Gịnị Na-eme Anyị ma Anyị Nwụọ?

È nwetụla onye ị hụrụ n’anya nwụrụ? O nwere ike ịbụ na obi gbawara gị n’oge ahụ, gị ana-eche, sị: ‘Gịnị na-eme anyị ma anyị nwụọ? È nwere mgbe anyị ga-ahụ ndị nke anyị nwụrụ anwụ ọzọ?’ Chọpụta otú na-akasi obi Baịbụl si zaa ajụjụ ndị a n’isiokwu a na nke na-eso ya.

1. Gịnị na-eme anyị ma anyị nwụọ?

Jizọs ji ọnwụ tụnyere oké ụra. Onye nọ n’oké ụra anaghị ama ihe na-eme gburugburu ya. Olee otú ọnwụ si yie ụra? Mmadụ nwụọ, ọ naghịzi ama ihe bụ́ ahụ́ ụfụ. Owu anaghịkwa ama ya n’agbanyeghị otú o si hụ ndị enyi ya na ndị ikwu ya n’anya. Baịbụl sịrị na “ndị nwụrụ anwụ amaghị ihe ọ bụla.”​—Gụọ Ekliziastis 9:5.

2. Olee uru ịma nke bụ́ eziokwu gbasara ndị nwụrụ nwụrụ ga-abara anyị?

Ọtụtụ ndị na-atụ ọnwụ ụjọ. Ha na-atụdị ndị nwụrụ anwụ ụjọ. Ma, ihe Baịbụl kwuru gbasara ọnwụ nwere ike ịkasi gị obi. Jizọs sịrị: “Eziokwu ga-emekwa ka unu nwere onwe unu.” (Jọn 8:​32) Ụfọdụ okpukpe na-akụzi na mmadụ nwụọ, mkpụrụ obi ya adịrị ndụ na-aga, ma ọ bụghị ihe Baịbụl kwuru. N’ihi ya, e nweghị onye na-atawa ahụhụ ma ọ nwụọ. Ebe ọ bụkwa na e nweghị ihe ndị nwụrụ anwụ ma, ha agaghị emeli anyị ihe ọ bụla. Ọ bụ ya mere na ime ka obi jụrụ ndị nwụrụ anwụ abaghị uru. Ife ha ofufe ma ọ bụkwanụ ikpere ha ekpere abaghịkwa uru.

Ụfọdụ na-asị na ha na ndị nwụrụ anwụ na-ekwurịta okwu. Ma, ọ gaghị ekwe omume. Dị ka anyị mụtarala, ndị nwụrụ anwụ “amaghị ihe ọ bụla.” Ndị mmụọ ọjọọ na-eme ka ọ dị ka hà bụ ndị nwụrụ anwụ. Ọ ga-abụ ha na-agwa ndị na-eche na ha na ndị ha nwụrụ anwụ na-akpa nkata okwu, ha echee na ha na ndị ha nwụrụ anwụ na-ekwurịta. N’ihi ya, ịmata ihe bụ́ eziokwu banyere ọnwụ ga-eme ka ndị mmụọ ọjọọ ghara inweta anyị. Jehova dọrọ anyị aka ná ntị ka anyị ghara ịchọ otú anyị na ndị nwụrụ anwụ ga-esi kwurịta okwu maka na ọ ma na anyị na ndị mmụọ ọjọọ ikwurịta okwu ga-akpatara anyị nsogbu.​—Gụọ Diuterọnọmi 18:​10-​12.

3. Chọpụta ihe na-eme mmadụ n’eziokwu ma ọ nwụọ

N’ebe dị iche iche n’ụwa, e nwegasịrị ihe ndị mmadụ kweere gbasara ihe na-eme mmadụ ma ọ nwụọ. O doro anya na ha niile agaghị abụcha eziokwu.

• N’ebe i bi, olee ihe ọtụtụ ndị kweere gbasara ndị nwụrụ anwụ?

VIDIO: Vidio si na vidio bụ́ Gịnị Na-eme Ndị Mmadụ ma Ha Nwụọ? (1:​19)

Gụọnụ Ekliziastis 3:​20. Unu gụchaa ya, unu eleba anya n’ajụjụ ndị a:

• Gịnị ka amaokwu a kwuru na-eme mmadụ ma ọ nwụọ?

• Ebe a ọ̀ sịrị na ọ na-abụ mmadụ nwụọ, mkpụrụ obi ya ma ọ bụ mmụọ ya adịrị ndụ na-aga?

Baịbụl gwara anyị ihe mere mgbe Lazarọs, bụ́ ezigbo enyi Jizọs, nwụrụ. Ka unu na-agụ Jọn 11:​11-​14, chọpụtanụ ihe Jizọs kwuru mere Lazarọs mgbe ọ nwụrụ. Unu gụchaa ya, unu eleba anya n’ajụjụ ndị a:

• Gịnị ka Jizọs ji tụnyere ọnwụ?

• Gịnị ka ihe a Jizọs ji tụnyere ọnwụ na-akụziri anyị gbasara ihe na-eme ndị nwụrụ anwụ?

• Ì chere na ihe a Baịbụl kwuru gbasara ọnwụ bụ eziokwu?

4. Ịmata eziokwu gbasara ọnwụ baara anyị uru

Anyị mata eziokwu gbasara ọnwụ, anyị agaghị na-atụ ndị nwụrụ anwụ ụjọ. Gụọnụ Ekliziastis 9:10. Unu gụchaa ya, unu eleba anya n’ajụjụ a:

• Ò nwere ihe ndị nwụrụ anwụ ga-emeli anyị?

Eziokwu dị na Baịbụl ga-eme ka anyị ghara ikweta na e kwesịrị ime ka obi jụrụ ndị nwụrụ anwụ ma ọ bụkwanụ na e kwesịrị ife ha ofufe. Gụọnụ Aịzaya 8:​19 na Mkpughe 4:​11. Unu gụchaa ha, unu eleba anya n’ajụjụ a:

• Olee otú i chere obi na-adị Jehova ma mmadụ na-efe onye nwụrụ anwụ ma ọ bụ na-achọ ka onye nwụrụ anwụ nyere ya aka?

5. Ịmata eziokwu gbasara ọnwụ na-akasi anyị obi

A na-akụziri ọtụtụ ndị na ọ bụrụ na ha nwụọ, a ga-ata ha ahụhụ maka ihe ndị ha mere n’oge ha dị ndụ. Ma anyị amatala na e nweghị onye a na-ata ahụhụ ma ọ nwụọ, ya sọkwa ya ya bụrụ onye mere mmehie dị ezigbo njọ. Ihe a na-akasi anyị obi. Gụọnụ Ndị Rom 6:7. Unu gụchaa ya, unu eleba anya n’ajụjụ a:

• Ebe ọ bụ na Baịbụl sịrị na onye nwụrụ anwụ enwerela onwe ya ná mmehie ya, ì chere na e nwere onye nwụrụ anwụ na-ata ahụhụ n’ihi mmehie o mere n’oge gara aga?

Ka anyị na-amụtakwu gbasara Jehova, ọ ga-edokwu anyị anya na o mekataghị taa ndị nwụrụ anwụ ahụhụ. Gụọnụ Diuterọnọmi 32:4 na 1 Jọn 4:8. Unu gụchaa ha, unu eleba anya n’ajụjụ ndị a:

• Ọ̀ ga na-atọ Chineke ụtọ ịta ndị nwụrụ anwụ ahụhụ ebe ọ bụkwanụ na ọ na-akpa àgwà ndị anyị gụtara n’amaokwu ndị a?

• Eziokwu ndị a dị na Baịbụl gbasara ọnwụ hà na-akasi gị obi? Maka gịnị?

NCHỊKỌTA

Onye nwụrụ anwụ enweghịzi ihe ọ ma. Ndị nwụrụ anwụ anaghị ata ahụhụ, e nweghịkwanụ ihe ha nwere ike ime ndị dị ndụ.

Ajụjụ ndị e ji echeta ihe a mụrụ

• Gịnị na-eme anyị ma anyị nwụọ?

• Olee uru ịmata eziokwu gbasara ọnwụ baara anyị?

• Olee otú ịmata eziokwu gbasara ọnwụ si akasi anyị obi?

IHE Ị GA-ELEBAKWU ANYA

Chọpụta ihe Baịbụl kwuru na “mkpụrụ obi” bụ.

“Gịnị Bụ Mkpụrụ Obi?” (Isiokwu gbara n’Ịntanet)

Chọpụta ma Chineke ọ̀ na-ata ndị ajọ omume ahụhụ n’ọkụ ala mmụọ.

Ọ̀ Bụ Eziokwu na Chineke Na-ata Ndị Ajọ Omume Ahụhụ n’Ọkụ Ala Mmụọ? (3:07)

Ànyị kwesịrị ịna-atụ ndị nwụrụ anwụ ụjọ?

Mmụọ nke Ndị Nwụrụ Anwụ ​—Hà Pụrụ Inyere Gị Aka Ka Ọ̀ Bụ Imerụ Gị Ahụ? Hà Dị Adị n’Ezie? (broshọ)

Chọpụta otú otu nwoke si mụta nke bụ́ eziokwu gbasara ihe na-eme mmadụ ma ọ nwụọ nakwa otú ihe a ọ mụtara si kasie ya obi.

“Otú Baịbụl Si Zaa M Ajụjụ M Niile Ha Edoo M Anya Tọrọ M Ezigbo Ụtọ” (Ụlọ Nche, Febụwarị 1, 2015)