Jacob Mọ Esau Mọ Dọọ Mịẹmị

Jehovah Abraham mọ Isaac mọ kekere bara bị akị Jacob kpọ kekeremụ bara gbaa Jacob pịrịmị. Jacob Haran tịịnmịnị yọ ka timi inyenrinmị, ómịnị bịsẹ yọ bọọ ere-nana wẹrị biin awọụama zii bá biin yeama kpọ nanamị.

Timi kẹnị ifie laamị, Jehovah gbaa Jacob pịrịmị: ‘Waị iné ama bọọ mú.’ Anịduonị, Jacob mọ wó ziituu mọ waị ánị ama bọọ múmị. Á waị múmịnị mị, kịmịotu bo Jacob laawẹrị gbaa ụ pịrịmị: ‘Iné bịnaowei Esau mọ bá 400 owei-ama mọ bomịnị!’ Esau, ómịnị mọ bá wó ziituu mọ baa mịnị baị kpọ nimigha duonị, Jacob ye-esinmị. Anịduonị, ómịnị tẹẹ Jehovah yarịmị: ‘Sisei ine bịnaowei bara duo ị zụọ.’ Barịị baịmị, Jacob biin anịna-ama, obori-ama, malu-ama, konubiri-ondoku-ama bá evin-ama fịrịmọ mú Esau pịrịmị.

Bịsẹ deinbị, Jacob bẹtịbị emi ifie, ómịnị kẹnị angel-owei ẹrịmị! Bịsẹ angel-owei mị, Jacob mọ andamị. Ámịnị andatimi pekei laamị. Andatimi ifiemị ye Jacob laa kị gbaa kpọ ómịnị dẹịnsụọgha. Angel-owei mị gbaamị: ‘In’a barasin.’ Anịa Jacob gbaamị: ‘Ị́mịnị tarịama akị ị pịrịghaba ịmịnị ị́ bụọmọ múgha fa.’

Angel-owei mị laa tarịama kọn Jacob pịrịmị. Anịduonị, Jehovah Esau bụọmọ wẹrị ụ baagha fa bara Jacob mọ nimimị.

Bịsẹ baị pekei mị, Jacob alayọ duo Esau mọ bá wó 400 kịmịbo mọ ẹrịmị. Jacob wó warị-otubo a barasin wẹrị bọlọụ mú Esau laawẹrị sọnọma ifiea tịbị-oboimọ ụ pịrịmị. Esau baịn mú Jacob laawẹrị ụ gbeinmọwẹrị anị maa kịmị youmị. Esau mọ Jacob mọ dọọ mịẹmị. Jacob akị bei ye kẹrịpẹlẹmọ baramị tebara ka kị Jehovah gbele kị ị́ mọ tọn nị?

Bịsẹ ifie bụọdẹmị, Esau waị wó warị a múmị, Jacob kpọ waị wó warị a múmị. Jacob owei-awọụbosẹ gbelei daba oi-maamụ fini. Jacob awọụ ẹrẹbo, Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, bá Benjamin. Jehovah mị awọụbo ka kẹnị ụbọ kọn wó kịmịbo zụọbụọmọmị. Bịsẹ owei ẹrẹmị Joseph. Ye paa bara bị ị́ mọ nimimị? Wo ye paa bara bị dọụ ẹrị.