwanyị abụọ na-arụsi ọrụ ike n’ọgbakọ dị na Rom. O kwuru banyere onye ọzọ, bụ́ Pasis, sị: “Ọ dọgburu onwe ya n’ọrụ n’ọtụtụ ihe n’ime Onyenwe anyị.” N’otu aka ahụ, o kwukwara okwu ọma banyere Fibi dị ka “onye na-eguzoro ọtụtụ mmadụ ịzọ ha.” (Rom 16:2, 12) N’ime Akwụkwọ Nsọ, a kpọrọ Dọkas aha dị ka onye “jupụtara n’ezi ọrụ na ọrụ ebere nke ọ na-eme.” (Ọrụ 9:36) Lee ngọzi ndị inyom dị otú ahụ ji ihe ime mmụọ kpọrọ ihe bụ nye ọgbakọ dị iche iche!
2 Ànyị na-eji ụmụnna nwanyị ndị na-arụsi ọrụ ike n’ọgbakọ anyị akpọrọ ihe? Ha na-arụ ihe ka ukwuu n’ọrụ nkwusa ahụ, na-eduzi ihe ka n’ọnụ ọgụgụ ọmụmụ Bible, ma na-enyere ọtụtụ n’ime ndị ọhụrụ aka. Ha na-etinyekwa oge dị ukwuu n’inyere ụmụntakịrị aka inwe ọganihu ime mmụọ. Ndị inyom bụ́ ndị Kraịst na-eme òkè ha n’iwulite mmụọ ịhụnanya, ọṅụ, udo, na ịnụ ọkụ n’obi n’ime ọgbakọ. Ha na-enye nkwado n’ọtụtụ ụzọ iji hụ na ndị di ha na ndị òtù ezinụlọ ha ndị ọzọ pụrụ imekwu ihe n’ozi Jehova.
3 Ụmụnna Nwanyị Ndị Nọ n’Ozi Oge Nile: Ụmụnna nwanyị ndị na-eje ozi ala ọzọ so ná ndị na-arụsi ọrụ ike n’ime Onyenwe anyị, ọtụtụ n’ime ha ekerewo òkè n’ịmalite ọrụ ahụ ná mba ndị ọzọ. N’ọgbakọ ndị di ha na-eleta, nwunye ndị nlekọta na-ejegharị ejegharị na-arụsi ọrụ ike n’ozi ubi, na-agba ọtụtụ ụmụnna nwanyị ume. A gaghị elefuru ụmụnna nwanyị na-eje ozi na Betel anya, bụ́ ndị ji ịnụ ọkụ n’obi na-eje ozi dị nsọ iji kwadoo nzukọ Jehova. Ụmụnna anyị nwanyị bụ́ ndị ọsụ ụzọ oge nile, site ná mgbalị ha ji ikwesị ntụkwasị obi na-etinye n’ito Chineke, na-enyere ọtụtụ puku mmadụ aka ịmụta eziokwu ahụ.
4 Ndị inyom ndị a na-ekwesị ntụkwasị obi na-enweta afọ ojuju dị ukwuu n’ụzọ ndụ ha nke ịchụ onwe onye n’àjà. (1 Tim. 6:6, 8) Ha kwesịrị ịja mma na inweta agbamume na nkwado ọ bụla anyị pụrụ inye ha.
5 Ndị inyom nile bụ́ ndị Kraịst baara nzukọ Jehova uru, ha na-eje ozi ikwesị ntụkwasị obi nke bụ́ ngọzi nye onye ọ bụla. Ka anyị nọgide na-eji ndị inyom dị otú ahụ akpọrọ ihe ma na-ekpe ekpere ka Jehova na-agọzi ha ka ha na-anọgide “na-adọgbu onwe ha n’ọrụ n’ime Onyenwe anyị.”