Fẹnị Kẹrịịmịnị Bou Mị

Moses Midian a timi 40 kụraịama baịmị. Ómịnị erenana wẹrị awọụ-ama ziimị. Kẹnị erein ómịnị Sinai Ogun-agọnọ mọ naịn yọ a timi wó anịna bo kekeretimimị, ómịnị kẹnị tamama ye ẹrịmị. Kẹnị bou fẹnị kẹrịịtimi bara Moses mọ ẹrịmị, anịa bou bị ịyọụngha! Moses mú bou mọ naịn dá ebibara paamịnị ye dii yọ a mú ifiemị, ómịnị kẹnị okolo naamị: ‘Moses! Bei yọ mọ naịn kụmọ. Iné agbakabo siin, tuumị, ị́mịnị yalịyalị kiri ka tịẹ emi.’ Jehovah kị angel duotolu a ẹrẹtimimị.

Moses malafa kụrọmọ duonị, ómịnị wó andẹ terimị. Bịsẹ okolomị gbaamị: ‘Israel-otubo fịịmịnị ụyabo ị mọ ẹrịdẹ. Ịmịnị Egypt ibe duo á zụọbụọmọ wẹrị ebi ogbo akị á pịrịmịnị. Ị́mịnị kị ine kịmịbo kọn Egypt duo seri mịnị.’ Bịsẹ yemị Moses mịẹ tamama bara ị́ mọ tọngha?

Moses Jehovah biimị: ‘Te ụbọ kị ị fịrịmọ bara á mọ bii daba, ịmịnị teeki gbaa mịnị a o? Jehovah ụ parụmị: ‘Abraham, Isaac, bá Jacob Ọkpọnanaowei Jehovah kị ị́ fịrịmọ bara gbaa á pịrị.’ Moses mọkpọ gbaamị: ‘Ámịnị ị peighaba?’ Jehovah baratụa ụ pịrịmụ bara mịẹ Moses dịamị. Moses wó bara bọọ timi ogbolo bị, akị kiri bọọ koromọ bara Jehovah mọ gbaa ụ pịrịmị. Moses ogbolo kọn koromọ ifiemị, ogbolo mị seiye anịghakpọ dawaịn deimị! Moses seiye tungbo kẹrị ifiemị, seiye mị waị ogbolo paamị. Jehovah gbaa ụ pịrịmị: ‘Ị́mịnị mị tamama ye mịẹ daba, Ịmịnị kị ị́ fịrịmọ bara mịẹgaan paamọ mịnị.’

Moses mọkpọ gbaamị: ‘Ịmịnị ebibara ẹrẹgha.’ Jehovah gbaa ụ pịrịmị: ‘Ịmịnị iné gbaamụ egberi gbaa ị́ pịrị mịnị bá ine bịnaowei Aaron kpọ fịrịmọ wẹrị baratụa ị́ pịrị mịnị.’ Jehovah ụ mọ mọ́ emi bara Moses mọ nimi duonị, Moses wó taa mọ bá wó awọụbo mọ akịwẹrị waị Egypt a múmị.