Ị̀ Na-atachi Obi?
1 “Enweghị m ọṅụ nke ka ihe ndị a ukwuu, . . . [na] ụmụ nke aka m na-ejegharị n’eziokwu ahụ.” (3 Jọn 4) Ntachi obi nke ụmụ ime mmụọ Jọn wetaara ya ọṅụ dị ukwuu. Lee otú ịhụ ka ọtụtụ nde ndị ga-aghọ ụmụ ya nọ “na-ejegharị n’eziokwu ahụ” na-aghaghị isi na-atọ Nna anyị nke eluigwe ụtọ!—Ilu 23:15, 16; 27:11.
2 Ọ bụ ezie na ndị Chineke n’ozuzu ha ji ịnụ ọkụ n’obi anọgide n’ọrụ ndị Kraịst, ụfọdụ ejiriwo nwayọọ nwayọọ kwụsịlata. Ọ bụ ezie na ndị a pụrụ ịdịworị na-arụsi ọrụ ike mgbe mbụ ha mụtara eziokwu ahụ, ka ọtụtụ afọ na-agafe, ha na-ekerezi nanị ntakịrị òkè ma ọ bụ nke na-echighị anya n’ọrụ ime ndị na-eso ụzọ.
3 N’ụzọ kwere nghọta, ụfọdụ pụrụ ịkwụsịlatawo n’ihi ihe mgbochi anụ ahụ na mmetụta nke ime agadi. Otú ọ dị, a ga-aja ha mma maka ntachi obi ha. Ha na-eme ihe ha nwere ike ime. Ma onye ọ bụla n’ime anyị rarawooro ndụ ya nye Chineke kwesịrị ịjụ onwe ya, sị: ‘Èkwewo m ka uche m dịkwasị ná nchụso ihe onwe onye n’ụzọ dị ukwuu nke na ọdịmma Alaeze nwere nanị ọnọdụ dị nta ná ndụ m? Àghọwo m onye dịtụ “ṅara ṅara,” ka m ka “na-etinye mgbalị siri ike”?’ (Mkpu. 3:15, 16; Luk 13:24, NW) Ka anyị nile jiri ekpere chebara ihe anyị na-eme echiche ma meziwanye ihe dị ka o si dị mkpa, na-eburu n’uche na Jehova kwere nkwa na “otuto na nsọpụrụ na udo ga-adịrị onye ọ bụla nke na-arụ ezi ọrụ.”—Rom 2:10.
4 Ụzọ Isi Tachie Obi: Gịnị nyeere Jisọs aka ịtachi obi? Pọl kọwara, sị: “N’ihi ọṅụ e debere n’ihu Ya na-atachi obi [n’osisi ịta ahụhụ, NW] ya, na-elelị ihere anya, O wee nọdụ n’aka nri nke ocheeze Chineke.” (Hib.12:1-3) Ọṅụ e debere n’ihu Jisọs karịrị nnọọ ọnwụnwa ndị ọ na-aghaghị iche ihu nwa oge. Iburu ọṅụ e debere anyị n’ihu n’uche pụkwara inyere anyị aka ịtachi obi. (Mkpu. 21:4, 7; 22:12) Ọ bụrụ na anyị elegara Jehova anya maka inye anyị ume site n’ọmụmụ ihe onwe onye, ịgachi nzukọ anya, na ịnọgidesi ike n’ekpere, anyị ga-enwe ike ịnọgidesi ike n’ọrụ o nyere anyị ịrụ.
5 Jehova na-aṅụrị ọṅụ ná ntachi obi nke ndị ya na-eguzosi ike n’ihe. Ya mere ka anyị mee ka ọṅụ ya bukwuo ibu site n’ịnọgide “na-ejegharị n’eziokwu ahụ.”