Igbe Ajụjụ

◼ Ọ̀ ga-abụ ihe kwesịrị ekwesị ime ndokwa maka agbam ọnyà ego iji nyere ọgbakọ aka?

Òtù okpukpe dị iche iche na-emekarị ihe omume ndị ha si na ya enweta ego, dị ka bazaa, agbam ọnyà ego, ma ọ bụ ihe omume ndị ọzọ. Ọ bụ eziokwu na ụfọdụ pụrụ iche na ihe ndị a dị mma, ma nke bụ́ eziokwu bụ na ha bụcha ụzọ e si arịọ ego. Ndịàmà Jehova esighị otú ahụ enweta ego.

N’Ụlọ Nche August 1879, Nwanna Russell kwuru ihe na-esonụ banyere ọjụjụ ọ jụrụ iṅomi ndị chọọchị ma rịọwa ego: “Anyị kweere na onye na-akwado mbipụta nke magazin bụ́ ‘Zion’s Watch Tower’ bụ JEHOVA. Ebe ọ dị otú ahụ, ọ dịghị mgbe a ga-arịọ ego ma ọ bụ rịọ ndị mmadụ arịrịọ maka enyemaka iji na-ebipụta ya. Mgbe Onye ahụ nke kwuru, sị: ‘Ọlaọcha na ọlaedo nile dị n’elu ugwu bụ nke m,’ kwụsịrị iweta ego a ga-eji na-ebipụta ya, anyị ga-aghọta na oge eruola ka a kwụsị ibipụta ya.”

Anyị ga-anọgide na-agbaso ụkpụrụ Akwụkwọ Nsọ bụ́: “Ka onye ọ bụla na-eme dị nnọọ ka o kpebiworo n’obi ya, ọ bụghị n’enweghị ọchịchọ ime ihe ma ọ bụ ná mmanye, n’ihi na Chineke hụrụ onye na-eji mgbasapụ ihu na-enye ihe n’anya.” (2 Kọr. 9:7) A na-adọba igbe onyinye n’Ụlọ Nzukọ Alaeze ka ndị mmadụ wee nwee ike inye onyinye ma ha chọọ. (2 Eze 12:9) A naghị arịọ mmadụ arịọ ka o nye onyinye; onye na-enye onyinye anaghịkwa enye ya iji nweta ihe ọ bụla.