Na-egosi Mmasị n’Ebe Ndị Ọzọ Nọ—Site n’Ịja Ha Mma
1 Ọ bụrụ na anyị ejiri obi anyị nile na-aja ndị mmadụ mma, ọ na-agba ha ume, na-akpali ha ime ihe, na-enyekwa ha obi ụtọ. Ọtụtụ ndị nkwusa achọpụtala na nanị okwu ịja mma ole na ole ha ji obi ha nile jaa ndị mmadụ na-akpalikarị ha ige ntị n’ozi ọma ahụ. Olee otú anyị pụrụ isi jaa ndị mmadụ mma mgbe anyị na-ezi ha ozi ọma?
2 Na-eleru Anya Ala: Jizọs Kraịst e mere ka ọ dị ebube hụrụ ọrụ ọma ọgbakọ ndị ahụ dị n’Eshia Maịnọ rụrụ. (Mkpu. 2:2, 3, 13, 19; 3:8) N’otu aka ahụ, ezi mmasị anyị nwere n’ebe ndị anyị na-aga izi ozi ọma nọ ga-eme ka anyị hụ ihe anyị ga-aja ha mma maka ya. Dị ka ihe atụ, otú ebe obibi ha si dị ọcha, otú nne ma ọ bụ nna si egosi ụmụ ya ịhụnanya, ma ọ bụ otú onye nwe ụlọ si mụmụọ ọnụ ọchị ma kelee anyị, socha n’ihe ndị kwesịrị ịkpali anyị ịja ha mma. Ị̀ na-adị ngwa ịhụ ihe ndị a ma jaa ha mma maka ha?
3 Na-ege Ntị nke Ọma: Mgbe ị na-ezi ndị ọzọ ozi ọma, mee ka ha kwuo uche ha site n’ịjụ ha ajụjụ ndị kwesịrị ekwesị. Kwanyere ha ùgwù site n’ige ha ntị nke ọma mgbe ha na-ekwu okwu. (Rom 12:10) O yiri nnọọ ka, site n’ihe ha ga-ekwu, ị̀ ga-ahụ ihe ị ga-eji jaa ha mma nke ọma, mgbe ahụ, gị emezie ka okwu gị hiwe isi n’ihe ị chọpụtara na gị na ha kwekọrịta na ya.
4 Jiri Nghọta Mee Ihe: Olee ihe anyị kwesịrị ime ma onye nwe ụlọ kwuo ihe na-ekwekọghị n’eziokwu Bible? Kama ịrụwa ụka n’ihe ọ na-ekwuteghị, kelee ya maka ikwu echiche ya, ma gaa n’ihu site n’ikwu ihe dị ka, “Ahụrụ m na i chebarala okwu a echiche nke ọma.” (Kọl. 4:6) Ọ bụrụgodị na mmadụ bụ onye e ji ịrụ ụka mara, anyị pụrụ ịja ya mma mgbe mgbe maka ezigbo mmasị o nwere n’okwu ahụ. Iji olu ọma otú ahụ na-aza ndị mmadụ okwu nwere ike ime ka onye o yiri ka ọ̀ natụghị achọ ịnụ ozi ọma nụwazie ozi ọma.—Ilu 25:15.
5 Ka mma anyị na-aja wee baa uru, anyị aghaghị iji obi anyị dum na-aja ya. Ikwu ụdị okwu ndị ahụ na-ewuli mmadụ elu na-enye Jehova nsọpụrụ, o nwekwara ike ime ka ndị mmadụ gee ntị n’ozi Alaeze ahụ.