Anyị Anjwo—‘Anụ Kpa Ọngịrị Nyanụ Wuu Họ Ụkụrwọ Ịnyịịla’

Ẹ-ẹpwụ nya ileta ọlẹ ká ọngọmyẹrụ ịPọlụ da du ta ịTayịtọsị, o-ya nyori anyị ikolobya tụ́ ịTayịtọsị nyị maga ‘ká ụkụrwọ ọnyịịla ọhọhọ nyaa . . . a ri ẹjẹẹ ha angịnyị . . . mẹ.’ (Tay 2:6, 7) Lụka ọkịla ẹ-ẹpwụ nya egbeju ọwọwa, ọ mẹjẹ nyori iJisọsị nyị ka hụ́ angịnyị nya iJihova cheri-cheri, chajị kị ka ‘kpa ọngịrị nyaa wuu họ ụkụrwọ ọnyịịla.’ (Tay 2:14) Ụkụrwọ ọnyịịla ọhẹ ọlẹ kị ka họ ri ọ-ka kpa ẹrụ ọnyịịla pyẹ bala ọ-ka ya ẹla u-uhye nya ịpyị-Adirahu nya Ohe Oluhye ju angịnyị. Kori ká ri ọnyị okolobya lee ọyẹẹnọ, á ka jẹ́-ẹ kpa ọngịrị ọlẹ ka la lẹẹlẹẹ họ ụkụrwọ nyọka chịchịịchị ye ịlahị nya ụgbẹyị lee o-ye ịlahị nya ụgbẹyị kpụrụrụ?—Etu 20:29.

Kori kọ hang nyọka ye ịlahị nya ụgbẹyị, dọmwụ nyọka nwụlanọ chajị kọ ka chịkpẹẹ hang. (Luk 14:28-30) Ọ-chụ pwokwita, ányị a tị ka bwu da ịlọng ụbwọ ko ri ka juwa họ ụkụrwọ nya ẹrụ ọnyịịla nya Ohe Oluhye ọ-kpa pyẹ la ọhịhị nyang wuu? Ányi a tị ka bwu họ pwụ awa ọlẹ kị chị nọ? Bịlẹ iJihova ẹ-ẹpwu nya abwọ ọrịrị nyọka dang ụbwọ. (Eje 37:5) Ya ẹla u-uhye nya ang ọlẹ ká nwụlanọ nyọka họ ju adang bala ịnang anyị bala angịlẹ kị họ hiigu yẹẹyẹẹ ẹ-ẹpwụ nya ịlahị nya ụgbẹyị oyeye. Ọọwa lẹ, á hu ẹta ẹdịyẹ nyọka wu ang ọlẹ ka hunọ ha ịlọng ọyị ẹẹ. IJihova ka wahị kụrụ aga ọmama nyang ẹ-ẹpwụ nya ụkụrwọ nyamwụ ọwẹ.

YẸ IFIM ỌLẸ KỌ RI, IKOLOBYA BALA ỊYẸẸNỌ ỊLẸ KỊ JUWA JU IHI NYA IJIHOVA. KÁ WẸ ỊTỌ ẸLA ILEJI ỊLẸ:

• Akama iyina angịhyẹ a tị kụrụ myị́ chaji kị ka ye ịlahị nya ụgbẹyị, bala ányị ị tị bwu họ ịnyị?

• Ányị adịda bala ịnịna a tị ka bwu da anyị nyaa ụbwọ nyọka ye ịlahị nya ụgbẹyị?

• Ịyẹ tị du kọ baba nyọka hu ụka nọ nya ẹla Ohe ọkaka?

• Ányị ala ọjịra-jịra a tị ka bwu ju ọngọ ye ịlahị nya ụgbẹyị ọhụ bala ọ-ka dọọ ụbwọ?

• Ahị ọwawa iyina angị ye ịlahị nya ụgbẹyị a tị kaa ye?