Isoro Jehova Na-akpachi Anya
1. Gịnị ka otu nwanna nwanyị bịara ghọta banyere usoro ihe omume ya n’ụzọ ime mmụọ?
1 “Anọwo m n’eziokwu ruo afọ 20 ma ọ bụ ihe yiri ya, ma nanị ihe m na-eme agwụla ịga nzukọ na ịga ozi ubi,” ka otu nwanna nwanyị bụ́ Onye Kraịst kwetara. Otú ọ dị, ọ gara n’ihu ikwu, sị: “Amatawo m ugbu a na ọ bụ ezie na ihe ndị a dị mkpa, nanị ha apụghị ịkwagide m mgbe ihe malitere siwe ike. . . . Aghọtara m ugbu a na aghaghị m idozigharị echiche m ma malite usoro ọmụmụ ihe bara uru ka m wee nwee ike ịmara Jehova n’ezie, hụkwa ya n’anya ma nwee ekele maka ihe Ọkpara ya nyeworo anyị.”
2. N’ihi gịnị ka o ji dị mkpa isoro Jehova na-akpachi anya?
2 Mmadụ isoro Jehova na-enwe mmekọrịta chiri anya na-achọ mgbalị. Ọ na-achọ ihe karịrị nanị ịgbaso usoro ihe omume nke Ndị Kraịst. Ọ bụrụ na anyị aghara iso Jehova na-enwe nkwurịta okwu n’ụzọ chiri anya, ka oge na-aga, Ọ pụrụ ịdị anyị ka onye bụbu ezigbo enyi anyị nke anyị na-adịghịzi anụ ozi ya. (Mkpu. 2:4) Ka anyị tụlee otú ọmụmụ Bible onwe onye na ekpere pụrụ isi nyere anyị aka isoro Jehova na-akpachi anya.—Ọma 25:14.
3. Olee ụzọ anyị ga-esi na-enwe ọmụmụ ihe onwe onye iji nwee ike ịbịaru Chineke nso?
3 Ekpere na Ntụgharị Uche Dị Mkpa: Ọmụmụ ihe onwe onye nke na-aba n’obi na-agụnye ihe karịrị ịka ihe n’okpuru isi ihe ndị dị n’akwụkwọ anyị na-amụ na ịgụ akụkụ Akwụkwọ Nsọ ndị e zoro aka na ha. Ọ na-achọ anyị ịtụgharị uche n’ihe ihe ọmụma ahụ na-ekpughe banyere ụzọ Jehova, ụkpụrụ ya, na àgwà ya. (Ọpụ. 33:13) Ịghọta ihe ime mmụọ na-emetụ anyị n’obi ma na-akpali anyị ichebara ndụ anyị echiche. (Ọma 119:35, 111) E kwesịrị ịdị na-enwe ọmụmụ ihe onwe onye n’ebumnobi nke ịbịaru Jehova nso. (Jems 4:8) Ịmụ ihe nke ọma na-achọ oge nakwa ebe kwesịrị ekwesị, imụchi ihe anya na-achọkwa ọzụzụ. (Dan. 6:10) Ọ bụrụgodị na ị na-eji ọrụ n’aka mgbe dum, ị̀ na-ewepụta oge kwa ụbọchị iji tụgharịa uche n’àgwà ndị dị ebube nke Jehova?—Ọma 119:147, 148; 143:5.
4. Olee otú ekpere anyị kpere mgbe anyị na-amalite ọmụmụ ihe onwe onye si enyere anyị aka iso Jehova na-akpachi anya?
4 Ekpere si n’ala ala obi bụ akụkụ dị mkpa nke ọmụmụ ihe onwe onye nke nwere nzube. Ka eziokwu Bible wee ruo anyị n’obi ma kpalie anyị ‘ijere Chineke ozi dị nsọ site n’egwu Chineke na ụjọ,’ mmụọ nsọ Chineke dị anyị mkpa. (Hib. 12:28) Ya mere, anyị kwesịrị ịmalite ọmụmụ ihe nke ọ bụla site n’ịrịọ Jehova maka mmụọ ya. (Mat. 5:3) Ka anyị na-atụgharị uche n’Akwụkwọ Nsọ ma na-eji ihe ndị na-enye aka ịmụ Bible bụ́ ndị nzukọ Jehova na-ewepụta eme ihe, anyị na-emeghere Jehova obi anyị. (Ọma 62:8) Isi otú a na-amụ ihe bụ ụdị ofufe nke anyị si na ya egosipụta nrara anyị raara onwe anyị nye Jehova ma na-eme ka nkekọ anyị na ya sikwuo ike.—Jud 20, 21.
5. N’ihi gịnị ka o ji dị mkpa ka anyị na-atụgharị uche n’Okwu Chineke kwa ụbọchị?
5 Dị ka ọ dị ná mmekọrịta nile, anyị aghaghị ịdị na-eme ka mmekọrịta anyị na Jehova na-aka mma mgbe nile iji mee ka anyị na ya nọgide na-akpachi anya ná ndụ anyị nile. Ya mere, ka anyị na-azụpụta oge kwa ụbọchị iji na-abịaru Chineke nso, na-amara na ya onwe ya ga-abịarukwa anyị nso.—Ọma 1:2, 3; Efe. 5:15, 16.