Nọgide n’Ahụ Ike n’Okwukwe!

Isi Ihe Ndị Sitere na Taịtọs

ỌGBAKỌ ndị Kraịst ndị dị n’agwaetiti Mediterranean ahụ bụ Krit nọ ná mkpa nke nlekọta ime mmụọ. Ònye pụrụ inyere ha aka? Ee, ọ bụ onye ahụ ya na Pọl onyeozi na-arụkọ ọrụ, bụ́ Taịtọs! O nwere obi ike, ruokwa eru izi ihe, na-anụ ọkụ n’obi maka ọrụ ọma dị iche iche, nọrọkwa n’ahụ ike n’okwukwe.

Pọl jere Krit n’agbata oge nke mbụ na nke abụọ a tụrụ ya mkpọrọ na Rom. Ọ hapụrụ Taịtọs n’agwaetiti ahụ ka o dozie ihe ụfọdụ, họpụtakwa ndị okenye ọgbakọ. A ga-akpọkukwa Taịtọs ịtụ ndị ozizi ụgha mmehie ha n’anya, na isetịpụ ezi ihe nlereanya. E gosipụtara ihe ndị a nile n’ime akwụkwọ ozi Pọl degaara Taịtọs, ma eleghị anya na-abụ nke e zijere site na Masedonia n’agbata afọ 61 na 64 O.A. Itinye ndụmọdụ onyeozi ahụ n’ọrụ pụrụ inyere ndị nlekọta na ndị ọzọ kwere ekwe n’oge a aka inwe obi ike, na-anụ ọkụ n’obi, nọrọkwa n’ahụ ike ime mmụọ.

Gịnị Ka A Chọrọ n’Aka Ndị Nlekọta?

Ọ dịrị mkpa ịhọpụta ndị nlekọta, lebakwa anya n’okwu ụfọdụ siri ike. (1:1-16) Ka e wee họpụta mmadụ dị ka onye nlekọta, mmadụ aghaghị ịbụ onye a na-apụghị ibo ebubo, bụrụ ezi ihe nlereanya n’onwe ya na ná ndụ ezinụlọ ya, onye na-ele ndị ọbịa anya nke ọma, onye nwere ezi nguzozi, na onye na-ejide onwe ya nke ọma. Ọ ghaghị ịkụzi ihe bụ eziokwu, na-agwasi ndị na-ekwupụta echiche ndị na-emegide emegide okwu ike, na-atụkwa ha mmehie ha n’anya. Ọ dị mkpa inwe obi ike n’ihi na ọ dị mkpa imechi ọnụ ndị na-ekweghị ịdị n’okpuru n’iwu n’ime ọgbakọ. Nke a dị otú a karịsịa n’ihe banyere ndị ahụ rapagidesiri ike n’ozizi ibi úgwù, n’ihi na ha ekpuwo ọtụtụ ezinụlọ dum ihu. Ọ ga-adị mkpa ịbasiri ha mba ike ka ọgbakọ ndị ahụ wee nọgide n’ahụ ike ime mmụọ. Taa, ọ dịkwa mkpa ka ndị nlekọta bụ ndị Kraịst nwee obi ike iji baa mba, nyekwa agbamume, ná nzube nke iwulite ọgbakọ.

Tinye Ozizi nke Na-enye Ezi Ndụ n’Ọrụ

Taịtọs gaje izi ozizi na-enye ahụ ike n’ụzọ ime mmụọ. (2:1-15) Ndị ikom meworo agadi kwesịrị igosi ezi ihe nlereanya n’imeru ihe n’ókè, ikwesị nsọpụrụ, inwe ezi uche, okwukwe, ịhụnanya, na inwe ntachi obi. Ndị inyom meworo agadi kwesịrị ‘ịdị nsọ n’omume ha.’ Dị ka “ndị na-ezi ihe ọma,” ha pụrụ inyere ụmụ agbọghọ aka ka ha lee ọrụ ha anya n’ụzọ ziri ezi dị ka ndị bụ nwunye na ndị bụ nne. Ụmụ okorobịa kwesịrị inwe uche zuru okè, ndị ohu kwesịkwara ido onwe ha n’okpuru ndị nwe ha n’ụzọ nke ga-achọ ozizi nke Chineke mma. Ndị Kraịst nile ga-ajụ asọpụrụghị Chineke, jirikwa uche zuru okè na-adị ndụ n’ime usoro ihe nke a mgbe ha na-echere ngosipụta dị ebube nke Chineke na Jisọs Kraịst, “onye nyere onwe ya n’ihi anyị, ka o wee gbapụta anyị n’imebi iwu nile, sachakwaara onwe ya otu ndị nke ga-abụ ndị nke aka ya, ndị obi ha na-anụrụ ọrụ ọma ọkụ.” Site n’itinye okwu ndụmọdụ dị otú ahụ nke na-enye ezi ndụ n’ọrụ, ka anyị onwe anyị kwa ‘chọọ ozizi nke Chineke mma.’

Okwu ndụmọdụ Pọl ji mechie na-akwalite ahụ ike ime mmụọ. (3:1-15) Ọ dị mkpa ido onwe onye n’okpuru ndị na-achị achị n’ụzọ kwesịrị ekwesị, zụlitekwa àgwà nke inwe ezi uche. Ndị Kraịst nwere olileanya nke ndụ ebighị ebi, e kwesịkwara imesi okwu Pọl ike iji gbaa ha ume ịtụkwasị uche ha n’ọrụ ọma dị iche iche. E kwesịrị izere ajụjụ nzuzu na ịlụ ọgụ n’ihi Iwu ahụ, e kwesịkwara ịjụ onye na-akwalite ịrọ òtù mgbe e nyesịrị ya ndụmọdụ ugbo abụọ. Ka ndị okenye na-etinye ndụmọdụ dị otú ahụ n’ọrụ taa, ha na ndị kwere ekwe ibe ha ga-anọgide n’ahụ ike n’okwukwe.

Igbe/Foto dị na peeji nke 22]

Ndị Na-abụghị Ohu nke Mmanya: Ọ bụ ezie na ndị inyom agaghị ezi ndị ikom ihe n’ime ọgbakọ, ụmụnna nwanyị ndị meworo agadi pụrụ izi ụmụ agbọghọ ihe n’onwe ha. Ma iji bụrụ ndị dị irè n’ihe banyere nke a, ndị inyom meworo agadi aghaghị ịgbaso okwu Pọl, bụ́: “Ka agadi ndị inyom dị nsọ n’omume ha, ghara ịbụ ndị na-ebo ebubo ụgha, gharakwa ịbụ ohu nke ịṅụbiga mmanya ókè, ka ha bụrụ ndị na-ezi ihe ọma.” (Taịtọs 2:1-5; 1 Timoti 2:11-14) N’ihi nchegbu e nwere banyere mmetụta nke ịṅụ mmanya, ndị nlekọta, ndị ohu na-eje ozi, na ndị inyom meworo agadi aghaghị ịbụ ndị na-emeru ihe n’ókè, ghara itinye onwe ha n’ịṅụbiga mmanya ókè. (1 Timoti 3:2, 3, 8, 11) Ndị Kraịst nile aghaghị izere ịṅụbiga mmanya ókè, ọ dịkwa mkpa ka ha zere ịṅụ ihe ọṅụṅụ na-aba n’anya mgbe ha na-arụ ‘ọrụ dị nsọ’ nke ikwusa ozi ọma ahụ.—Ndị Rom 15:16; Ilu 23:20, 21.