Jehovah Dọụbara Mịẹmụ Bara Á Mọ Gbaamị

Israel-otubo Egypt duoserii wẹrị maa agọnọ-wei bụọmị, ámịnị bo Sinai Ogun emiyọ bọọ gbene mịẹmị. Jehovah Moses tịịn Ogun agọnọ bọọ mú wẹrị gbaa ụ pịrịmị: ‘Ịmịnị Israel-otubo zụọbụọmọdẹ. Ámịnị ine gbaa egberi pei bá ine olokobo koko daba, ámịnị ine yelaa kịmịama ka paa mịnị.’ Moses waị mú Israel-otubo laawẹrị Jehovah gbaa egberi bị gbaa akị Israel-otubo pịrịmị. Ámịnị teeki gbaa ma o? Ámịnị gbaamị: ‘Jehovah gbaadẹ yesẹ omịnị mọ mịẹ mịnị.’

Moses waị ogun agọnọ bọọ múmị. Jehovah bịsẹ yọ bọọ gbaa ụ pịrịmị: ‘Tara dein bụọdaba ịmịnị waị ị́ mọ mọ́ ẹrẹ mịnị. Ámịnị benebene Sinai Ogun agọnọ bị uwoubo kụmọ bara gbaa á pịrị.’ Moses waị mú Israel-otubo laawẹrị ámịnị angọtọlọmọ wẹrị Jehovah gbaamụ egberi pei bara gbaa á pịrịmị.

Tara dein bụọmị, Israel-otubo ogun agọnọ bọọ dụkọọ obudou mọ bá ereintọrụ mị malụmịnị bara ẹrịmị. Ámịnị agbarara-gbururu fie kụrọ bara naamị bá egbelegbele fie kpọ naamị. Bịsẹbara paadẹmị Jehovah fẹnị bara iyeri ogun agọnọ bọọ bomị. Israel-otubo, kpekekpeke malafa kụrọmọ mị. Ogun serii zigeikụrọmọ duonị, owun-owun yọbosẹ akịsiinmị. Egbelegbelebo fie kụrọmọ dẹịnmị. Bịsẹ ifie bị Ọkpọnanaowei gbaamị: ‘Ịmịnị Jehovah. Ámịnị benebene oru-ama karịkụmọ.’

Moses waị ogun agọnọ bọọ múmị, Jehovah Israel-otubo akị ụ karịmụ bara mọ bá anị inyenrinmụ bara mọ gbaa ụ pịrịmị. Moses olokobo gẹẹ koromọ wẹrị goo paamọ Israel-otubo pịrịmị. Ámịnị gbaamị: ‘Jehovah gbaadẹ yesẹ omịnị mọ mịẹ mịnị.’ Ámịnị Jehovah gbaadẹ yesẹ mịẹmụ bara gbaamị. Ámịnị kọkọ bịsẹ bara mịẹ mịnị?