Jacob Wó Daụ Duudịẹyebo Laa Akịmị

Isaac 40 kụraị ka timi Rebekah nanamị. Isaac Rebekah tarị kụrọmọmị. Timi kẹnị ifie laamị, ámịnị maa owei-awọụ ziimị. Awọụbo twin-ama.

Okosu-owei ẹrẹmị Esau, tuu-owei bá Jacob. Esau warị a timigha, bá boutein-owei. Jacob ifiebosẹ warị ka timimị.

Bịsẹ ifiebị, daụ fịị daba, warị bọọ okosudẹịn tọbọụ kị biindẹịn ogbo-ama mọ bá sịlịbo mọ akị timimị. Duudịẹyeama ka kị bịsẹ yebo tịịnmịnị. Isaac ziituu mị, Jehovah kikoromọ akị Abraham pịrịwẹrị yebo kpọ duudịẹyebo a sụọemi. Esau bịsẹ kikoromọye bị akị yelaa ye dimọgha wẹrịmị, anịa Jacob bịsẹ yebị yelaa-emi bara nimi wẹrịmị.

Kẹnịbaị Esau bouteinyọ duobomị, wó angọmị ụ dẹịnkụrọmọmị. Jacob tụọmịnị fịyaị fọrọ-ịmbẹlẹ wó nini bọọ sụọ duonị omịnị gbaamị: ‘Mọụn mị ị baadẹ! Anị red stew ma zụa ị pịrị!’ Jacob gbaa ụ pịrịmị: ‘Ịmịnị ị́ pịrị mịnị, anịa wo daụ duudịẹma ị́ laa yebo akị ị pịrịmụ bara gbaa pẹlẹdẹ kị.’ Esau gbaamị: ‘Ị laamụ duudịẹyebo ịmịnị mọ kọn wẹnịmụ-fịrị fa! Ị́mịnị ị laamụ duudịẹyebo akị. Ịmịnị fịyaị kị fị dọụmịnị.’ Esau kịlịkịlị-emi bara ị́ mọ tọnmị? Ómịnị kịlịkịlịgha bara kị mịẹdịamị. Esau stew fịyaị ka kị yelaa-emi ye deimị.

Isaac kosu kụrọmọdẹ ifiemị, ómịnị tarịama akị wo kosudẹịn tọbọụ pịrị dọụmị. Rebekah baratụa Jacob pịrịwẹrị Jacob kị tarịbo laa akịmị. Jacob kị ụ laamụ tarịbo akịdẹ bara Esau mọ nimi ifie mị, Esau boloukọn kụrọmọmị. Anịduonị ómịnị Jacob baa dọụmị. Isaac mọ Rebekah mọ baratụa Jacob pịrịmụ duonị, ámịnị gbaa ụ pịrịmị: ‘Mú ị́ yin bịnaowei Laban mọ timi Esau boloukọn yọbị iyeridẹ kị waịbo.’ Jacob wó daụ mọ yin mọ gbaaye peiwẹrị Laban dọụ múmị.