Isiokwu Afọ 2013

N’ihe karịrị puku afọ atọ na narị afọ anọ gara aga, ọ fọrọ ntakịrị ka ndị Izrel banye n’Ala Nkwa ahụ. Ma, tupu ha abanye na ya, ha ga-agafe ọtụtụ obodo ndị iro ha. N’ihi ya, Chineke gwara Jọshụa ka o ‘nwee obi ike, ma dị ike.’ Ọ bụrụ na Jọshụa anọgide na-erubere Chineke isi, ọ ga-emeri ndị iro ha. Chineke gwakwara ya ka ọ ghara ‘ịma jijiji ma ọ bụ tụọ ụjọ, n’ihi na Jehova bụ́ Chineke ya nọnyeere ya ebe ọ bụla ọ na-aga.’ N’eziokwu, Chineke nọnyeere ya n’ihi na o were ndị Izrel naanị afọ isii iji merie ndị iro ha.—Jọsh. 1:7-9.

Ọ fọkwara ntakịrị ka ezigbo Ndị Kraịst banye n’ụwa ọhụrụ Chineke kwere ha ná nkwa. N’ihi ya, ọ dị mkpa ka anyị nwee obi ike ma dị ike. Otú ahụ Jọshụa nwere ndị iro, anyịnwa nwekwara ndị iro na-agbalị ime ka anyị kwụsị ife Chineke. Agha anyị na-alụ abụghị agha e ji mma na ube alụ. Ngwá agha anyị abụghịkwa ngwá agha nkịtị. Ọ bụ Jehova na-akụziri anyị otú anyị ga-esi jiri ngwá agha ndị a na-alụ agha. Ma ihe ọ̀ dịịrị gị mma ma ihe ò siiri gị ike, mara na ọ bụrụhaala na i nwee obi ike, dịkwa ike, ma na-eme ihe Jehova na-achọ, ọ ga-anọnyere gị. Ọ ga-emekwa ka i nwee mmeri.