Joshụa 1:9​—‘Nwee Obi Ike, Dịkwa Ike’

“Ọ̀ bụ na mụ agwabeghị gị ka i nwee obi ike, ka ị dịkwa ike? Amala jijiji, atụkwala ụjọ, n’ihi na Jehova bụ́ Chineke gị nọnyeere gị ebe ọ bụla ị na-aga.”​—Joshụa 1:​9, Baịbụl Nsọ nke Nsụgharị Ụwa Ọhụrụ.

“Ọ bụ na m agwabeghị gị kwụrụ chịm, ka obi sie gị ike? Ya mere, egwu atụla gị, obi alọla gị mmiri n’ihina Osebụrụwa Chineke gị nọnyere gị ebe ọbụla ị ga-aga.”​—Joshụa 1:​9, Baịbụl Nsọ: Nhazi Katọlik.

Ihe Joshụa 1:9 Pụtara

Jehovaa gwara ohu ya kwesịrị ntụkwasị obi bụ́ Joshụa ihe a iji mee ka obi sie ya ike na ‘ọ ga-enweli obi ike, ma dị ike’ n’agbanyeghị nsogbu ọ bụla bịaara ya. Ọ bụrụ na Joshụa erubere Jehova isi, o kwesịghị ịtụwa ụjọ ihe echi ga-abụ n’ihi na ọ ma na Jehova ga-anọnyere ya, nyekwara ya aka. Chineke kụziiri Joshụa ihe, nyekwara ya aka imeri ndị iro ya, si otú ahụ gosi na ọ nọnyeere ya.

Olee otú Joshụa ga-esi ‘nwee obi ike ma dị ike’? Okwu Chineke e nwere n’oge ahụ nwere ike inyere ya aka inwe obi ike ma dị ike. Otu n’ime ha bụ “ihe niile dị n’Iwu Mosis ohu [Jehova] nyere [Joshụa].”b (Joshụa 1:7) Jehova gwara Joshụa ka “ọ na-agụ ya ma na-atụgharị uche na ya ehihie na abalị.” (Joshụa 1:8) Ịgụ Baịbụl na ịtụgharị uche na ya nyeere Joshụa aka ikpebisi ike ịna-eme uche Chineke. Joshụa kwesịkwara ịna-eme ihe ọ na-amụta n’Okwu Chineke, ya bụ, ‘ilezi anya na-eme ihe niile e dere na ya.’ Ọ bụrụ na o mee ihe a, ihe ga na-agaziri ya, ya ana-akpakwa àgwà onye ma ihe. Ọ bụkwa ihe a bụ ihe merenụ. N’agbanyeghị na e nwere oge ndị ihe siiri Joshụa ike, ndụ ya juru ya afọ, ya emeekwa ihe dị Jehova mma.​—Joshụa 23:14; 24:15.

Ihe ahụ Jehova gwara Joshụa ka na-abakwara anyị uru taa. O gosiri otú Jehova hụruru ndị niile na-efe ya n’anya n’agbanyeghị nsogbu ọ bụla nwere ike ịbịara ha. Ọ chọrọ ka ihe na-agaziri ha otú ahụ ọ gaziiri Joshụa. Ha nwekwara ike inwe obi ike ma dị ike ka Joshụa ma ọ bụrụ na ha ana-agụ Okwu Chineke kwa ụbọchị, na-atụgharị uche na ya, na-emekwa ihe ndị ha mụtara na ya.

Ihe Ndị Gbara Joshụa 1:9 Gburugburu

Mgbe Mosis nwụchara, Jehova gwara Joshụa na ọ bụzi ya ga na-edu ndị Izrel. (Joshụa 1:​1, 2) N’oge ahụ, ndị Izrel na-ejikere ịbanye n’Ala Nkwa, ya bụ, ala Kenan. Ma ha ga-alụso ndị iro ha siri ezigbo ike agha. Dị ka ihe atụ, Joshụa lụsoro ndị Kenan obi tara mmiri agha.c (Diuterọnọmi 9:5; 20:​17, 18) Ndị Kenan dị ọtụtụ karịa ndị Izrel, nweekwa ngwá agha dị iche iche karịa ha. (Joshụa 9:​1, 2; 17:18) Ma Joshụa katara obi mee ihe niile Jehova gwara ya. Chineke nọnyekwaara ya. N’ihi ya, ndị Izrel meriri ọtụtụ ndị iro ha naanị n’ime afọ isii.​—Joshụa 21:​43, 44.