Jehova Ọ̀ Hụrụ Gị n’Anya n’Eziokwu?

E nwere otu nwaanyị nke o siiri ike ikweta na Jehova nwere ike ịhụ ya n’anya. Nwaanyị ahụ sịrị: “Ihe kacha mee ka o siere m ike ịbụ enyi Jehova bụ na m na-eche na o nweghị uru m bara.” Ò nwere mgbe ọ na-adị gị otú ọ dị nwaanyị a? Ọ bụrụ otú ahụ, i nwere ike ịna-ajụ onwe gị ma ‘Jehova ọ̀ hụrụ onye nke ọ bụla n’ime ndị na-efe ya n’anya.’ Azịza ya bụ ee. Ihe Jizọs kwuru na-egosi na Jehova ejighị onye nke ọ bụla n’ime ha egwuri egwu.—Gụọ Jọn 6:44.

N’eziokwu, Jizọs maruru Jehova ala karịa onye ọ bụla ọzọ. Gịnị ka o kwuru banyere Jehova? (Luk 10:22) Ọ sịrị: “Ọ dịghị onye pụrụ ịbịakwute m ma ọ bụrụ na Nna m, bụ́ onye zitere m, adọtaghị ya.” Nke a na-egosi na anyị agaghị abụli ndị na-eso ụzọ Kraịst ma na-efekwa Jehova ọ gwụla ma Nna anyị nke eluigwe bụ́ Jehova ọ̀ dọtara anyị n’ebe ọ nọ. (2 Ndị Tesalonaịka 2:13) Ọ bụrụ na anyị aghọta ihe a Jizọs kwuru, anyị ga-ahụ na ihe a o kwuru na-egosi n’eziokwu na Chineke hụrụ ndị na-efe ya n’anya n’otu n’otu.

Mgbe Jizọs kwuru na Jehova na-adọta anyị, gịnị ka o bu n’obi? Okwu Grik a sụgharịrị ‘dọta’ bụkwa ya ka e dere n’ebe ndị e kwuru banyere isi na mmiri dọpụta ụgbụ azụ̀ juru na ya. (Jọn 21:6, 11) Nke a ọ̀ pụtara na Jehova na-adọta anyị ka anyị fewe ya ma ànyị chọrọ ma ọ bụ na anyị achọghị? Ọ bụghị ihe ọ pụtara. Jehova chọrọ ka anyị jiri aka anyị na-ekpebi ihe anyị ga-eme. N’ihi ya, ọ naghị amanye anyị amanye ka anyị megheere ya obi anyị. (Diuterọnọmi 30:19, 20) Otu ọkà mmụta kwuru, sị: “Obi mmadụ dị ka ọnụ ụzọ na-enweghị onye ọzọ ga-emegheli ya. Ọ bụ naanị onye nwe ya ga-emegheli ya.” Jehova na-enyocha obi ọtụtụ ijeri mmadụ nọ n’ụwa, na-achọ ma ọ̀ ga-ahụ ndị chọrọ ife ya. (1 Ihe E Mere 28:9) Ọ bụrụ na e nwee onye nke Jehova hụrụ, Jehova na-eme otu ihe magburu onwe ya. Gịnị bụ ihe ahụ ọ na-eme?

Jehova na-eji nwayọọ adọta onye ahụ “nwere ezi obi.” (Ọrụ Ndịozi 13:48) E nwere ụzọ ihe abụọ Jehova na-eji eme ya. Otu bụ ozi ọma si na Baịbụl nke ọ na-eme ka onye ahụ nụ. Nke abụọ abụrụ mmụọ nsọ ya. Mgbe Jehova hụrụ na onye ahụ ji obi ya nabata eziokwu ọ na-amụta na Baịbụl, ọ na-ejizi mmụọ nsọ ya enyere onye ahụ aka ka ọ ghọta ihe ọ na-amụ ma na-eme ya eme. (1 Ndị Kọrịnt 2:11, 12) Anyị emekataghị bụrụ ezigbo ndị na-eso ụzọ Jizọs ma na-efe Jehova otú ọ chọrọ ọ gwụla ma Jehova o nyeere anyị aka.

Gịnịzi ka okwu Jizọs ahụ e dere na Jọn 6:44 na-akụziri anyị banyere Jehova Chineke? Ọ na-akụziri anyị na Jehova na-adọta ndị mmadụ n’ebe ọ nọ n’ihi na ọ hụrụ ezi ihe n’obi ha ma hụkwa ha n’anya n’otu n’otu. Ọ bụ ihe a ka nwaanyị ahụ e kwuru okwu ya ná mmalite isiokwu a mechara ghọta, obi eruo ya ala. O kwuru, sị: “Mmadụ ịbụ onye na-efe Jehova bụ ihe ọma kachanụ nwere ike imere mmadụ. Ọ bụrụ na Jehova họọrọ m ka m fewe ya, ọ pụtara na m bara ezigbo uru n’anya ya.” Gịnwakwanụ? Ugbu a ị matara na Jehova hụrụ ndị na-efe ya n’anya n’otu n’otu, ị́ gaghị achọ imeghere ya obi gị?