Yei Fịịdẹ Erema Tọbọụ Bị Waị Fịịyọ Duo Seriibomị

Osuo ama bọọ koroghatimi ifiemị, Jehovah gbaa Elijah pịrịmị: ‘Zarephath ama bọọ mú. Kẹnị duu-ere emi, amịnị fịyaị akị ị́ pịrịmịnị.’ Kẹnị yei fịịdẹ ere bịsẹ ama gate bọọ fẹnịama bẹnịmọtimi Elijah pịrị ẹrịmị. Elijah beni cup akị anị bara bọọ biimị. Amịnị beni tụa ụ pịrị yọ a múmịnị ifiemị, Elijah gbaa a pịrịmị: ‘Sisei breadị dọlọ kpọ kọn tụabo.’ Yei fịịdẹ erema ụ parụmị: ‘Ịmịnị akị ị́ pịrịmụ breadị nanagha. Ịmịnị akị fịyaị mịẹ ị mọ, ine tọbọụ mọ pịrịmụ dọlọ flour mọ pulo mọ kị nanawẹrịemi.’ Elijah gbaa a pịrịmị: ‘Ị́mịnị breadị mịẹ ị pịrịdaba, iné flour mọ bá pulo mọ faghatimi osuo waị koromịnị bara kị Jehovah mọ gbaamị.’

Anịduonị, yei fịịdẹ erema warị a mú bread mịẹ bụrụ-owei Elijah pịrịmị. Kọkọ Jehovah gbaa bara kị paamị, yei fịịdẹ erema mọ anị tọbọụ mọ fịyaị ẹrị fịịtimi osuo waị koromị. Amịnị akị anị ungubo a tụawẹrị flour mọ bá pulo mọ fagha.

Anịa kẹnị kụrọye paamị. Yei fịịdẹ erema kala owei-tọbọụ dọọntimi fịịmị. Anịduonị, amịnị Elijah baratụa-pịrịye biimị. Elijah erema bara duo tọbọụ mị akị agọnọ-warị bọọ kẹnị warịbolou a tụamị. Ómịnị ụ kọn bed a sụnmọwẹrị tẹẹmị: ‘Jehovah, sisei waị tọbọụ ụndụ kọn ụ pịrị.’ Jehovah tọbọụ tịịnseri-daba, kịmịama mịẹ tamamaa mịnị tuumị ị́ mọ nimimị? Bịsẹ ifiemị kẹnị ụbọ kpọ naa waị fịịyọ duo seriibogha timi mị. Bei yei fịịdẹ erema mọ anị tọbọụ mọ Israel kpọ duo paagha.

Tọbọụ mị waị ụndụ nanawẹrị embasaramị! Elijah gbaa yei fịịdẹ erema pịrịmị: ‘Dii! Iné tọbọụmị waị seriibodẹ.’ Erema bolouịmbẹlẹ gbaa Elijah pịrịmị: ‘Ị́mịnị kọkọ Ọkpọnanaowei kịmị. Ị́mịnị Ọkpọnanaowei gbaa ị́ pịrịmịnị yebo bẹtịbị kị gbaamịnị kị duonị, ị́mịnị Ọkpọnanaowei kịmị bara ịmịnị mọ biberinmị.’