Ụzọ Isi Nwee Obi Ụtọ

ANYỊ nile na-enwe mmasị inwe obi ụtọ, ọ́ bụghị ya?— Ma, ndị nwere obi ụtọ n’ezie adịghị ọtụtụ. Ị̀ ma ihe kpatara ya?— Ọ bụ n’ihi na ọtụtụ ndị amụtabeghị ụzọ isi nweta obi ụtọ. Ha chere na inwe ọtụtụ ihe bụ ụzọ e si enweta obi ụtọ. Ma mgbe ha nwetara ihe ndị a, obi ụtọ ha anaghị adịte aka.

Ka anyị hụ isi ihe dị mkpa nke na-eme ka e nwee obi ụtọ. Onye Ozizi Ukwu ahụ kwuru, sị: “A na-enwe obi ụtọ ka ukwuu n’inye ihe karịa ka a na-enwe n’ịnara ihe.” (Ọrụ 20:35) Ya mere, gịnị bụ ụzọ isi nwee obi ụtọ?— Ee, ọ bụ site n’inye ndị ọzọ ihe na site n’imere ha ihe. Ị̀ ma?—

Ka anyị chebakwuoro nke a echiche. Jizọs ọ̀ sịrị na onye e nyere onyinye agaghị enwe obi ụtọ?— Ee e, o kwughị otú ahụ. Ị na-enwe mmasị inweta onyinye, ọ̀ bụ na ị dịghị enwe?— Ọ na-amasị onye ọ bụla. Obi na-atọ anyị ụtọ mgbe anyị nwetara ihe ndị dị mma.

Ma, Jizọs kwuru na anyị ga-enweta ọbụna obi ụtọ ka ukwuu mgbe anyị nyere ihe. N’uche gị, ònye ka ị ga-asị na ọ bụ ya nyeworo ndị mmadụ ihe karịa onye ọ bụla ọzọ?— Ee, ọ bụ Jehova Chineke.

Bible na-ekwu na Chineke “na-enye mmadụ nile ndụ na ume na ihe nile.” Ọ na-enye anyị mmiri ozuzo site n’eluigwe nakwa anwụ, ka ihe ọkụkụ wee na-eto, ka anyị nweekwa nri anyị ga-eri. (Ọrụ 14:17; 17:25) Ka a sịkwa ihe mere Bible ji kpọọ Jehova “Chineke onye obi ụtọ”! (1 Timoti 1:11) Inye ndị ọzọ ihe bụ otu n’ime ihe ndị na-enye Chineke obi ụtọ. Mgbe anyị nyekwara ndị ọzọ ihe, ọ pụkwara ime ka anyị nwee obi ụtọ.

Ma, olee ihe ndị anyị pụrụ inye ndị ọzọ? Olee ihe i chere?— Mgbe ụfọdụ, onyinye na-efu ego. Ọ bụrụ na ọ bụ onyinye ị zụtara n’ụlọ ahịa, ị ga-akwụ ụgwọ ya. Ya mere, ọ bụrụ na ị chọrọ inye mmadụ ụdị onyinye ahụ, ọ pụrụ ịdị mkpa na ị ga na-edokọ ego ruo mgbe i nwetara ego ga-ezuru gị iji zụta onyinye ahụ.

Ma, ọ bụghị onyinye nile ka a na-azụta azụta. Dị ka ihe atụ, n’ụbọchị anwụ na-achasi ike, otu iko mmiri jụrụ oyi na-eme n’ezie ka ahụ́ jụọ mmadụ oyi. Ya mere, mgbe i nyere onye akpịrị na-akpọ nkụ onyinye dị otú ahụ, ị pụrụ inweta obi ụtọ ahụ nke na-abịa site n’inye ihe.

Otu ụbọchị ma eleghị anya, gị na nne gị nwere ike isi ezigbo nri. Nke ahụ ga-abụ ihe na-enye obi ụtọ. Ma, olee ihe i nwere ike iji ụfọdụ n’ime nri ahụ mee bụ́ nke ga-eme ka i nwee obi ụtọ ọbụna karịa nanị gị iricha nri ahụ nile?— Ee, ị pụrụ inyetụ otu n’ime ndị enyi gị ụfọdụ n’ime nri ahụ. Ị̀ ga-eme ya otu ụbọchị?—

Onye Ozizi Ukwu ahụ na ndịozi ya ma obi ụtọ a na-enweta site n’inye ihe. Ị̀ ma ihe ha nyere ndị ọzọ?— Ọ bụ ihe kasị mma n’ụwa! Ha ma eziokwu banyere Chineke, ha jikwa obi ụtọ soro ndị ọzọ kerịta ozi ọma a. Ha mere nke a n’ekweghị ka onye ọ bụla nye ha ego maka ihe ha nyere ha.

Otu ụbọchị, Pọl onyeozi na ezigbo enyi ya, bụ́ Luk onye na-eso ụzọ, zutere otu nwanyị nke chọkwara inweta obi ụtọ nke na-abịa site n’inye ihe. Ha zutere ya na ndịda otu osimiri. Pọl na Luk gara ebe ahụ n’ihi na ha nụrụ na ọ bụ ebe a na-ekpe ekpere. N’eziokwu kwa, mgbe ha ruru, ha hụrụ ụfọdụ ndị inyom ka ha na-ekpe ekpere.

Pọl malitere izi ụmụ nwanyị ndị a ozi ọma banyere Jehova Chineke na Alaeze ya. Aha otu n’ime ha bụ Lidia, o gekwara ntị nke ọma. Mgbe e mesịrị, Lidia chọrọ ime ihe iji gosi na oziọma ahụ ọ nụrụ masịrị ya. Ya mere, ọ rụgidere Pọl na Luk, sị: “Ọ bụrụ na unu ewerewo m dị ka onye na-ekwesị ntụkwasị obi nye Jehova, batanụ n’ime ụlọ m nọrọ.” O mekwara ka ha bịa n’ụlọ ya.—Ọrụ 16:13-15.

Lidia nwere obi ụtọ na ndị ohu Chineke ndị a bịara n’ụlọ ya. O nwere ịhụnanya n’ebe ha nọ n’ihi na ha nyeere ya aka ịmụta banyere Jehova na Jizọs nakwa otú ndị mmadụ pụrụ isi dị ndụ ruo mgbe ebighị ebi. O nwere obi ụtọ na ya nyere Pọl na Luk ihe oriri ka ha rie, nyekwa ha ebe ha ga-anọ zuo ike. Ya mere, Lidia nwetara obi ụtọ site n’ihe o nyere n’ihi na ọ chọrọ n’ezie inye ihe. Nke ahụ bụ ihe anyị kwesịrị ịdị na-echeta. Mmadụ pụrụ ịgwa anyị na anyị aghaghị inye onyinye. Ma, ọ bụrụ na anyị achọghị ime ya n’ezie, inye ihe ahụ agaghị eme ka anyị nwee obi ụtọ.

Dị ka ihe atụ, ọ bụrụkwanụ na i nwere swiiti ụfọdụ ị chọrọ ịracha? Ọ bụrụ na m gwa gị ka i nyetụ nwatakịrị ọzọ ụfọdụ n’ime ha, ị̀ ga-enwe obi ụtọ inyetụ ya?— Ma, ọ bụrụkwanụ na i ji swiiti ụfọdụ mgbe i zutere enyi gị ị hụrụ n’anya nke ukwuu? Ọ bụrụ na i kpebie n’onwe gị inyetụ enyi gị, nke ahụ ọ́ gaghị eme ka i nwee obi ụtọ?—

Mgbe ụfọdụ, anyị na-ahụ mmadụ n’anya nke ukwuu nke na anyị na-achọ inye ya ihe nile n’edebeghị ụfọdụ maka onwe anyị. Ka ịhụnanya anyị nwere n’ebe Chineke nọ na-ebukwu ibu, otú ahụ ka o kwesịrị ịdị na-adị anyị n’ebe Ọ nọ.

Onye Ozizi Ukwu ahụ ma otu nwanyị dara ogbenye, onye ọ dị otú ahụ. Ọ hụrụ nwanyị ahụ n’ụlọ nsọ dị na Jeruselem. Nwanyị ahụ nwere nanị ntakịrị mkpụrụ ego abụọ; ọ gwụla ihe o nwere. Ma nwanyị ahụ tụnyere ha abụọ n’ime igbe dị ka onyinye maka ụlọ nsọ ahụ. Ọ dịghị onye manyere ya ime ya. Ihe ka n’ọnụ ọgụgụ ná ndị nọ n’ebe ahụ amadịghị ihe o mere. O mere ya n’ihi na ọ chọrọ ime ya nakwa n’ihi na ọ hụrụ Jehova n’anya n’ezie. O nyere ya obi ụtọ dị ukwuu na o nwere ike inye ihe.—Luk 21:1-4.

E nwere ọtụtụ ụzọ anyị pụrụ isi nye ihe. Ị̀ pụrụ icheta ụfọdụ n’ime ha?— Ọ bụrụ na anyị na-enye ihe n’ihi na anyị chọrọ n’ezie inye ihe, anyị ga-enwe obi ụtọ. Ọ bụ ya mere Onye Ozizi Ukwu ahụ ji na-agwa anyị, sị: “Na-enyenụ ihe.” (Luk 6:38) Ọ bụrụ na anyị na-enye ihe, anyị ga na-eme ka obi na-atọ ndị ọzọ ụtọ. Anyị ga-abụkwa ndị nwere obi ụtọ karịsịa!