Ihe Mere A Ka Ji Na-alụ Agha

MMEHIE

Chineke kere nne na nna anyị mbụ bụ́ Adam na Iv ka ha yie ya. (Jenesis 1:27) Ọ pụtara na ha kwesịrị ịna-akpa àgwà ndị e ji mara Chineke, dị ka ime udo na ịhụ ndị ọzọ n’anya. (1 Ndị Kọrịnt 14:33; 1 Jọn 4:8) Ma, Adam na Iv nupụụrụ Chineke isi, si otú ahụ mee mmehie. Anyị niile ketaziri mmehie na ọnwụ n’aka Adam na Iv. (Ndị Rom 5:12) Mmehie a anyị ketara na-eme ka anyị na-eche echiche ọjọọ, nke nwere ike ime ka anyị na-eme ihe ọjọọ.​—Jenesis 6:5; Mak 7:21, 22.

ỌCHỊCHỊ ỤMỤ MMADỤ

Chineke ekeghị anyị ka anyị na-achị onwe anyị. Baịbụl kwuru, sị: “Mmadụ enweghịkwa ikike iduzi nzọụkwụ ya mgbe ọ na-eje ije.” (Jeremaya 10:23) N’ihi ya, ọchịchị ụmụ mmadụ enweghị ike ime ka agha kwụsị kpamkpam.

SETAN NA NDỊ MMỤỌ ỌJỌỌ YA

Baịbụl mere ka anyị mata na “ụwa niile dị n’aka ajọ onye ahụ.” (1 Jọn 5:19) Ọ bụ Setan bụ́ Ekwensu bụ “ajọ onye ahụ,” ọ bụkwa ogbu mmadụ. (Jọn 8:44) Ọ bụ ya na ndị mmụọ ọjọọ ya anyị na-anaghị ahụ anya na-eme ka ịlụ agha gụwa ndị mmadụ agụụ.​—Mkpughe 12:9, 12.