Ngwá Ọrụ Ndị Anyị Ji Akụziri Ndị Mmadụ Baịbụl
1. Olee otú Ndị Kraịst si yie ndị ọrụ aka?
1 Ndị ọrụ aka na-enwe ngwá ọrụ dị iche iche. Ha na-eji ụfọdụ arụ ọrụ mgbe niile, nweekwa ndị nke ha na-eji arụ ọrụ ma ihe sie ike. Ndị nke ha na-ejikarị arụ ọrụ anaghị akọ akọ n’akpati ha na-etinye ngwá ọrụ, ngwá ọrụ ndị a amarakwala ha ahụ́. Baịbụl kwuru na Onye Kraịst ọ bụla kwesịrị ịna-agba mbọ n’ozi ọma ma bụrụ “onye ọrụ nke na-enweghị ihe ọ ga-emere ihere.” (2 Tim. 2:15) N’ime ngwá ọrụ ndị anyị ji akụziri ndị mmadụ ihe, olee nke kacha dị mkpa? Ọ bụ Baịbụl. Ọ bụ ya bụ isi sekpụ ntị ná ngwá ọrụ ndị anyị ji eme ka ndị mmadụ ‘bụrụ ndị na-eso ụzọ Jizọs.’ (Mat. 28: 19, 20) N’ihi ya, anyị kwesịrị ijisi ike “na-ejizi okwu nke eziokwu ahụ ejizi.” Ma, e nwekwara ngwá ọrụ ndị ọzọ anyị na-ejikarị akụziri ndị mmadụ ihe, nke anyị niile kwesịrị ịma otú anyị ga-esi jiri ha na-akụzi ihe nke ọma.—Ilu 22:29.
2. Olee ihe ndị anyị na-ejikarị akụziri ndị mmadụ Baịbụl?
2 Ngwá Ọrụ Ndị Anyị Na-ejikarị Akụziri Ndị Mmadụ Ihe: E wezụga Baịbụl, akwụkwọ anyị na-ejikarị akụziri ndị mmadụ ihe bụ Gịnị n’Ezie Ka Baịbụl Na-akụzi? Anyị na mmadụ mụchaa ya, anyị amụọkwara onye ahụ akwụkwọ “Nọrọnụ n’Ịhụnanya Chineke” ka o nwee ike ịmụta otú ọ ga-esi na-eme ihe Baịbụl kwuru. N’ihi ya, anyị kwesịrị ịma otú e si eji akwụkwọ ndị a akụzi ihe nke ọma. E nwekwara broshọ ụfọdụ anyị nwere ike iji na-akụziri ndị mmadụ Baịbụl. Broshọ Ozi Ọma Si n’Aka Chineke! bụ otu n’ime akwụkwọ ndị anyị na-ejikarị amalitere ndị mmadụ ọmụmụ Baịbụl. O nwekwara ndị anyị nwere ike iji broshọ Gee Chineke Ntị ma ọ bụ Gee Chineke Ntị Ka I Wee Dị Ndụ Ebighị Ebi malitere ọmụmụ Baịbụl. Ha bụ ndị na-amachaghị agụ ihe, ndị akwụkwọ anyị dị n’asụsụ ha dị ole na ole, ma ọ bụkwanụ ndị ọ na-enweghị akwụkwọ anyị dị n’asụsụ ha. Akwụkwọ anyị na-eji eme ka ndị mmadụ mata gbasara ọgbakọ Jehova bụ Ole Ndị Na-eme Uche Jehova Taa? Anyị nwekwara vidio ndị anyị na-eji eme ka ndị mmadụ bụrụ ndị na-eso ụzọ Jizọs. Ụfọdụ n’ime ha bụ Olee Uru Ịmụ Baịbụl Ga-abara Gị?, Gịnị Ka A Na-eme n’Ụlọ Nzukọ Alaeze?, na Chineke Ò Nwere Aha? Anyị kwesịrị ịma otú e si eji ha ezi ndị mmadụ ozi ọma.
3. Gịnị ka Ozi Alaeze Anyị ndị a ga-ebipụta n’ọdịnihu ga-enyere anyị aka ime?
3 N’ọdịnihu, isiokwu ụfọdụ ga-agba n’Ozi Alaeze Anyị ga-enyere anyị aka ịmụta otú anyị ga-esi jiri akwụkwọ ndị anyị na-ejikarị akụziri ndị mmadụ Baịbụl akụzi ihe nke ọma. Ọ bụrụ na anyị ejiri ha na-akụzi ihe nke ọma, anyị na-eme ihe Pọl gwara Timoti. Ọ sịrị ya: “Na-elezi onwe gị na ozizi gị anya mgbe niile. Nọgide n’ihe ndị a, n’ihi na site n’ime otú a, ị ga-azọpụta onwe gị, zọpụtakwa ndị na-ege gị ntị.”—1 Tim. 4:16.