Ajụjụ Ndị Na-agụ Akwụkwọ Anyị Na-ajụ
Mgbe Jizọs malitere Nri Anyasị nke Onyenwe Anyị, olee ebe ndị na-eso ụzọ ya iri asaa ahụ o zipụburu ka ha gaa kwusaa ozi ọma nọ? Hà ahapụla ya?
Anyị ekwesịghị iche na ebe ọ bụ na ndị na-eso ụzọ Jizọs iri asaa ahụ anọghị ya mgbe ọ malitere Nri Anyasị nke Onyenwe Anyị, na ihe ha amasịghị Jizọs ma ọ bụkwanụ na ha hapụrụ ya. Ihe Jizọs chọrọ bụ ka ya na ndịozi ya nọrọ n’oge ahụ.
Ihe ndịozi iri na abụọ na ndị na-eso ụzọ iri asaa ahụ masịchara Jizọs. O bula ụzọ si n’ime ọtụtụ ndị na-eso ụzọ ya họrọ mmadụ iri na abụọ ọ kpọrọ ndịozi ya. (Luk 6:12-16) Ọ nọ na Galili mgbe ‘ọ kpọkọtara ndịozi ya iri na abụọ’ ma ‘zipụ ha ka ha gaa kwusaa gbasara Alaeze Chineke ma gwọọ ọrịa.’ (Luk 9:1-6) Mgbe Jizọs mechara gbadata na Judia, ọ “họpụtakwuru mmadụ iri asaa ma zipụ ha abụọ abụọ.” (Luk 9:51; 10:1) N’ihi ya, Jizọs nwere ndị na-eso ụzọ ya na-ekwusa gbasara ya n’ebe dị iche iche.
Ndị Juu ndị ghọrọ ndị na-eso ụzọ Jizọs ka ga na-eme Ememme Ngabiga a na-eme kwa afọ. O nwere ike ịbụ ha na ndị ezinụlọ ha ga na-eme ya. (Ọpụ. 12:6-11, 17-20) Mgbe oge ọnwụ Jizọs na-eru nso, ya na ndịozi ya gara Jeruselem. Mana, ọ kpọghị ndị na-eso ụzọ ya niile ka ha si Judia, Galili, nakwa Peria bịa ka ha na ya mee Ememme Ngabiga. O doro anya na Jizọs chọrọ ka ya na ndịozi ya nọrọ n’oge ahụ. Ọ gwara ha, sị: “Ọ gụsiri m agụụ ike iso unu rie nri Ememme Ngabiga a tupu mụ ataa ahụhụ.”—Luk 22:15.
E nwere ezigbo ihe mere Jizọs ji mee otú ahụ. N’oge na-adịghị anya, ọ ga-anwụ ebe ọ bụ ya bụ “Nwa Atụrụ Chineke onye na-ewepụ mmehie nke ụwa.” (Jọn 1:29) Ebe ọ ga-anọ nwụọ bụ na Jeruselem, ebe a na-anọ achụrụ Chineke àjà kemgbe. Nwa atụrụ e ji eme Ememme Ngabiga na-echetara ndị Izrel na Jehova napụtara ha n’Ijipt. Mana àjà Jizọs ga-achụ ga-eme ihe karịrị nke ahụ. Ọ ga-eme ka ụmụ mmadụ niile nwere onwe ha ná mmehie na ọnwụ. (1 Kọr. 5:7, 8) Àjà a Jizọs chụrụ mere ka ndịozi ya iri na abụọ ghọọ ndị e ji tọọ ntọala ọgbakọ Ndị Kraịst. (Efe. 2:20-22) Ọ dịkwa mma ịmara na obodo nsọ ahụ bụ́ Jeruselem nwere “nkume iri na abụọ e ji tọọ ntọala ya. E dekwara aha iri na abụọ nke ndịozi iri na abụọ nke Nwa Atụrụ ahụ n’elu nkume ndị ahụ.” (Mkpu. 21:10-14) N’eziokwu, e nwere ọrụ dị ezigbo mkpa ndịozi ndị ahụ ga-arụ n’imezu nzube Chineke. N’ihi ya, o doro anya na Jizọs chọrọ ka ya na ha nọrọ n’oge ọ ga-eme Ememme Ngabiga ikpeazụ ya nakwa ihe ọzọ ọ ga-eme ozugbo o mechara ya, ya bụ, Nri Anyasị nke Onyenwe Anyị.
Ndị na-eso ụzọ Jizọs iri asaa ahụ na ndị na-eso ụzọ ya ndị ọzọ esoghị ya rie Nri Anyasị nke Onyenwe Anyị. Ma, Nri Anyasị nke Onyenwe Anyị ahụ ọ malitere ga-abara ndị na-eso ụzọ ya niile kwesịrị ntụkwasị obi uru. Onye ọ bụla n’ime ha nke mechara ghọọ Onye Kraịst e tere mmanụ ga-eso n’ọgbụgba ndụ nke Alaeze nke Jizọs Kraịst gwara ndịozi ya gbasara ya n’abalị ahụ.—Luk 22:29, 30.