Gosi Ndị Ọzọ Na Ị hụrụ Ha n’Anya

Nsogbu Egosighị Ndị Ọzọ na Ị Hụrụ Ha n’Anya Nwere Ike Ịkpata

Ọ naghị adịrị ndị kpọrọ ndị ọzọ asị mfe ịkwụsị ịkpọ ha asị. Onye na-arịa ọrịa na-agba mbọ tupu ọrịa ya akwụsị, ọ na-ewekwa oge. Otú ahụ ka ọ dịkwa onye kpọrọ ndị ọzọ asị. Ọ na-agba mbọ tupu ya akwụsị ya, ọ na-ewekwa oge. Gịnị ka i nwere ike ime iji wepụ ịkpọasị n’obi gị?

Amaokwu Baịbụl Ga-enyere Gị Aka

Foto ndị na-egosi: 1. Ebe otu nwoke onye Eshia na-emepere otu nwoke onye ojii bu kọfị ụzọ. 2. Ebe nwoke onye ojii ahụ na-ebunye ndị ha na ya na-arụkọ ọrụ kọfị, ma nwaanyị onye India ahụ e kwuburu gbasara ya.

“Yirinụ ịhụnanya dị ka uwe, n’ihi na ọ bụ ihe nkekọ zuru okè nke ịdị n’otu.”—NDỊ KỌLỌSI 3:14.

Olee ihe amaokwu a na-akụziri anyị? Imere ndị ọzọ ihe ọma na-eme ka anyị na ha dị n’otu. Ọ bụrụ na gị ana-emere ndị ọzọ ihe ọma, ị ga-eji nwayọọ nwayọọ kwụsị ịkpọ ha asị. Ị na-ahụkwu ndị ọzọ n’anya, ị gaghịzi akpọ ha asị n’obi gị ma ọ bụ na-ele ha anya ka ndị na-enweghị ihe ha bụ.

Ihe I Nwere Ike Ime

Foto ndị na-egosi: 1. Ebe otu nwaanyị onye India na-enyere nwaanyị ọzọ merela agadi aka na-ebugotere ya ihe. 2. Ebe nwaanyị ahụ a na-enyere aka buteere onye agbata obi ya biskiiti, ya bụ, nwoke onye Eshia ahụ e kwuburu gbasara ya.

Chee gbasara ihe ọma i nwere ike imere ndị si n’otu agbụrụ ị na-ele anya ọjọọ. Ọ bụghị iwu na ọ ga-abụ ihe buru oké ibu. Gbalịa mee otu ma ọ bụ karịa n’ime ihe ndị a:

Ntakịrị ihe ọma ọ bụla i meere mmadụ ga-eme ka ị kwụsịtụ ịkpọ ya asị

Kpaso ha àgwà ọma. I nwere ike biliere otu n’ime ha n’oche ma ị nọrọ n’ụgbọala ọhaneze ma ọ bụkwanụ mepeere ha ụzọ ma ha gafewe.
Gị na ha kparịtatụ ụka, ọ bụrụgodi na ha anaghị asụ asụsụ gị nke ọma.
Nweere ha ndidi ma ha mee ihe ị na-aghọtaghị.
Ha kwuwe gbasara nsogbu ndị ha nwere, gosi na ọ na-ewute gị.