“Olee Otú Ha Ga-esi Anụ?”
1 Jizọs kwuru hoo haa, sị: “A ghaghị ibu ụzọ kwusaa ozi ọma ahụ ná mba nile.” (Mak 13:10) N’agbanyeghị mgbalị anyị ji ịdị uchu na-eme, a ka nwere ọtụtụ narị nde mmadụ a na-agbabeereghị àmà. Gọọmenti ụfọdụ machibidoro ọrụ anyị iwu. Ọtụtụ ala nwere ụba mmadụ na-amụba amụba n’ụzọ dị ngwa. N’ihi ya, “olee otú ha ga-esi anụ?”—Rom 10:14.
2 Nwee Obi Ike n’Ebe Jehova Nọ: Anyị aghaghị icheta na Jehova maara ọnọdụ uche nke mmadụ nile. Ihe ọ sọrọ ya bụrụ ọnọdụ mmadụ, ọ bụrụ na o jiri ezi obi chọọ eziokwu banyere Chineke, ọ ga-achọta ya.—1 Ihe 28:9.
3 Ebreham nwere nchegbu banyere ndị bi na Sọdọm na Gọmọra. Ma Chineke mesiri ya obi ike na a gaghị ebibi Sọdọm ma ọ bụrụ na a hụ nanị ndị ezi omume iri n’ebe ahụ. (Jen. 18:20, 23, 25, 32) Ọ dịtụbeghị mgbe Jehova bibikọtara ndị ajọ omume na ndị ezi omume, dị ka nnapụta ọ napụtara Lọt na ụmụ ya ndị inyom gosiri.—2 Pita 2:6-9.
4 N’otu oge, Elaịja chere na ya nọ nanị ya n’ife Chineke. Otú ọ dị, Jehova mesiri ya obi ike na ọ nọghị nanị ya ma ọlị nakwa na ọ ga-arụzu ọrụ ọ maliteworo. (1 Eze 19:14-18) Gịnị banyere ọnọdụ e nwere n’oge anyị?
5 Jiri Ọrụ n’Aka n’Ozi Chineke: Anyị amaghị ókè a ka ga-arụru ọrụ ịgba àmà ahụ. Ọ bụ Jehova ka ọrụ a dị n’aka, ọ na-ejikwa ndị mmụọ ozi ya elekọta ya. (Mkpu. 14:6, 7) Ọ bụ ya ga-ekpebi ókè a ga-agbaru àmà a ná mba nile. Ọ bụrụ na Jehova achọọ, ọ pụrụ ịhụ na a gbasara ozi Alaeze ahụ n’ụzọ ndị anyị na-apụtụghị ichetụ n’echiche ka ọtụtụ ndị ọzọ wee nwee ike ‘ịnụ okwu nke ozi ọma ma kwere.’ (Ọrụ 15:7) Ihe Jehova ga-eme ga-ekwekọ n’ụzọ zuru ezu n’ụdị onye ọ bụ—Chineke na-ahụ n’anya, onye maara ihe, ma na-ekpe ikpe ziri ezi.
6 Ọ bụ ihe ùgwù nye anyị ịrụ ọrụ n’ụzọ kwekọrọ n’uche Jehova, na-eme ihe nile anyị pụrụ ime iji mee ka mmadụ nile nụ ozi ọma ahụ.—1 Kọr. 9:16.