Otú Anyị Ga-esi Na-akụziri Ndị Mmadụ Ihe Ka O Ruo Ha n’Obi
1. Olee otú obi na-adị ndị mmadụ ma ha gechaa Jizọs ntị?
1 Jizọs kụziiri ndị mmadụ ihe otú ruru ha n’obi. Mgbe ọ kọwachaara ndị na-eso ụzọ ya Akwụkwọ Nsọ otu ụbọchị, ha ghọtara ya nke ọma nke na ha kwuru na ‘obi kpooro ha ọkụ.’ (Luk 24:32) Chineke chọrọ ka anyị si n’ala ala obi anyị na-erubere ya isi. N’ihi ya, olee otú anyị ga-esi na-eme ka ihe anyị na-akụziri ndị mmadụ na-eru ha n’obi ka ha nwee ike ịna-eme ihe ndị ha na-amụta?—Rom 6:17.
2. Olee uru iji akọ achọpụta ihe dị onye anyị na-akụziri ihe n’obi bara?
2 Nyere Ha Aka Ikpebi Ihe Ha Ga-eme: Ọ bụrụ na ihe anyị na-eme bụ naanị ịgwa ndị anyị na-amụrụ Baịbụl ihe bụ́ ihe ọma na ihe bụ́ ihe ọjọọ, obi agaghị esi ha ike ime ihe Baịbụl kwuru. Ọ bụrụkwa na anyị ana-agụrụ ha amaokwu Baịbụl dị iche iche iji gosi ha na ihe a na-akụzi na chọọchị ha abụghị eziokwu, ha nwere ike jụ ige anyị ntị. Ka anyị nwee ike ịkụziri mmadụ ihe otú ọ ga-eru ya n’obi, anyị kwesịrị ibu ụzọ chọpụta ihe mere o ji kwere ihe o kweere nakwa ihe mere o ji na-akpa àgwà ọ na-akpa. Anyị kwesịkwara iji akọ jụọ ya ajụjụ ndị ga-eme ka o kwuo ihe dị ya n’obi. (Ilu 20:5) Ihe ndị anyị chọpụtara ga-enyeziri anyị aka ịmara amaokwu Baịbụl anyị ga-agụrụ ya, ya eruo ya n’obi. Anyị kwesịrị inwere ya ndidi ma gosi ya na anyị nwere mmasị n’ebe ọ nọ. (Ilu 25:15) Cheta na ọ bụghị mmadụ niile ka ime ihe ha mụtara na Baịbụl ozugbo na-adịrị mfe. Mgbe oge ruru, mmụọ nsọ ga-enyere ya aka ịgbanwe otú o si eche echiche na otú o si akpa àgwà.—Mak 4:26-29.
3. Olee otú anyị ga-esi nyere ndị anyị na-akụziri ihe aka ka ha malite ịkpa ezigbo àgwà?
3 Nyere Ha Aka Ka Ha Malite Ịkpa Ezigbo Àgwà: Amaokwu Baịbụl ndị na-egosi otú Jehova si dị obiọma na otú o si hụ ụmụ mmadụ n’anya ga-enyere anyị aka ịkụziri ndị mmadụ otú ha ga-esi na-akpa ezigbo àgwà. Iji gosi ha na Chineke hụrụ onye ọ bụla n’ime anyị n’anya, anyị nwere ike ịgụrụ ha Abụ Ọma 139:1-4 ma ọ bụ Luk 12:6, 7. Ọ bụrụ na ihe ọma niile Jehova na-emere ha eruo ha n’obi, ha ga-ahụkwu ya n’anya, jirikwa obi ha niile chọọ ife ya. (Rom 5:6-8; 1 Jọn 4:19) Ọ bụrụkwa na mmadụ aghọta na àgwà ya nwere ike ime ka obi Jehova ṅụrịa ma ọ bụkwanụ mee ka iwe wee ya, o nwere ike ikpebi ịna-erubere ya isi.—Ọma 78:40, 41; Ilu 23:15.
4. Olee otú anyị ga-esi mee ka Jehova mgbe anyị na-akụziri ndị mmadụ Baịbụl?
4 Jehova anaghị amanye ndị mmadụ ka ha na-erubere ya isi. Kama, ọ na-akụziri ha uru ha ga-erite ma ha rubere ya isi. (Aịza. 48:17, 18) Anyị na-eme ka Jehova ma ọ bụrụ na anyị ana-akụziri ndị mmadụ ihe otú ha ga-enwe ike iji aka ha na-ekpebi ihe ha ga-eme. Ọ bụrụ na mmadụ ejiri aka ya kpebie ime ihe ziri ezi, ọ ga-abara ya ezigbo uru. (Rom 12:2) Ọ ga-emekwa ka onye ahụ bịaruo Jehova bụ́ onye “na-enyocha obi” nso.—Ilu 17:3.