3 | Otú Ndị A Kọrọ Akụkọ Ha na Baịbụl Nwere Ike Isi Baara Gị Uru

BAỊBỤL KỌRỌ BANYERE . . . Ụmụ nwoke na ụmụ nwaanyị fere Jehova ndị bụ́ “mmadụ ibe anyị.”—JEMS 5:17.

Ihe Ọ Pụtara

Na Baịbụl, e nwere ọtụtụ ụmụ nwoke na ụmụ nwaanyị ndị ụdị ihe dị iche iche mere ka obi jọọ ha njọ. Ka anyị na-agụ akụkọ ha, anyị nwere ike ịhụ onye ọ dị ka ọ dị anyị.

Otú Ihe A Nwere Ike Isi Nyere Anyị Aka

Anyị niile chọrọ ka ndị ọzọ ghọta otú obi dị anyị. Ma, ndị ọ na-akacha mkpa ka ndị ọzọ ghọta otú obi dị ha bụ ndị isi na-akpakọchaghị ọnụ. Ọ bụrụ na anyị agụọ ihe mere ndị a kọrọ akụkọ ha na Baịbụl, anyị ga-ahụ na e nwere ndị chere echiche otú anyị si eche nakwa ndị obi dị otú obi na-adị anyị. Ihe a na-eme ka anyị ghọta na ọ bụghị anyị bụ ndị mbụ nwere nsogbu anyị na-enwe. Ọ na-eme ka anyị mara na e nweela ndị diri ma merie ụdị nchegbu na obi ọjọọ anyị na ya na-alụ.

Na Baịbụl, a kọrọ ọtụtụ ihe ndị ike ụwa gwụrụ na ndị na-amaghị ihe ha ga-eme eme kwuru. È nwetụla mgbe i chere, sị: ‘Ike ụwa agwụla m, ka m wụsa ọwa’? E nwere mgbe ọ dị Mosis otú ahụ, nweekwa mgbe ọ dị Ịlaịja na Devid otú ahụ.—Ọnụ Ọgụgụ 11:14; 1 Ndị Eze 19:4; Abụ Ọma 55:4.
Baịbụl kọọrọ anyị gbasara otu nwaanyị aha ya bụ Hana. ‘Obi jọrọ ya ezigbo njọ’ maka na ọ mụtaghị nwa, nwunye di ya anọrọkwa n’elu ya na-akwa ya emo.—1 Samuel 1:6, 10.
Baịbụl kọọrọ anyị gbasara otu nwoke aha ya bụ Job. Otú obi dị ya bụ otú ọ na-adị ọtụtụ n’ime anyị. Ọ bụ eziokwu na o nwere okwukwe na Jehova, ma e nwere mgbe uche na-akpakọghị ya ọnụ, ya ekwuo, sị: “Ndụ m agwụla m ike. Achọghịzi m ịdị ndụ.”—Job 7:16.

Ọ bụrụ na anyị amụta otú ndị a a kọrọ akụkọ ha na Baịbụl si merie echiche ndị na-adịghị mma batara ha n’obi, anyị ga-enweta ike anyị ga-eji die nsogbu ndị anyị na ha na-alụ.

Otú Baịbụl Si Enyere Kevin Aka

Otú Ọrịa Na-aghasa Ụbụrụ Si Akpa M Aka Ọjọọ

“Mgbe ọ fọrọ obere ka m ruo afọ iri ise, e lere m ahụ́ chọpụta na m na-arịa ọrịa na-aghasa ụbụrụ nke na-eme obi dịtụ m mma, obere oge obi ajọwa m ezigbo njọ. Mgbe ụfọdụ, ọ na-adị m ka m̀ ga-emerili nsogbu ọ bụla bịaara m. Ma n’oge ndị ọzọ, ọ na-adị m ka ndụ m dị enweghị isi.”

Otú Baịbụl Si Enyere M Aka

“Otu onye a kọrọ akụkọ ya na Baịbụl ọ na-adị m otú ọ dị ya bụ Pita onyeozi. E nwere ihe ndị o mejọrọ, ndị mere ka o chee na e nweghị uru ọ bara. Ma, kama ịnọrọ na-ele onwe ya anya otú ahụ, Pita gakwuuru ndị enyi ya ndị hụrụ ya n’anya. Mgbe ọ bụla ọrịa m mere ka obi jọwa m njọ, ihe ndị m na-emejọ n’ihi ezughị okè na-ebido iwute m, mee ka m chee na e nweghị uru m bara. M na-emezi ka Pita. M na-agbalị gakwuru ndị enyi m ndị chọrọ inyere m aka ka ike ụwa ghara ịgwụ m.

“Onye ọzọ a kọrọ akụkọ ya na Baịbụl nke ihe o mere kasiri m nnọọ obi bụ Eze Devid. E nwere ọtụtụ ugboro otú ihe si dịrị ya mere ka obi daa ya mbà, nweekwa ọtụtụ ugboro ọ kwara mmakwaara n’ihi ihe ndị o mejọrọ n’oge gara aga. Ọ na-adị m otú ahụ ọ dị ya n’ihi na mgbe ụfọdụ, m na-ekwu ma na-eme ihe ndị m na-akwara mmakwaara. Ihe Devid kwuru n’Abụ Ọma nke 51 na-akasi m obi. N’amaokwu nke 3 ya, Devid sịrị: ‘M ma nke ọma na m mere mmehie, m na-echetakwa mmehie m mgbe niile.’ Ihe a bụ nnọọ otú ọ na-adị m mgbe obi dara m mbà, ọ na-esiri m ike icheta ihe ọ bụla dị mma gbasara onwe m. Ma ihe ọzọ Devid kwuru n’amaokwu nke 10 na-eru m n’obi. Ọ sịrị: ‘Chineke, biko, mee ka m nwee obi dị ọcha, meekwa ka ọ na-agụ m agụụ ime ihe dị mma mgbe niile.’ M na-ekwu ihe yiri ya ma m rịọwa Chineke ka o nyere m aka ka m ghara ile onwe m anya otú m na-eme. Amaokwu nke 17 na-akasi m obi. Ebe ahụ sịrị: ‘Chineke, ị gaghị eleghara onye obi gbawara anya nakwa onye ihe o mere na-ewute.’ Amaokwu a na-eme ka obi sie m ike na Chineke hụrụ m n’anya.

“Ilekwasị anya ná ndị a kọrọ akụkọ ha na Baịbụl nakwa n’ihe ndị Chineke meerela m n’oge a na-eme ka obi sie m ike na ihe ndị m na-atụ anya ha n’ọdịnihu ga-emezu. O doro m anya na nkwa ndị e kwere na Baịbụl ga-emezu. Ihe a na-enyere m ezigbo aka ka ike ghara ịgwụ m.”