Akụkụ nke 1—Chineke Ọ̀ Na-eche Banyere Anyị n’Ezie?

1, 2. Ajụjụ ndị dị aṅaa ka ndị mmadụ na-ajụ banyere Chineke, ọ̀ bụkwa n’ihi gịnị?

N’OTU oge ná ndụ gị, ọ pụrụ ịbụ na ị jụwo, sị: ‘Ọ bụrụ na e nwere Chineke nke na-eche banyere anyị, n’ihi gịnị ka o ji kwere ka ahụhụ dị ukwuu dịrị?’ Anyị nile enwewo ahụmahụ nke ịnọ n’ahụhụ ma ọ bụ mara onye meworo otú ahụ.

² N’ezie, n’oge nile nke akụkọ ihe mere eme, ụmụ mmadụ enwewo ihe mgbu na obi mgbu site n’agha, obi ọjọọ, imempụ, ikpe na-ezighị ezi, ịda ogbenye, ọrịa, na ọnwụ nke onye a hụrụ n’anya. Nanị n’ime narị afọ nke 20 anyị, agha dị iche iche egbuwo ihe karịrị 100 nde ụmụ mmadụ. Ọtụtụ narị nde ndị ọzọ abụrụwo ndị e merụrụ ahụ ma ọ bụ ndị na-enwekwaghị ebe obibi. Ọtụtụ ihe ndị na-atụ egwu emewo n’ime oge anyị, na-akpata oké mwute, ọtụtụ anya mmiri, na echiche nke enweghị olileanya n’akụkụ nke ọtụtụ mmadụ a na-apụghị ịgụta ọnụ.

3, 4. Olee otú ọtụtụ ndị si eche echiche banyere nkwere Chineke kwere ka ahụhụ dịrị?

³ Ụfọdụ na-enwe obi ilu ma na-eche na ọ bụrụ na Chineke dị, ọ dịghị eche banyere anyị n’ezie. Ma ọ bụ ha pụrụ ọbụna iche na ọ dịghị Chineke dịnụ. Dị ka ihe atụ, otu nwoke nke a tara ahụhụ n’ihi agbụrụ o si na ya, bụ́ nke kpatara ọnwụ ndị enyi na ezinụlọ ya n’Agha Ụwa nke Mbụ jụrụ, sị: “Ebee ka Chineke nọ mgbe mkpa ya na-akpa anyị?” Onye ọzọ nke lanarịrị ogbugbu nke ọtụtụ nde ndị mmadụ n’aka ọchịchị Nazi n’Agha Ụwa nke Abụọ nwere mwute nke ukwuu n’ihi nhụjuanya ọ hụrụ nke na ọ sịrị: “Ọ bụrụ na ị pụrụ ịratụ ire gị n’obi m, ọ ga-abụrụ gị nsí.”

⁴ Otụ́ a, ọtụtụ mmadụ apụghị ịghọta ihe mere ezi Chineke ga-eji kwere ka ihe ọjọọ na-eme. Ha na-ajụ ma ọ̀ na-eche banyere anyị n’ezie ma ọ bụkwanụ ma ọ̀ dị adị ma ọlị. Ọtụtụ n’ime ha na-echekwa na ịta ahụhụ ga-abụ otu akụkụ nke ịdị adị nke ihe a kpọrọ mmadụ mgbe nile.

[Foto dị na peeji nke 2, 3]

Ụwa ọhụrụ nke ahụhụ na-adịghị ọ̀ dị nso?