Kasie Ndị Na-eru Uju Obi
1. Olee ihe mere nkasi obi ji dị ndị na-eru uju mkpa?
1 Ọ bụ ihe na-agbawa obi ma onye mmadụ hụrụ n’anya nwụnahụ ya, karịsịa ma ọ bụrụ na onye ahụ enweghị olileanya Alaeze ahụ. (1 Tesa. 4:13) Ọtụtụ ndị na-echekarị, sị: ‘Olee ihe mere mmadụ ji anwụ anwụ? Olee ebe ha na-aga ma ha nwụọ? M̀ ga-ahụ onye m hụrụ n’anya nwụrụ anwụ ọzọ?’ N’okpuru ebe a, a tụrụ aro ụfọdụ banyere otú anyị ga-esi kasie ndị anyị zutere n’ozi ọma, bụ́ ndị na-eru uju maka ọnwụ nke onye ikwu ha ma ọ bụ enyi ha, obi.—Aịza. 61:2.
2. Ọ̀ bụ mgbe niile onye nwe ụlọ gwara anyị na ya na-eru uju ka anyị ga-ezitewe ya ozi ọma aka?
2 Site n’Ụlọ Ruo n’Ụlọ: Onye nwe ụlọ nwere ike ịgwa anyị na mmadụ nwụnahụrụ ya ọhụrụ. Ọ̀ na-ebe ákwá? È nwere ndị ikwu ndị na-eru uju ebe ahụ? Ya dị otú ahụ, ọ ga-akacha mma ka i gbuo okwu gị nkenke. (Ekli. 3:1, 7) Ikekwe, anyị nwere ike ịgwa onye ahụ na ihe merenụ wutere anyị, nye ya traktị, magazin, ma ọ bụ broshuọ kwekọrọ n’ọnọdụ ya, ma sị ya ka ọ dị mgbe ọzọ. Anyị nweziri ike ịgaghachi n’oge kwesịrị ekwesị ma jiri Baịbụl kasikwuo ya obi.
3. Ọ bụrụ na ọnọdụ anyị zutere onye nwe ụlọ nke na-eru uju nyere anyị ohere ịgụrụ ya Baịbụl, olee ebe ndị anyị nwere ike ịgụ?
3 N’ọnọdụ ndị ọzọ, anyị nwere ike ịchọpụta na anyị nwere ike ikwutetụ okwu aka na mgbe mbụ anyị bịara. Ọ bụ eziokwu na oge a abụghị oge anyị ga-abịa gbaghawa ihe na-abụghị eziokwu e kwuru, anyị nwere ike ịgụ nkwa ndị Baịbụl kwere banyere mbilite n’ọnwụ. (Jọn 5:28, 29) Ma ọ bụkwanụ anyị nwere ike ịgwa ya ihe Baịbụl kwuru banyere ọnọdụ ndị nwụrụ anwụ. (Ekli. 9:5, 10) Ịgụrụ ya ebe a kpọlitere mmadụ n’ọnwụ na Baịbụl nwekwara ike ịkasi ya obi. (Jọn 11:39-44) Ihe ọzọ anyị nwekwara ike ime bụ ịgụrụ ya okwu ndị na-eme ka mmadụ nwee olileanya n’ebe Jehova nọ, bụ́ ndị Job kwesịrị ntụkwasị obi kwuru. (Job 14:14, 15) Tupu anyị alawa, anyị nwere ike inyefe ya broshuọ bụ́ Gịnị Na-eme Anyị Mgbe Anyị Nwụrụ?, Mgbe Onye Ị Hụrụ n’Anya Nwụrụ ma ọ bụ broshuọ ọzọ, ma ọ bụkwanụ traktị kwesịrị ekwesị. Anyị nwekwara ike inye ya akwụkwọ Bible Na-akụzi, gosi ya ihe e kwuru n’isi nke 6, ma mee ndokwa ịtụle isiokwu ahụ mgbe ọzọ anyị ga-abịa.
4. Olee ohere ndị ọzọ anyị nwere iji kasie ndị mmadụ obi?
4 N’ọnọdụ Ndị Ọzọ: Ọ bụrụ na a ga-ekwu okwu olili ozu n’Ụlọ Nzukọ Alaeze, ndị na-abụghị Ndịàmà hà ga-abịa? E nwere ike inye ha akwụkwọ anyị ndị na-akasi onye mmadụ nwụnahụrụ obi. Ụfọdụ ndị na-arụ ebe a na-agbasi ozu nwere obi ụtọ mgbe e nyere ha akwụkwọ ụfọdụ kwesịrị ekwesị ha ga-enye ezinụlọ ndị mmadụ nwụnahụrụ. Mgbe ụfọdụ, olili ozu ndị a kpọsara n’akwụkwọ akụkọ emeela ka e nwee ohere idere ndị ezinụlọ mmadụ nwụnahụrụ akwụkwọ ozi na-etoghị ogologo iji kasie ha obi. N’otu oge, mgbe otu nwoke nwunye ya nwụrụ natachara akwụkwọ ozi e tinyere traktị ụfọdụ n’ime ya, ya na nwa ya nwaanyị so gaa n’ụlọ onye nkwusa degaara ya akwụkwọ ozi ahụ ma jụọ ya, sị: “Ọ̀ bụ unu ziteere m akwụkwọ ozi a? Aga m achọ ịmatakwu banyere Baịbụl!” Nwoke ahụ na nwa ya nwaanyị kwetara ka a mụwara ha Baịbụl, ha malitekwara ịbịa ọmụmụ ihe.
5. Olee ihe mere anyị kwesịrị iji mụrụ anya iji kasie ndị na-eru uju obi?
5 Ekliziastis 7:2 kwuru, sị: “Ọ dị mma ịga n’ụlọ iru uju karịa ịga n’ụlọ oriri.” Ọ na-adịkarịrị onye na-eru uju mfe ige ntị n’Okwu Chineke karịa onye na-eri oriri. Anyị niile kwesịrị ịmụrụ anya iji hụta ohere ndị anyị nwere ike iji kasie ndị na-eru uju n’ihi onye ha hụrụ n’anya nwụnahụrụ ha obi.