Obi Sie Gị Ike na Jehova Ga-akasi Gị Obi

1. Kọwaa otú ihe si dịrị ndị Juu a dọọrọ n’agha laa Babịlọn.

CHEGODỊ otú obi dị ndị Juu a dọọrọ n’agha laa Babịlọn. Ha hụrụ ka e bibiri obodo ha. N’ihi mmehie ha na nke ndị nna nna ha, e si n’obodo ha dọrọ ha n’agha laa n’obodo ha na-amaghị. (2 Ihe 36:15, 16, 20, 21) N’eziokwu, e nwere ihe ụfọdụ a hapụrụ ha ka ha na-eme na Babịlọn. (Jere. 29:4-7) Ma, ihe adịghịrị ha mfe, ọ bụghịkwa ebe ahụ ka ha chọrọ ibi. Olee otú obi dị ha maka otú ihe si dịrị ha? Otu n’ime ha kwuru, sị: “Anyị nọdụrụ ala n’akụkụ osimiri ndị dị na Babịlọn. Anyị bere ákwá mgbe anyị chetara Zayọn.” (Ọma 137:1) E kwesịrị ịkasi ndị ahụ a dọọrọ n’agha obi. Ma, ònye ga-akasi ha obi?

2-3. (a) Gịnị ka Jehova meere ndị Juu a dọọrọ n’agha laa Babịlọn? (b) Gịnị ka anyị ga-ekwu gbasara ya n’isiokwu a?

² Jehova bụ “Chineke nke na-akasi ndị mmadụ obi n’ụdị ọnọdụ niile ha nọ.” (2 Kọr. 1:3) Jehova hụrụ ndị na-efe ya n’anya, chọọkwa ịkasi ha obi. Ọ ma na ụfọdụ n’ime ndị ahụ a dọọrọ n’agha ga-akwa mmakwaara maka nnupụisi ha, fewekwa ya otú ọ chọrọ. (Aịza. 59:20) N’ihi ya, ihe karịrị otu narị (100) afọ tupu a dọrọ ha n’agha, o ji mmụọ nsọ ya mee ka Aịzaya onye amụma dee akwụkwọ Aịzaya. Olee uru akwụkwọ ahụ ga-abara ha? Aịzaya sịrị: “Chineke unu kwuru, sị: ‘Kasienụ ndị m obi. Kasienụ ha obi.’” (Aịza. 40:1) N’eziokwu, Jehova si n’akwụkwọ Aịzaya kwuo ihe ga-akasi ndị Juu a dọọrọ n’agha obi.

³ Mgbe ụfọdụ, e kwesịkwara ịkasi anyị obi otú ahụ a kasiri ndị Juu a dọọrọ n’agha. N’isiokwu a, anyị ga-eleba anya n’ụzọ atọ Jehova si kasie ndị Juu a dọọrọ n’agha obi. (1) O kwere nkwa ịgbaghara ndị chegharịrịnụ. (2) O mere ka ndị ya nwee olileanya. (3) O nyekwaara ha aka ka ha kwụsị ịtụ ụjọ. Ka anyị na-eleba anya n’ihe ndị a, chọpụta otú ihe ndị Jehova gwara ha ga-esi kasie anyị obi taa.

JEHOVA JI OBI EBERE NA-AGBAGHARA ANYỊ

4. Olee otú Jehova si gosi na ọ bụ Chineke na-eme ebere? (Aịzaya 55:7)

⁴ Jehova bụ “Nna na-emetere ndị mmadụ ebere.” (2 Kọr. 1:3) O gosiri àgwà a mgbe o kwere ndị Juu a dọọrọ n’agha nkwa na ọ ga-agbaghara ha ma ha chegharịa. (Gụọ Aịzaya 55:7.) Ọ sịrị: “M ga-emere gị ebere maka na m ga-ahụ gị n’anya ruo mgbe ebighị ebi.” (Aịza. 54:8) Olee otú Jehova ga-esi meere ha ebere? Ọ bụ eziokwu na ndị Juu ga-ata ahụhụ mmehie ha, ma Jehova kwere nkwa na ha agaghị anọ na Babịlọn ruo mgbe ebighị ebi. Ha ga-anọru naanị oge a kara aka. (Aịza. 40:2) Ọ ga-abụrịrị na okwu a kasiri ndị Juu chegharịrịnụ ezigbo obi, meekwa ka obi sie ha ike.

5. Gịnị mere obi ji kwesị isi anyị ike karịa otú o siri ndị Juu a dọọrọ n’agha laa Babịlọn na Jehova na-agbaghara anyị mmehie anyị?

⁵ Gịnị ka anyị na-amụta? Jehova dị njikere ịgbaghara ndị ohu ya mmehie ha kpamkpam. Taa, obi kwesịrị isi anyị ike karịa ndị Juu a dọọrọ n’agha laa Babịlọn na Jehova ga-agbaghara anyị. N’ihi gịnị? N’ihi na anyị ma ihe Jehova mere ka o nwee ike ịgbaghara mmehie anyị. Mgbe ọtụtụ narị afọ gachara Aịzaya buru amụma ahụ, Jehova zitere Ọkpara ya ọ hụrụ n’anya ka ọ bịa n’ụwa were ndụ ya chụọ àjà maka ndị mmehie niile chegharịrịnụ. Ọ bụ àjà ahụ Jizọs chụrụ mere Jehova ga-eji “hichapụ” mmehie anyị, ya bụ, gbaghara anyị mmehie anyị kpamkpam. (Ọrụ 3:19; Aịza. 1:18; Efe. 1:7) N’eziokwu, Jehova bụ Chineke na-eme ebere.

6. Gịnị mere iche gbasara otú Jehova si agbaghara anyị ji akasi anyị obi? (Kọwaakwa foto.)

⁶ Ihe e kwuru n’Aịzaya 55:7 ga-akasi anyị obi ma obi na-ama anyị ikpe maka ihe anyị mejọrọ. Obi ka nwere ike ịna-ama ụfọdụ n’ime anyị ikpe maka mmehie ha mere n’oge gara aga ha hapụrụla, karịchaa ma ọ bụrụ na ha ka na-ata ahụhụ mmehie ahụ. Ma, ọ bụrụ na anyị ekwupụtala mmehie ahụ ma gbanwee, obi kwesịrị isi anyị ike na Jehova agbagharala anyị. Ọ bụrụkwa na Jehova agbaghara anyị, ọ na-echefu mmehie ahụ anyị mere. (I nwere ike ịtụle Jeremaya 31:34.) N’ihi ya, ọ bụrụ na Jehova anaghịzi eche gbasara mmehie ndị anyị mere n’oge gara aga, anyị ekwesịghịkwa ịnọ na-eche gbasara ha. Ihe dị Jehova mkpa bụ ihe anyị na-eme ugbu a, ọ bụghị ihe anyị mejọrọ n’oge gara aga. (Ezik. 33:14-16) N’oge na-adịghị anya, Jehova bụ́ Nna anyị nke na-emetere ndị mmadụ ebere ga-ewepụ ahụhụ niile mmehie anyị mere kpataara anyị kpamkpam.

7. Gịnị nwere ike inyere anyị aka ịgakwuru ndị okenye ma ọ bụrụ na anyị mere mmehie dị oké njọ?

⁷ Gịnị ka anyị kwesịrị ime ma ọ bụrụ na obi na-ama anyị ikpe maka na anyị mere mmehie dị oké njọ ma na-agbalị izochiri ya ndị ọzọ? Baịbụl gwara anyị ka anyị gwa ndị okenye ka ha nyere anyị aka. (Jems 5:14, 15) Ma, o nwere ike ọ gaghị adịrị anyị mfe ịgwa ha ihe anyị mere. Ihe ga-enyere anyị aka ịgakwuru ndị okenye bụ ma ọ bụrụ na anyị echegharịala nakwa ma anyị cheta na Jehova na ụmụ nwoke ndị ahụ ọ họpụtara ka ha nyere anyị aka hụrụ anyị n’anya, nakwa na ha ga-emere anyị ebere. Legodị otú ebere Jehova si kasie otu nwanna aha ya bụ Arthur obi.a Obi ya nọ na-ama ya ezigbo ikpe n’ihi ihe o mere. Ọ sịrị: “M nọ na-ele ndị gba ọtọ ruo ihe dị ka otu afọ. Ma, mgbe m gechara otu okwu e kwuru gbasara akọnuche, m gwara nwunye m na ndị okenye ihe ọjọọ a m nọ na-eme. Mgbe m gwachara ha, obi bịara ruo m ala. Mana ihe ahụ m mere ka nọkwa na-ewute m. Ndị okenye gwara m na Jehova ajụbeghị m, na ọ na-agbazi anyị n’ihi na ọ hụrụ anyị n’anya. Okwu ha gwara m ruru m n’obi, nyekwara m aka ịmata na Jehova agbagharala m.” Taa, Nwanna Arthur bụ ọsụ ụzọ oge niile na ohu na-eje ozi. Obi na-adị anyị ezigbo ụtọ ịmata na ọ bụrụhaala na anyị echegharịa ná mmehie anyị, Jehova dị njikere ịgbaghara anyị.

JEHOVA NA-EME KA ANYỊ NWEE OLILEANYA

8. (a) Olee olileanya Jehova mere ka ndị Juu a dọọrọ n’agha laa Babịlọn nwee? (b) Dị ka e kwuru n’Aịzaya 40:29-31, olee otú obi ga-adị ndị Juu chegharịrịnụ maka olileanya Jehova mere ka ha nwee?

⁸ E lewe ya anya otú mmadụ si ele ihe anya, ndị Juu ahụ a dọọrọ n’agha enweghị ike ịlaghachi n’obodo ha. Ihe e ji mara ndị Babịlọn bụ na ha anaghị ahapụ ndị ọ bụla ha dọọrọ n’agha ka ha laa. (Aịza. 14:17) Ma Jehova mere ka ndị ya nwee olileanya. O kwere nkwa na ọ ga-eme ka ha nwere onwe ha nakwa na e nweghị ihe ga-akwụsịli ya ime otú ahụ. (Aịza. 44:26; 55:12) N’anya Jehova, ndị Babịlọn dị ka uzuzu. (Aịza. 40:15) Obere ikuku kusa uzuzu, ya efuo. Ọ bụ otú ahụ ka ọ ga-adịrị Jehova mfe ịnapụta ndị ya n’aka ndị Babịlọn. Olee otú olileanya a ga-esi nyere ndị Juu ahụ aka? Ọ ga-akasi ha obi. Ma, e nwere ihe ọzọ ọ ga-emere ha. Aịzaya sịrị: “Ndị nwere olileanya na Jehova ga-enyere ha aka ga-enwetaghachi ike.” (Gụọ Aịzaya 40:29-31.) N’eziokwu, olileanya ga-eme ka ha nwee ike. “Ha ga-efeli elu ka à ga-asị na ha nwere nku ka ugo.”

9. Gịnị mere ndị Juu a dọọrọ n’agha ji kwesị ịtụkwasị nkwa Jehova obi?

⁹ Jehova mekwara ka ndị Juu ahụ a dọọrọ n’agha hụ ihe mere ha ga-eji tụkwasị nkwa ya obi. Gịnị ka o mere? Chegodị gbasara amụma ndị ha ma mezurulanụ. Dị ka ihe atụ, ha ma na ndị Asiria meriri ebo iri nke Izrel, dọrọkwa ha n’agha. (Aịza. 8:4) Ha hụrụ mgbe ndị Babịlọn bibiri Jeruselem ma dọrọ ndị bi na ya n’agha. (Aịza. 39:5-7) Ha ma na eze Babịlọn rụkpọrọ Eze Zedekaya anya, kpụrụkwa ya laa Babịlọn. (Jere. 39:7; Ezik. 12:12, 13) Ihe niile Jehova gwara ha mezuru. (Aịza. 42:9; 46:10) O doro anya na ihe ndị a niile mere ka obi sie ha ike na Jehova ga-anapụta ha n’aka ndị Babịlọn otú o kwere ha ná nkwa.

10. Gịnị ga-eme ka olileanya anyị na-esikwu ike n’oge ikpeazụ a?

¹⁰ Gịnị ka anyị na-amụta? Mgbe ọ bụla obi dara anyị mbà, nkwa ndị Jehova kwere maka ọdịnihu nwere ike ịkasi anyị obi, meekwa ka anyị nwee ume. Anyị bi n’oge tara ezigbo akpụ. E nwekwara ndị iro siri ezigbo ike na-emegide anyị. Ma, anyị ekwesịghị ịda mbà. Jehova mere ka anyị nwee olileanya magburu onwe ya, ya bụ, olileanya ịdị ndụ ebighị ebi mgbe ezigbo udo ga-adị, obi eruokwa anyị ala. Anyị kwesịrị ịna-eche banyere olileanya ahụ mgbe niile. Ọ bụrụ na anyị emeghị otú ahụ, olileanya anyị ga-adị ka ebe anyị kpu enyo anya ruru unyi na-ele ebe mara ezigbo mma. Anyị agaghị na-ahụcha ebe ahụ nke ọma. Olee otú anyị ga-esi hichaa enyo anya ahụ, ya bụ, mee ka olileanya anyị sikwuo ike? Ọ bụ ịna-eche gbasara otú ihe ga-esi magbuo onwe ya n’ụwa ọhụrụ. Anyị ga na-agụ isiokwu, na-ele vidio, na-egekwa egwú ndị kwuru gbasara olileanya ahụ anyị nwere. Anyị kwesịkwara ịna-ekpe ekpere na-agwa Jehova gbasara nkwa ndị o kwere anyị ndị anyị na-atụsi anya ike ịhụ mgbe ha ga-emezu.

11. Gịnị nyeere otu nwanna nwaanyị na-arịa ọrịa ọjọọ aka inwetaghachi ike?

¹¹ Chee gbasara otú inwe olileanya si kasie otu nwanna nwaanyị aha ya bụ Joy obi, meekwa ka ọ dị ike. E nwere ọrịa ọjọọ na-arịa nwanna nwaanyị a. Ọ sịrị: “Mgbe ọ bụla m chegbuwere onwe m, m na-akọrọ Jehova otú ọ dị m nnọọ n’obi, m makwa na ọ na-aghọta m. N’oge ndị ahụ, Jehova nyere m ‘ike karịrị ike mmadụ.’” (2 Kọr. 4:7) Nwanna Nwaanyị Joy na-ejikwa uche ya na-ahụ onwe ya n’ụwa ọhụrụ, bụ́ ebe a na-enweghị ‘onye bi na ya ga-asị: “Ahụ́ adịghị m.”’ (Aịza. 33:24) Ọ bụrụkwa na anyị ana-akọrọ Jehova otú ọ dị anyị n’obi ma na-eche banyere olileanya anyị, anyị ga-enwe ike idi nsogbu anyị.

12. Olee ihe ndị mere anyị ji kwesị ịtụkwasị nkwa ndị Jehova kwere obi? (Kọwaakwa foto.)

¹² Jehova emeerela anyị ọtụtụ ihe mere anyị ga-eji tụkwasị nkwa ndị o kwere anyị obi otú ahụ o meere ndị Juu a dọọrọ n’agha laa Babịlọn. Chee gbasara amụma ndị anyị hụrụ mezurulanụ. Dị ka ihe atụ, anyị ahụla mba na-achị ụwa nke ‘sitụrụ ike n’ebe ụfọdụ, ma ghara isi ike n’ebe ụfọdụ.’ (Dan. 2:42, 43) Anyị na-anụ gbasara “ala ọma jijiji n’ebe dị iche iche,” sorokwa na-ekwusa ozi ọma ná “mba niile.” (Mat. 24:7, 14) Amụma ndị a nakwa ọtụtụ ndị ọzọ na-eme ka obi sikwuo anyị ike na nkwa ndị Jehova kwere anyị na-emezubeghị ga-emezu.

JEHOVA NA-EME KA ANYỊ GHARA ỊTỤ ỤJỌ

13. (a) Olee nsogbu ndị ga-abịara ndị Juu a dọọrọ n’agha ma oge ha ga-eji nwere onwe ha ruo? (b) Dị ka e kwuru n’Aịzaya 41:10-13, olee otú Jehova si kasie ndị Juu a dọọrọ n’agha obi?

¹³ Ọ bụ eziokwu na Jehova ji olileanya magburu onwe ya kasie ndị Juu a dọọrọ n’agha obi, ma ọ ma na e nwere nsogbu ndị ga-abịara ha mgbe a ga-eme ka ha nwere onwe ha. Jehova gwara ha na oge ahụ ruwe, e nwere otu eze ga-abịa merie obodo ndị gbara Babịlọn gburugburu, lụsokwa Babịlọn agha. (Aịza. 41:2-5) N’oge ahụ, ụjọ ò kwesịrị ịtụ ndị Juu? Jehova kasiri ndị ya obi tupu oge eruo. Ọ sịrị ha: “Atụla egwu, n’ihi na m nọnyeere gị. Echegbula onwe gị, n’ihi na abụ m Chineke gị.” (Gụọ Aịzaya 41:10-13.) Mgbe Jehova sịrị: “Abụ m Chineke gị,” gịnị ka ọ pụtara? Ọ naghị echetara ndị Juu ka ha na-efe ya, n’ihi na ha ma na ọ bụ ihe ha kwesịrị ime. Kama ọ na-echetara ha na yanwa ka nọnyeere ha.​—Ọma 118:6.

14. Olee ihe ọzọ Jehova mere iji nyere ndị Juu aka ka ha ghara ịtụ ụjọ?

¹⁴ Ihe ọzọ Jehova meere ndị Juu ka ha ghara ịtụ ụjọ bụ ichetara ha na ike ya na amamihe ya enweghị atụ. Ọ gwara ndị Juu ka ha lee kpakpando ndị dị n’eluigwe. Ọ gwara ha na ọ bụghị naanị na o kere kpakpando ndị ahụ, kama na ọ ma aha ha niile n’otu n’otu. (Aịza. 40:25-28) Ọ bụrụ na Jehova ma aha kpakpando n’otu n’otu, o doro anya na ọ ma aha ohu ya nke ọ bụla. Ebe ọ bụ na Jehova nwere ike o ji kee kpakpando ndị ahụ, o doro anya na ọ ga-enyeliri ndị ya aka. N’eziokwu, e nweghị ihe kwesịrị ime ka ndị Juu ahụ a dọọrọ n’agha tụọ ụjọ ma ọ bụ chegbuwe onwe ha.

15. Olee otú Jehova si kwadebe ndị Juu a dọọrọ n’agha maka ihe ga-eme n’ọdịnihu?

¹⁵ Jehova kwadebekwara ndị ya maka ihe ndị ga-eme n’ọdịnihu. N’akwụkwọ Aịzaya, Jehova ebula ụzọ gwa ndị ya, sị: “Gaanụ banye n’ọnụ ụlọ unu dị n’ime, mechiekwanụ ọnụ ụzọ mgbe unu banyechara. Zoonụ nwa mgbe nta, ruo mgbe Chineke wechara iwe.” (Aịza. 26:20) O nwere ike ịbụ na ndị Juu mere ihe a mgbe Eze Saịrọs bịara ịlụso Babịlọn ọgụ. Otu onye Grik na-akọ ihe ndị mere n’oge ochie kwuru na mgbe Saịrọs batara Babịlọn, o “nyere [ndị agha ya] iwu ka ha gbuo ndị niile ha hụrụ n’èzí.” Chegodị otú ụjọ si jide ndị bi na Babịlọn n’oge ahụ. Ma, o nwere ike ịbụ na e gbughị ndị Juu a dọọrọ n’agha n’oge ahụ n’ihi na ha rubeere Jehova isi.

16. Gịnị mere na anyị ekwesịghị ịna-echegbu onwe anyị maka ihe ndị ga-eme n’ọdịnihu? (Kọwaakwa foto.)

¹⁶ Gịnị ka anyị na-amụta? N’oge na-adịghị anya, oké mkpagbu ga-amalite. Ọ ga-abụkwa oge kacha njọ kemgbe ụwa malitere. Ọ bụrụ na ọ malite, ọtụtụ ndị agaghị ama ihe ha ga-eme eme, ezigbo ụjọ ga-ejidekwa ha. Ma, ọ bụghị otú ọ ga-adị ndị Jehova. Anyị ma na Jehova bụ Chineke anyị. Obi ga-esi anyị ike n’ihi na anyị ma na ‘oge Chineke ga-anapụta anyị eruola nso.’ (Luk 21:28) Ọ bụrụgodị mgbe ọtụtụ mba ga-agbakọ aka ọnụ lụso anyị agha, anyị ga-atụkwasịkwa Jehova obi. Jehova ga-eji ndị mmụọ ozi ya chebe anyị. Ọ ga-enyekwa anyị ntụziaka ga-azọ anyị ndụ. Olee otú ọ ga-esi enye anyị ya? Anyị amabeghị. Ma, o nwere ike ịbụ na anyị ga-esi n’ọgbakọ anyị dị iche iche nweta ya. O nwere ike ịbụ ọgbakọ ndị ahụ ga-abụ ‘ọnụ ụlọ anyị dị n’ime’ ebe a ga-echebe anyị. Olee otú anyị nwere ike isi kwadebe maka ihe ndị ga-eme n’ọdịnihu? Anyị na ụmụnna anyị kwesịrị ịna-adị ná mma, anyị adịrị njikere irubere ntụziaka ọ bụla si n’aka nzukọ Jehova isi, obi esiekwa anyị ike na ọ bụ Jehova na-eduzi nzukọ a anyị nọ na ya.​—Hib. 10:24, 25; 13:17.

17. Gịnị ka ị ga-eme ka Jehova kasie gị obi?

¹⁷ Ọ bụ eziokwu na ọ dịghịrị ndị Juu a dọọrọ n’agha laa Babịlọn mfe, ma Jehova kasiri ha obi. Ọ ga-akasikwa anyị obi. N’ihi ya, n’agbanyeghị ihe echi ga-abụ, akwụsịla ịtụkwasị Jehova obi na ọ ga-akasi gị obi. Ka obi sie gị ike na ọ na-agbaghara ndị ohu ya. Ọ hụkwara gị n’anya. Akwụsịla inwe olileanya. Cheta na ebe ọ bụ na Jehova bụ Chineke gị, e nweghị ihe kwesịrị ime ka ị tụọ ụjọ.