“Ikwusa Ozi Ọma Na-atọ M Ụtọ Ugbu A”

M KWỤSỊRỊ INWE OBI ỤTỌ

Ọ dị mwute na mgbe m ruru ihe dị ka afọ iri na atọ, mụ na Jehova adịchaghịzi ná mma otú anyị dịbu. O yiri m ka ụmụ akwụkwọ ibe m hà nweere onwe ha ime ihe masịrị ha. M chekwa na e nwere ihe na-efunahụ m. Ọ dị m ka iwu nne na nna m na-enye m nakwa ihe a chọrọ ka Ndị Kraịst na-eme hà bụ ibu arọ. Ihe ndị m na-eme n’ofufe Jehova bịara dịzie m ka oké ọrụ. Ọ bụ eziokwu na m ma na Jehova dị, ma mụ na ya adịghịzi ná mma.

Achọghị m ịghọ onye nkwusa na-anaghị ejekwa ozi. N’ihi ya, m na-aga ozi ọma iji mezuo iwu. Anaghị m akwadebe akwadebe tupu mụ agawa ozi ọma. N’ihi ya, ọ na-eme ka o siere m ike izi mmadụ ozi ọma. Ihe a mere ka m ghara inwe ndị m na-agara nletaghachi na ndị m na-amụrụ ihe nke mere ka ịga ozi ọma ghara ịna-atọ m ụtọ. M na-ajụ onwe m, sị: ‘Olee otú mmadụ ga-esi na-eme ihe a n’izu ọ bụla na n’ọnwa ọ bụla?’

Mgbe m na-erula afọ iri na asaa, m chọrọ ka a hapụ m ka m mewe otú masịrị m. N’ihi ya, m kwakọtara ihe m, tinye isi n’Ọstrelia. O wutere nne na nna m ịhụ ka m na-ahapụ ụlọ. Ihe a nyere ha nsogbu n’obi. Mana ha chere na m ka ga na-efe Jehova.

N’Ọstrelia, m lakwuru azụ n’ọgbakọ. M malitere ịna-ahapụ ịga ọmụmụ ihe ụfọdụ. Ndị mụ na ha na-akpazi bụ ndị ka na-eto eto ndị ọ dị ka ọ dị m, ndị ọ na-atọ ụtọ ịga ọmụmụ ihe mgbe ọ dapụtara, ma n’oge ndị ọzọ, ha agaa ịṅụ mmanya na ịgba egwú n’ụlọ oriri na nkwari. M chetara na n’oge ahụ, otu ụkwụ m nọ n’ọgbakọ, nke ọzọ anọrọ n’èzí. Amaghị m ebe m kwụ akwụ.

IHE M NA-ATỤGHỊ ANYA YA KỤZIIRI M EZIGBO IHE

Mgbe ihe dị ka afọ abụọ gachara, m matara otu nwanna nwaanyị. Ọ maghị na o ji obere oge mụ na ya nọrọ mee ka m chebara onwe m echiche. N’oge ahụ, mụ na ụmụnna nwaanyị anọ ndị ọzọ na-alụbeghị di bi n’otu ụlọ. Anyị kpọrọ onye nlekọta sekit na nwunye ya aha ya bụ Tamara ka ha bịa nọrọ na nke anyị otu izu. Onye nlekọta sekit ahụ nọrọ na-arụ ọrụ ọgbakọ, anyị na nwunye ya na-anọ na-akpa, na-achị. Ihe ahụ tọrọ m ụtọ. Nwanna nwaanyị ahụ ma ihe, bụrụkwa onye ọ na-adị mfe ịgwa okwu. Ọ tụrụ m n’anya na onye ji ofufe Chineke kpọrọ ihe otú a nwekwara ike ịna-egwu egwu otú a.

Tamara na-anụ ọkụ n’obi. Otú o si jiri eziokwu kpọrọ ihe na otú o si jiri ịga ozi ọma kpọrọ ihe ga-eme ka onye nọ ya n’akụkụ chọọkwa ime otú ahụ. Ọ na-atọ ya ụtọ imere Jehova ihe niile o nwere ike imere ya. Mana obi anaghị adị m ụtọ n’ihi na ozi m na-ejere Jehova bụ iji mezuo iwu. Otú o si akpa àgwà nakwa otú o si enwe obi ụtọ mere ka m gbanwee ndụ m. Àgwà ọma ya mere ka m chebara otu ihe e kwuru na Baịbụl echiche. Ebe ahụ kwuru na Jehova chọrọ ka ndị niile na-efe ya na-aṅụrị ọṅụ, jirikwa “mkpu ọṅụ” na-ejere ya ozi.—Ọma 100:2.

OTÚ M SI MECHAA JIRI OZI ỌMA KPỌRỌ IHE

M chọrọ ịna-enwe ụdị obi ụtọ ahụ Tamara na-enwe. Mana ọ bụrụ na m chọrọ ime ya, ọ pụtara na m ga-agbanwe ọtụtụ ihe ná ndụ m. O were m oge. Ma ka oge na-aga, m malitere ịna-eme mgbanwe obere obere. M malitere ịna-akwado akwado tupu mụ agaa ozi ọma, sụọkwa ụzọ inyeaka si n’oge ruo n’oge. Ihe a nyeere m aka ịkwụsị ịtụ ụjọ, meekwa ka obi na-esi m ike ikwusa ozi ọma. Ka m na-ejikwu Baịbụl akụziri ndị mmadụ ihe n’ozi ọma, ozi ọma bịara na-atọkwu m ụtọ. N’oge na-adịghị anya, m malitere ịsụ ụzọ inyeaka kwa ọnwa.

M malitere na-emeta ndị ji ọgbakọ kpọrọ ihe enyi, ma okenye ma nwata, ndị ozi ha na-ejere Jehova na-atọ ụtọ. Àgwà ọma ha nyeere m aka ichebara ihe ndị m weere ka ihe ndị ka mkpa echiche, nyekwara m aka ịmalite ịgụ Baịbụl kwa ụbọchị. Ozi ọma bịara na-atọkwu m ụtọ. Ka oge na-aga, m malitere ịsụ ụzọ oge niile. Kemgbe ọtụtụ afọ, ọ bụ n’oge ahụ ka obi malitere iru m ala n’ọgbakọ, mụ ana-enwekwa obi ụtọ.

M NWETARA ONYE MỤ NA YA SO NA-ASỤ ỤZỌ

Mgbe otu afọ gachara, mụ na Alex matara. Ọ dị obiọma, hụkwa Jehova na ozi ya n’anya. N’oge ahụ, ọ bụ ohu na-eje ozi. Ọ sụọkwala ụzọ ruo afọ isii. E nweekwala mgbe o jere ozi n’ebe a chọkwuru ndị nkwusa na Malawi. Ihe ndị ọ mụtara n’aka ndị ozi ala ọzọ ya na ha nọrọ ebe ahụ baara ya ezigbo uru ná ndụ ya. Ha gbara ya ume ka ọ nọgide na-ewere ofufe Chineke ka ihe mbụ ná ndụ ya.

N’afọ 2003, mụ na Alex lụrụ. Kemgbe ahụ, anyị ka nọkwa n’ozi oge niile. Anyị amụtala ọtụtụ ihe magburu onwe ha. Jehova esikwala n’ọtụtụ ụzọ gọzie anyị.

OTÚ JEHOVA SI GỌZIKWUO ANYỊ

N’afọ 2009, a gwara anyị ka anyị bụrụ ndị ozi ala ọzọ na Timọ-Lest bụ́ obere obodo dị n’agwaetiti ndị dị n’Indonisha. Ihe a tụrụ anyị n’anya, tọọ anyị ụtọ, tụọkwa anyị ụjọ. Mgbe ọnwa ise gachara, anyị bịarutere n’isi obodo Timọ-Lest bụ́ Dili.

Njem a gbanwere ọtụtụ ihe ná ndụ anyị. Anyị ga-amụ omenala ha, asụsụ ha, nri ha, na otú e si ebi n’obodo ahụ. Ọtụtụ mgbe, anyị nọrọ n’ozi ọma, anyị na-ahụ ndị dara ogbenye, ndị na-agụghị akwụkwọ, na ndị a na-emegbu emegbu. Anyị hụkwara ọtụtụ ndị agha na tigbuo zọgbuo kpara aka ọjọọ.a

Anyị na-ahụ ọtụtụ ihe na-eju anyị anya n’ozi ọma. Dị ka ihe atụ, o nwere otu oge m hụrụ otu nwata nwaanyị dị afọ iri na atọ aha ya bụ Maria.b Obi adịghị ya mma. Mama ya nwụrụ afọ ole na ole gara aga, ọ na-arakwa ahụ́ tupu ya ahụ papa ya. Maria amabeghị ihe ọ ga-eji ndụ ya eme otú ahụ ọ dị ọtụtụ ụmụaka ya na ha bụ ọgbọ. M chetara otu oge o bere ákwá ma gwa m otú obi dị ya. Ma, amaghị m ihe ọ na-ekwu n’ihi na anaghị m aghọta asụsụ ha nke ọma n’oge ahụ. M kpere ekpere rịọ Jehova ka o nyere m aka ịgba ya ume. M gụụrụ ya amaokwu Baịbụl ndị ga-agba ya ume. Mgbe afọ ole na ole gafere, m hụrụ na eziokwu emeela ka àgwà ya, ejiji ya, na ndụ ya ka mma. O mere baptizim. Ugbu a, ọ na-amụziri ndị mmadụ Baịbụl. Maria nweziri ezinụlọ buru ibu n’ọgbakọ Jehova. Ọ makwa na ha hụrụ ya n’anya.

Jehova na-agọzi ozi ọma anyị na-ezi na Timọ-Lest. Ọ bụ eziokwu na ọtụtụ ndị nkwusa nọ ebe ahụ mere baptizim n’ime afọ iri gara aga, ọtụtụ n’ime ha bụzi ọsụ ụzọ oge niile, ndị ọzọ abụrụ ohu na-eje ozi ma ọ bụ okenye. Ụfọdụ nọkwa n’ọfis ndị nsụgharị na-asụgharị ihe ndị e ji amụ Baịbụl n’asụsụ ndị a na-asụ n’obodo ahụ. Ọ na-atọ m ezigbo ụtọ ma m nụ ka ha na-abụ abụ n’ọmụmụ ihe, hụ otú ihu si abụ ha ọchị ọchị, nakwa otú ha si eme nke ọma n’ozi Jehova.

NDỤ M DỊ UGBU A NA-ATỌGBU M ATỌGBU

Otú ihe dịịrị anyị na Timọ-Lest dị iche n’otú ọ dịịrị anyị n’Ọstrelia. Ma, ozi anyị na-eje ebe ahụ na-atọ anyị ụtọ. Mgbe ụfọdụ, anyị na-abanye n’obere bọs bu ọtụtụ ndị, buru azụ̀ ọkpọọ, nakwa ọtụtụ akwụkwọ nri a zụtara n’ahịa obodo ahụ. N’ụbọchị ụfọdụ, anyị na-amụrụ mmadụ Baịbụl n’obere ụlọ na-ekpo ọkụ ala ya ruru unyi, ọkụkọ na-agbagharịkwa ebe niile. N’agbanyeghị ihe ndị a niile, ọtụtụ mgbe, m na-agwa onwe m, sị, ‘Ndụ a atọgbuola m.’

M cheta ihe ndị mere n’oge gara aga, obi na-atọgbu m atọgbu na nne na nna m mere ike ha niile ịkụziri m gbasara Jehova nakwa ịkwado m, ma mgbe m na-ejighị ofufe Jehova kpọrọ ihe. Ilu 22:6 mezuru n’isi m. Mama m na papa m ji mụ na Alex eme ọnụ. Obi na-atọgbukwa ha atọgbu ịhụ na anyị na-efe Jehova. Kemgbe afọ 2016, m na-eso di m eleta sekit ndị dị n’ebe alaka ụlọ ọrụ anyị dị n’Ọstrelia na-elekọta.

Ọ ga-esiri gị ike ikweta na e nwere mgbe m na-ewere ikwusa ozi ọma ka oké ọrụ. Ugbu a, ikwusa ozi ọma na-atọzi m ụtọ. Amatala m na n’agbanyeghị ihe ndị mere ná ndụ anyị, anyị ga-enweta ezigbo obi ụtọ ma anyị jiri obi anyị niile na-efe Chineke. N’eziokwu, afọ iri na asatọ gara aga mụ na di m fekọrọ Jehova bụ afọ ndị m kacha nwee obi ụtọ ná ndụ m. Aghọtala m na ihe Devid gwara Jehova bụ eziokwu. Ọ gwara ya, sị: “Ndị niile na-agbaba n’ime gị ga-aṅụrị ọṅụ; ha ga na-eti mkpu ọṅụ ruo mgbe ebighị ebi. . . . Ndị hụrụ aha gị n’anya ga-enwekwa aṅụrị n’ime gị.”—Ọma 5:11.