“Meenụ Ka Ìhè Unu Na-enwu”

¹ Ụwa nke gbara anyị gburugburu nọ n’ọchịchịrị n’ụzọ omume na n’ụzọ ime mmụọ. Ìhè nke eziokwu na-ekpughe “ọrụ nke ọchịchịrị nke na-amịghị mkpụrụ,” ka e wee nwee ike izere ihe mkpọbi ụkwụ ndị a na-akpata ọnwụ. Ya mere, Pọl onyeozi gbara ndị Kraịst ume, sị: “Na-ejegharịnụ dị ka ụmụ nke ìhè.”—Efe. 5:8, 11.

² “Mkpụrụ nke ìhè ahụ” dị nnọọ iche n’ọchịchịrị nke ụwa. (Efe. 5:9) Ịmịpụta mkpụrụ a na-achọ ka anyị na-abụ ihe nlereanya pụtara ìhè n’ibi ndụ ndị Kraịst, ụdị ndị Jisọs na-anwapụta. Anyị aghaghịkwa igosipụta àgwà ndị dị ka iji obi dum eme ihe, obi eziokwu, na ịnụ ọkụ n’obi maka eziokwu ahụ. Ọ dị mkpa ka a na-egosipụta mkpụrụ a ná ndụ anyị na-adị kwa ụbọchị nakwa n’ozi anyị.

³ Na-enwu n’Ohere Ọ Bụla: Jisọs gwara ndị na-eso ụzọ ya, sị: “Meenụ ka ìhè unu na-enwu n’ihu mmadụ.” (Mat. 5:16) N’iṅomi Jisọs, anyị na-egosipụta ìhè Jehova site n’ikwusa banyere Alaeze Chineke na nzube ya. Anyị na-enwu dị ka ndị na-enye ìhè mgbe anyị na-aga n’ebe obibi ndị mmadụ na mgbe anyị na-ekwusa eziokwu ahụ n’ụlọ ọrụ anyị, n’ụlọ akwụkwọ, n’etiti ndị agbata obi anyị, ma ọ bụ n’ebe ọ bụla ọzọ anyị nwere ohere ya.—Fil. 2:15.

⁴ Jisọs kwuru na ụfọdụ ndị ga-akpọ ìhè ahụ asị. (Jọn 3:20) N’ihi ya anyị adịghị enwe nkụda mmụọ mgbe ihe ka n’ọnụ ọgụgụ jụrụ ikwe ka “inye ìhè nke oziọma nke ebube Kraịst” wakwasị ha. (2 Kọr. 4:4) Jehova na-enyocha obi ihe a kpọrọ mmadụ, ọ dịghịkwa achọ ka ndị na-eme ajọ omume nọrọ n’etiti ndị ya.

⁵ Mgbe anyị na-agbaso ụzọ Jehova ma na-enwe ìhè ime mmụọ, anyị pụrụ igbukepụrụ ya ndị ọzọ. Ọ bụrụ na ha esite n’omume anyị ghọta na anyị ‘nwere ìhè nke ndụ,’ mgbe ahụ a pụrụ ịkpali ha onwe ha kwa ime mgbanwe ndị dị mkpa iji ghọọ ndị na-enye ìhè.—Jọn 8:12.

⁶ Site n’ime ka ìhè anyị na-enwu, anyị na-ewetara Onye Okike anyị otuto ma na-enyere ndị nwere obi eziokwu aka ịbịa mara ya na inweta olileanya nke ndụ ebighị ebi. (1 Pita 2:12) Ebe anyị nwere ìhè ahụ, ka anyị jiri ya nyere ndị ọzọ aka ịhụ ụzọ isi pụta n’ọchịchịrị ime mmụọ ma rụọ ọrụ ndị kwekọrọ n’ìhè ahụ.