Bọlọụ Tara Akpotubo

Pharaoh Israel-otubo akị omoni mịẹwẹrị á penimọ kụrọ fịrịama wẹnịtimimị. Jehovah Moses mọ Aaron mọ fịrịmọ mú Pharaoh laa wẹrị gbaa ụ pịrịmị: ‘Ine kịmịbo bụọmọ mú anịkị ámịnị laa ozibou bọọ ị karị a paadẹ.’ Pharaoh angọ-dụbamọ bara kọn parụmị: ‘Ịmịnị Israel-otubo bụọmọ múgha fa, Jehovah gbaa egberi ị gbologha.’ Pharaoh waị á penimọ kụrọ fịrị wẹnị bọlọụ kị dẹịnmị. Jehovah ye kọn Pharaoh tolumọ mịnị. Jehovah akị ụ tolumọ mụ bara mị ị́ mọ nimi wẹrịemi? Ómịnị Egypt bọọ Oia Akpotu mịẹpaamọmị. Jehovah gbaa Moses pịrịmị: ‘Pharaoh ine gbaaye peigha. Pekei bị, Pharaoh Nile Tọrụ bọọ timi mịnị. Mú Pharaoh laa dá gbaa ụ pịrị, ómịnị ine kịmịbo bụọmọ múgha duonị, Nile Tọrụ bọọ emi beni mị asịịn dei mịnị.’ Moses Jehovah gbaaye pei wẹrị mú Pharaoh laamị. Pharaoh Aaron diitimi Aaron wó ogbolo bị akị Nile beni famụwẹrị beni bị asịịn dei bara bị ẹrịmị. Tọrụ beni mị fụrụmị, indibo kpọ fịịmị, anịduonị bá laa Nile Tọrụ kpọ beni zuu bougha. Pharaoh mọkpọ Israel-otubo bụọmọ múgha.

Sọnọma dein bụọmị, Jehovah waị Moses fịrịmọ mú Pharaoh laa wẹrị gbaa ụ pịrịmị: ‘Ine kịmịbọ ị́ mọ bụọmọ múghasẹ Egypt ibesẹ akpalị-akpalị kị timi mịnị.’ Aaron wó ogbolo serimọ ifiemị, Egypt ibesẹ akpalị-akpalị kị paamị. Kịmịotu ánị warị, bed bá ánị panị boloubosẹ kpo apkalị-akpalị kị ẹrịmị. Ibesẹ akpalị-akpalị kị timimị! Pharaoh Moses bịịwẹrị Jehovah tẹẹ dá akpotu tịẹmọ bara gbaamị. Pharaoh Israel-otubo bụọmọ mú mịnị bara gbaamị. Anịduonị Jehovah akpotu tịẹmọmị, Egypt-otubo fịịdẹ akpalịbosẹ bẹnịmọ mị, akpalịbo biin kụrọmọmị. Ibesẹ bo fụrụmị, mọabịkpọ Pharaoh mọkpọ kịmịbo bụọmọ múgha.

Anịduonị Jehovah gbaa Moses pịrịmị: ‘Aaron wó ogbolo bị akị kiri famụ daba, atọụmị ịtọlọama, anịghakpọ kịmị pidimịnị fiinmịnị yeama dei mịnị.’ Kirimọ-kirimọ bịsẹ fiinmịnị yebo ibesẹ kẹrị-akịmị. Pharaoh kịmịbo zụa otu gbaa ụ pịrịmị: ‘Bei akpotu bị Ọkpọnanaowei kị duoboemi.’ Pharaoh mọkpọ Israel-otubo bụọmọ múgha.