Oi-karamọ Akpotu Mị

Moses bá waịbo Pharaoh laagha fa bara gbaamị. Anịa ómịnị kẹnị ye gbaa Pharaoh pịrịdẹ kị Pharaoh tọrụyọ duo seriimị. Ómịnị gbaamị: ‘Deinbiri laa daba, Egypt bọọ emi bọlọụ-owei awọụbosẹ fịị mịnị, Pharaoh bọlọụ owei-tọbọụ duomú omoni-otubo bọlọụ owei-awọụbosẹ fịị mịnị.’

Israel-otubo kẹnị yelaa fịyaị tụọfị bara Jehovah mọ gbaa á pịrịmị. Ómịnị gbaa á pịrịmị: ‘Kẹnị kụraị baịdẹ owei anịna anịghakpọ owei obori baa dá, asịịnbo akị anị warị-ogigebo siri. Nama fẹịndá vudogha breadị akị nama mọ tụamọ fị. Bịdẹ tụa bá agbaka kpọ tụadá yọ duo seriimụ bara akị angọtọlọmọ. Mị deinmị, ámịnị pereé mịnị.’ Israel-otubo pọwẹị kụrọmọ bara ị́ mọ tọngha?

Deinbiri laa ifiemị, Jehovah angel-owei Egypt bọọ emi warịbosẹ a múmị. Asịịn akị sirigha warịbosẹ, bọlọụ owei-awọụbo fịịmị. Angel-owei mị asịịn kọn siri wẹrịemi warịbo duo sụọgha. Egypt bọọ emi ziituubosẹ bọlọụ oweị-awọụbo fịịmị. Pẹrẹ-otu bá ụya-otu kpọ. Anịa Israel-otu awọụbo kẹnị kpọ fịịgha.

Pharaoh owei-tọbọụ kpọ fịịmị. Yemị Pharaoh gbele kụrọmọmị. Anịduonị, ómịnị kirimọ-kirimọ gbaa Moses mọ Aaron mọ pịrịmị: ‘Seriitịẹ. Beiyọ duo serii. Mú anị Ọkpọnanaowei karị. Anị namabo kpọ akịtụa mú!’

Agọnọ-wei bị agbatụa-emi dein ka Israel-otubo Egypt duo seriimị. Ámịnị warịbolou bá ziituu ziituu bara ka kị angọ bẹnịmọ wẹrị Egypt duo paamị. Kịmịbo 600,000 Israel owei-ama, biin ere-ama bá awọụ-ama kị timimị. Zịnị otuama kpọ Jehovah karị dọụtimi duonị, á mọ mọ́ sụọ múmị. Israel-otubo laa peree nanadẹ!

Jehovah akị á zụọbụọmọ bara mị ukiemụ yọ duonị, ámịnị kụraịbosẹ bịsẹ yelaa fịyaị tụọfịmị. Asababẹịn Uge ka kị bịsẹ ye tịịnmị.