2 | “Nkasi Obi Anyị Na-enweta n’Akwụkwọ Nsọ”

BAỊBỤL KWURU, SỊ: “E dere ihe niile e dere n’oge gara aga ka e jiri ha kụziere anyị ihe, ka obi anyị na-atachi na nkasi obi anyị na-enweta n’Akwụkwọ Nsọ wee mee ka anyị nwee olileanya.”—NDỊ ROM 15:4.

Ihe Ọ Pụtara

Na Baịbụl, e kwuru ọtụtụ ihe na-agba ume ma na-akasi obi. Ha nwere ike inyere anyị aka mgbe echiche ọjọọ na-abata anyị n’uche. Ihe e dere na Baịbụl na-emekwa ka anyị nwee olileanya na n’oge na-adịghị anya, ihe ndị na-echegbu anyị na ihe ndị na-ewute anyị agaghịzi adị.

Otú Ihe A Nwere Ike Isi Nyere Anyị Aka

Onye ọ bụla n’ime anyị nwere mgbe obi na-ajọ ya njọ. Ma, ndị isi na-akpakọghị ọnụ na ndị na-echegbukarị onwe ha na-anọ ná mwute mgbe niile. Olee otú Baịbụl nwere ike isi nyere ha aka?

Na Baịbụl, e kwuru ọtụtụ ihe na-eme obi ụtọ anyị nwere ike iji dochie anya ihe ndị na-adịghị mma na-abata anyị n’uche. (Ndị Filipaị 4:8) Ihe ndị ahụ nwere ike ịkasi anyị obi ma mee ka obi jụrụ anyị, nyeziere anyị aka ịkpakọ echiche anyị ọnụ.—Abụ Ọma 94:18, 19.
Baịbụl nwere ike inyere anyị aka ịkwụsị iche na anyị abaghị uru.—Luk 12:6, 7.
Ọtụtụ ebe na Baịbụl na-eme ka obi sie anyị ike na ọ bụghị naanị anyị kwụ, nakwa na Chineke, Onye kere anyị, na-aghọtacha otú obi dị anyị.—Abụ Ọma 34:18; 1 Jọn 3:19, 20.
Baịbụl kwere nkwa na Chineke ga-eme ka anyị kwụsị icheta ihe ọjọọ ndị mere anyị n’oge ndị gara aga. (Aịzaya 65:17; Mkpughe 21:4) Mgbe ọ bụla echiche na-adịghị mma batara anyị n’obi ma ọ bụ obi ajọwa anyị njọ, nkwa a Baịbụl kwere nwere ike ime ka anyị nweta ume idi nsogbu anyị.

Otú Baịbụl Si Enyere Jessica Aka

Otú Ọrịa Isi Mgbaka Si Akpa M Aka Ọjọọ

“Mgbe m dị afọ iri abụọ na ise, ụbụrụ ghasara m. E lere m ahụ́ chọpụta na m na-arịa ọrịa isi mgbaka. Ihe na-abata m n’isi mgbe niile bụ ihe ọjọọ ndị mere m n’oge ndị gara aga. Ndị dọkịta nyeere m aka ịghọta na ihe so kpata ọrịa m bụ ihe ndị na-adịghị mma m na-eche n’echiche n’ihi ihe ike na ihe ndị jọgburu onwe ha merela ná ndụ m. E wepụ ọgwụ ndị kwesịrị ekwesị m na-aṅụ, otú ọzọ e si na-agwọ m bụ inyere m aka ịmata otú na-adịghị mma m si eche echiche nakwa ịkwụsị ya.”

Otú Baịbụl Si Enyere M Aka

“N’oge ahụ ụbụrụ ghasara m, ezigbo ụjọ nọ na-atụ m, m na-echegbukarị onwe m, ụra anaghịkwa aga m n’anya. Ọtụtụ ugboro n’abalị, ike na-agwụcha m n’ihi otú echiche m si awagharị n’ihe dị iche iche na-adịghị mma. Ma dị ka e kwuru n’Abụ Ọma 94:19, Chineke nwere ike ịkasị anyị obi ma mee ka obi jụrụ anyị mgbe anyị na-echegbu onwe anyị. N’ihi ya, m dowere Baịbụl m na akwụkwọ m dere amaokwu Baịbụl ndị na-agba ume n’akụkụ ebe m na-ehi ụra. Mgbe ụra na-ekweghị eburu m, m na-agụ amaokwu ụfọdụ, si otú ahụ kwe ka okwu Chineke kasie m obi.

“Baịbụl gwara anyị ka anyị wepụ echiche ọ bụla na-adabaghị n’ihe anyị ma gbasara Chineke n’obi anyị. Tupu ugbu a, eweere m onwe m ka onye na-abaghị uru ọ bụla na onye ndị ọzọ na-enweghị ike ịhụ n’anya. Ma, amụtala m na ụdị echiche a adabaghị n’ihe Baịbụl kwuru. Baịbụl gosiri na Chineke bụ Nna na-eme amara, Onye hụrụ onye nke ọ bụla n’ime anyị n’anya. M ji nwayọọ nwayọọ malite ịchịkwa echiche m kama ikwe ka ọ na-achị m. Amụtala m ile onwe m anya otú Chineke si ele m anya. Ihe a bụ ihe dị mkpa m mere nke nyeere m aka ịkwụsị iwere onwe m ka onye na-abaghị uru.

“Ana m atụsi anya ike mgbe ihe ọjọọ ndị mere n’oge ndị gara aga nakwa echiche na-adịghị mma na-agaghị abatakwa mmadụ n’obi. Ịmata na isi mgbaka ma ọ bụ uche ịghasasị mmadụ ga-abụzi ihe mgbe ochie na-enyere m aka idi nsogbu ndị m na-enwe ugbu a, ọ na-emekwa ka m na-atụsi anya ike mgbe ọrịa isi mgbaka mụ na ya na-alụ ga-ala kpamkpam n’ọdịnihu.”