Ndị E Nyere Akụ̀ Ka Ha Lekọta
1 Pọl onyeozi ji ọrụ ikwusa ozi ọma Chineke nyere ya kpọrọ ihe nke ukwuu ma kpọọ ya “akụ̀.” (2 Kọr. 4:7) Ọ tachiri obi n’ihe isi ike na mkpagbu ndị o nwetara mgbe ọ na-ekwusa ozi ọma ahụ. O ji ike ya nile kwusaara onye ọ bụla ọ hụrụ ozi ọma. O ji ma ụkwụ ma ụgbọ mmiri gaa ebe ndị na-adịghị mfe ọgịga na ebe ndị dị ize ndụ. Olee otú anyị pụrụ isi gbasoo ihe nlereanya Pọl ma gosi na anyị ji ozi anyị kpọrọ ihe? (Rom 11:13) Olee ihe mere ozi anyị ji bụrụ akụ̀ na-enweghị atụ?
2 Akụ̀ nke Ka Ibe Ya: Ihe ndị ụwa weere dị ka akụ̀ na-akpatakarị obi mgbawa, ma ọ́ bụghị na uru ndị dị na ha na-adị obere, ya abụrụ na ha anaghị adịte aka. N’aka nke ọzọ, ozi anyị na-abara ma anyị ma ndị ọzọ uru, uru ya na-adịtekwa aka. (1 Tim. 4:16) Ọ na-enyere ndị nwere obi eziokwu aka ịbịa mara Jehova, mee mgbanwe ndị dị mkpa ná ndụ ha, ma nweta olileanya nke ndụ ebighị ebi. (Rom 10:13-15) Ọ bụrụ na anyị ejiri ozi anyị kpọrọ nnọọ ihe, ọ ga-eme ka ndụ anyị nwee nzube, mee ka anyị nwee obi ụtọ na anyị na-arụpụta ihe dị mma, meekwa ka anyị nwee olileanya magburu onwe ya maka ọdịnihu.—1 Kọr. 15:58.
3 Gosi na Ị Na-eji Akụ̀ Gị Akpọrọ Ihe: Ihe na-egosikarị na anyị ji ihe kpọrọ ihe bụ ihe anyị dị njikere imefu maka ya. Ọ bụ nnọọ nnukwu ihe ùgwù iji oge anyị na ume anyị na-eto Jehova? (Efe. 5:16, 17) Otú anyị si eji oge anyị eme ihe kwesịrị igosi na anyị ji ihe ime mmụọ kpọrọ ihe karịa ihe onwunwe? Ebe ọ bụ na anyị nwere ozi dị oké ọnụ ahịa anyị na-ezi ndị mmadụ, anyị kwesịrị iji ịnụ ọkụ n’obi ezi ya ma na-adịkwa njikere mgbe nile iji ohere ọ bụla dapụtaranụ ezi ya.
4 Akụ̀ dị oké ọnụ ahịa abụghị ihe a na-ezokarị ezo, kama a na-edebe ya ebe ndị mmadụ nwere ike ịhụ ya. Ọ bụrụ na anyị weere ozi anyị dị ka akụ̀ dị oké ọnụ ahịa, anyị ga-ewere ya dị ka ihe kasị mkpa ná ndụ anyị. (Mat. 5:14-16) Ka anyị jiri obi ekele na-agbaso ihe nlereanya Pọl onyeozi mgbe nile ma jiri ohere ọ bụla dapụtaranụ na-egosi na anyị na-eji ozi anyị akpọrọ ihe n’eziokwu, ma na-ewere ya dị ka akụ̀.