Moses Jehovah Karịmụ Yọkị Sẹlẹ Angọ Pịrịmị

Jacob ziituumị Egypt a timi ifie mị, Egypt-otubo Israel-otu ka kị á tịịn timimị. Jacob mọ Joseph mọ fịị bụọdẹmị, aya Pharoah Egypt ibe daamị. Bịsẹ Pharoah mị, Israel-otubo kụrọ nana Egypt-otubo dẹịnmụ malafamị. Anịduonị, bịsẹ Pharaoh mị, Israel-otubo akị omoni-ama mịẹmị. Ómịnị á penimọ wẹrị block-ama tẹmẹ bá kụrọ fịrịama wẹnịmị. Anịa Egypt-otubo Israel-otubo penimọ wẹrị kụrọ fịrịama wẹnịmịnịmị, Israel-otubo biin kị biin dẹịnmị. Israel-otubo biin dẹịnmịnị yọmị Pharaoh dịsẹgha duonị, aya-zii wẹrịemi Israel owei-awọụbosẹ báa bara Pharaoh mọ gbaamị. Israel-otubo malafa bara ị́ mọ tọn a?

Jochebed tịịnmịnị Israel-araụ kẹnị dii-ebi owei tọbọụ ziimị. Moses ụndụ zụọbụọmọ mụ yọ duonị, amịnị Moses akị akpẹrẹ anịghakpọ kana a tụa wẹrị Moses kọn Nile Toru aka bọọ emi tuobou bọọ sọwẹịmị. Moses bịna-araụ Miriam, Moses sọwẹị wẹrịemi yọ mọ naịn yọ a timi paamụ ye ditimimị.

Pharaoh baụ tọrụ bọọ benibiri yọ a bo ifiebị, amịnị akpẹrẹ bị ẹrịmị. Kala tọbọụ akpẹrẹ bolou bọọ timi youmịnị bara a mọ ẹrị ifiemị, amịnị tọbọụ dinenimị. Miriam a biimị: ‘Ụ kekeremụ kịmị ị mọ dọụbo ị́ pịrị a?’ Pharaoh baụ iin gbaa ifiemị, Miriam waị mú a yin Jochebed kị tịịn bomị. Pharaoh baụ gbaa Jochebed pịrịmị: ‘Bei tọbọụ bị kekere ị pịrị, ịmịnị ị́ gbẹẹ mịnị.’

Tọbọụ dụba kẹnị ifie laamị, Jochebed waị tọbọụ kọn mú Pharaoh baụ pịrịmị, Pharaoh baụ kị Moses akị ụ tịịnmị, bá Moses kọn anị bẹtịbị tọbọụ bara sibe paamọmị. Moses pẹrẹ warị ka timi paamị, anịduonị wó dọụdẹ yesẹ ómịnị mọ nana a paatimimị. Mọabịkpọ Moses benebene Jehovah baragha. Ómịnị Egypt-oweigha anịa Israel-owei bara nimi wẹrịmị. Anịduonị ómịnị Jehovah kị karịmị.

Moses 40 kụraị baị ifemị, ómịnị baratụa wó kịmịbo pịrịmụ bara tọnpẹlẹmị. Egypt-owei Israel-owei famụtimi bara Moses mọ ẹrị ifiemị, ómịnị Egypt-owei famụ kụrọmọyọ duonị, Egypt-owei mị fịịmị. Moses dụwẹị kọn owún-bolou ka sọwẹịmị. Pharaoh ye naa ifiemị, ómịnị Moses báa dọụmị. Anịduonị, Moses baịn Midian ka múmị. Jehovah bịsẹ yọ bọọ Moses kekeremị.