Kọọ Sondia Akpotubo

Moses mọ Aaron mọ Ọkpọnanaowei á fịrịmọ ịsọmụ-egberi gbaa Pharaoh pịrịmị: ‘Ine kịmịbo ị́ mọ bụọmọ múghasẹ, ịmịnị andei anịghakpọ angbeleama fịrịmọ ama bọọ bo mịnị.’ Biin andei anịghakpọ angbeleama Egypt bọọ pẹrẹ otu warịbo mọ, ụya otu warịbo mọ a sụọmị. Andei anịghakpọ angbeleama ibesẹ kẹrị-akị siinmị. Anịa Goshen ama bị andei anịghakpọ angbeleama fa, Israel-otubo bịsẹ yọ ka timimị. Tara akpotubo bụọdẹmị, nein-karamọ akpotu mọ kọọ akpotubo mọ, Egypt-otubo bẹtịbị ka bụụdọọnmị. Pharaoh tẹẹmị: ‘Jehovah tẹẹ dá mị andei anịghakpọ angbelebo kọnsiin, ómịnị kọnsiin daba iné kịmịbo mú a paaemi.’ Anịa Jehovah andei anịghakpọ angbelebo kọn siinmị, Pharaoh wó ịkịọụ deimị. Pharaoh kọkọ mị paamịnị yebo duo ye tolumọ akịmị?

Jehovah gbaamị: ‘Pharaoh ine kịmịbo bụọmọ múghasẹ, dọọn ama bọọ emi namabosẹ báasiin mịnị.’ Kọọ baị laamị, namabo koro fịịmị. Anịa Israel-otu namabo fịịgha. Bịsẹ bara kị paa kpọ, Pharaoh mọkpọ tịbịkụrọmị, ómịnị a bụọmọ múgha.

Jehovah mọkpọ Moses mú Pharaoh laa dá fọụn-ama akị afọrụ bọọ gbeintụa bara gbaa ụ pịrịmị. Fọụnbo duun-yeama kị deiwẹrị Egypt-otu angọbo a palịmị. Bịsẹ fọụnbo Egypt-otu mọ, bá ánị namabo angọbo mịẹ ẹnọụn-ẹnọụn paamị. Bịsẹ bara kị paa kpọ Pharaoh mọkpọ Israel-otubo bụọmọ múgha.

Jehovah waị mọkpọ Moses fịrịmọ mú Pharaoh laawẹrị gbaa ụ pịrịmị: ‘Ị́mịnị mọkpọ ine kịmịbo bụọmọ mú bụọgha? Dein-baịmị osuo-kputuama ama bọọ koro mịnị.’ Barịị baịmị, Jehovah osuo-kputu, agbarara-gbururu, bá fẹnị mịẹ ama bọọ koromọmị. Bịsẹ timi-timi ikime paasẹ naa Egypt a paagha wẹrịmị. Tịnbo mọ bá gborowẹrị yebosẹ korosiin mị, Goshen yaịbo bẹtịbị kị korogha. Pharaoh gbaamị: ‘Jehovah tẹẹ dá bei yebo tịẹmọ! Bei yebo tịẹmọ daba, ámịnị mú a paaemi.’ Osuo-kputu mọ osuo mọ pẹlẹmị, Pharaoh wó ịkịọụ deimị.

Moses gbaamị: ‘Osuo-kputu laa báagha yebosẹ ịkpaịkpaị-ama á kọn fị mịnị.’ Biin kụrọmọ emi ịkpaịkpaị-ama kọọ tịnbo mọ bá gboroyebo mọ fị-siinmị. Pharaoh tẹẹmị: ‘Jehovah tẹẹ dá ịkpaịkpaịbo kọnsiin.’ Jehovah ịkpaịkpaịbo kọnsiin kpọ, Pharaoh mọkpọ á bụọmọ múgha.

Jehovah gbaa Moses pịrịmị: ‘Iné baramị akị agọnọ sọnmọ.’ Tịẹkiri tịẹkiri agọnọsẹ dụkọọ kị paamị. Egypt-otubo tara dein kẹnịye kpọ ẹrịgha bá kẹnị ụbọ kpọ ẹrịgha. Israel-otu warịbo bẹtịbị kị tụkpa timimị.

Pharaoh gbaa Moses pịrịmị: ‘Anị namabo kọn wẹrị dá, ị́ mọ iné kịmịbo mọ mú.’ Moses gbaamị: ‘Omịnị ịkịan-kụn wo Ọkpọnanaowei pịrị mịnị duonị, namabo kpọ kọn tụa mú mịnị.’ Pharaoh boloukọn kụrọmọmị. Anịduonị ómịnị darịmị: ‘Ine tọrụyọ duo serii! Ịmịnị waị iné ẹrị daba, Ịmịnị ị́ báa mịnị.’