Ihe Anyị Ga-amụta n’Aka Nehọm Onye Amụma
1. Gịnị ka anyị na-amụta n’Akwụkwọ Nehọm?
1 Nehọm buru amụma na a ga-ebibi obodo Ninive. Amụma ahụ mezuru n’ihi na o nweghị obodo bụ Ninive taa. Ihe a merenụ na-egosi na Jehova ga-ebibi ndị iro ya n’agbanyeghị otú ha siruru n’ike. (Nehọ. 1:2, 6) Ọ bụrụ na anyị elebara amụma a Nehọm buru anya, anyị ga-amụta ihe ga-enyere anyị aka ịna-ezi ndị mmadụ ozi ọma.
2. Olee otú ozi ọma anyị na-ekwusa ga-esi mee ka ndị mmadụ nwee nchekwube?
2 Kasie Ndị Mmadụ Obi, Meekwa Ka Ha Nwee Nchekwube: Ihe mbụ mmadụ nwere ike iche bụ na naanị ihe dị n’akwụkwọ Nehọm bụ amụma e buru gbasara otú a ga-esi bibie isi obodo Asiria bụ́ Ninive. (Nehọ. 1:1; 3:7) Ma, ihe Nehọm buru n’amụma mere ka obi dị ndị Juu ụtọ. Aha a bụ́ Nehọm pụtara “Onye Nkasi Obi.” Onye amụma ahụ mesiri ndị Juu ibe ya obi ike, gwa ha na a ga-ebibi ndị iro ha n’oge na-adịghị anya. O chetaara ha na Jehova bụ “ebe e wusiri ike n’ụbọchị ahụhụ.” (Nehọ. 1:7) Anyị kwesịkwara ịgba ndị ọzọ ume mgbe anyị na-ezi ha ozi ọma ka ha bịa fewe Jehova ka o wee chebe ha.—Nehọ. 1:15.
3. Olee otú anyị ga-esi jiri ihe atụ na-ezi ndị mmadụ ozi ọma otú Nehọm mere?
3 Na-emere Ha Ihe Atụ: Jehova mere ka Nehọm buo amụma na a ga-ebibi Ninive otú Asiria si bibie otu obodo dị n’Ijipt a na-akpọ No-emọn. (Nehọ. 3:8-10) Mgbe anyị na-agwa ndị mmadụ gbasara ọgwụgwụ ụwa Setan, anyị nwere ike ịgwa ha amụma ụfọdụ na-egosi na ihe ọ bụla Jehova kwuru ga-emezurịrị. Dị ka ihe atụ, mgbe ndị Babịlọn na ndị Midia bịara ịlụso Ninive agha n’afọ 632 Tupu Oge Ndị Kraịst, nnukwu mmiri zoro wee mee ka Osimiri Taịgris too. Mmiri ahụ kwaturu mgbidi siri ezigbo ike e ji gbaa Ninive gburugburu mezie ka e merie obodo ahụ n’egbughị oge otú ahụ e si buo n’amụma.—Nehọ. 1:8; 2:6.
4. Olee otú anyị ga-esi eme ka ndị mmadụ na-aghọta ihe anyị na-akụziri ha n’ozi ọma?
4 Na-ekwu Ihe Ga-ekwe Ndị Mmadụ Nghọta: Ihe Nehọm dere n’akwụkwọ ya esighị ike nghọta maka na ọ kọwara ya otú doro anya. (Nehọ. 1:14; 3:1) Anyị kwesịrị ịna-ezi ndị mmadụ ozi ọma otú ha ga-aghọta ya. (1 Kọr. 14:9) N’ụbọchị mbụ anyị bịara ozi ọma na nke mmadụ, anyị kwesiri ịgwa ya ihe mere anyị ji bịa. Anyị na-amụrụ mmadụ ihe, anyị kwesịrị inyere ya aka ka o nwee okwukwe na Jehova, matakwa na ihe dị na Baịbụl bụ eziokwu. Anyị kwesịkwara ime ka ọ hụ otú ihe dị na Baịbụl ga-esi enyere ya aka.—Rom 10:14.
5. Olee otú amụma Nehọm buru si emesi anyị obi ike?
5 Ihe Nehọm dere n’akwụkwọ ya gosiri otú o si nwee ntụkwasị obi na ihe ọ bụla Jehova kwuru ga-emezurịrị. N’oge na-adịghị anya, a ga-ebibi ụwa ọjọọ Setan. Baịbụl na-akasi anyị obi na e bibicha ya, “ahụhụ agaghị ebilite nke ugboro abụọ.”—Nehọ. 1:9.