Jehovah Kẹnị Bolousei Queen Ụyamọmị

Pẹrẹ Ahab Jezreel bọọ wó window duo Naboth ogbobị ẹrịtimi mị. Ahab bịsẹ ogbo kọn dọụtimi duonị, ómịnị Naboth bara duo ogbo fẹị akị dọụmị. Anịa Jehovah olokomị dịẹ akị ị́ pịrịwẹrịemi ogbo yẹrị kụmọ kị gbaawẹrịemi duonị, Naboth ogbo yẹrị Ahab pịrị bụọgha. Naboth kịrịịye kị mịẹmị. Anịa Ahab ụ didụbamọ ma o? Ahab ụ didụbamọgha. Ahab boloukọn kụrọmọ duonị, ómịnị wó warịbolou kpọ duo paabogha bá fịyaị kpọ fịgha.

Queen Jezebel kị Ahab taa. Amịnị gbaa ụ pịrịmị: ‘Ị́mịnị kị Israel pẹrẹ. Anịduonị, ị́mịnị iné dọụdẹ yesẹ nana a paaemi. Ịmịnị bịsẹ ogbo kọn ị́ pịrịmịnị.’ Anịduonị amịnị, Naboth Ọkpọnanaowei weridẹ bara akị wó tịbị gbaịnmọdá ụ gbein-baa bara akị letter-ama gẹẹ okosu-otubo yarịmị. Ama bọọ emi okosu-otubo Jezebel gbaa bara kị mịẹmị. Anịduonị Jezebel gbaa Ahab pịrịmị: ‘Naboth fịịdẹ. Anịduonị, ogbo mị ị́ laadẹ.’

Jezebel, Naboth bẹtịbị baagha. Amịnị Jehovah tarịwẹrịemi otubo a biin yaị kị baamị. Jezebel oru-ama kị karịmị, bá zịnị seiyeama kpọ mịẹmị. Jehovah, Jezebel mịẹ sei yebosẹ ẹrịmị. Jehovah te ka kị Jezebel mịẹ mịnị a o?

Ahab fịị ifiemị, wó tọbọụ Jehoram kị pẹrẹ a sụọmị. Jehovah Jehu tịịnmịnị owei kị fịrịmọ mú Jezebel mọ anị warịotubo mọ ụyamọmị.

Jezebel, Jezreel ama ka timimị. Jehu wó ogbo-arụ yọụ mú Jezebel timi ama laamị. Jehoram kpọ wó ogbo-arụ yọụ mú Jehu laawẹrị ụ biimị: ‘Ị́mịnị dọọ mọ kị boemi a?’ Jehu ụ parụmị: ‘Ị́ yin Jezebel mọkpọ seiyeama mịẹmịnị ifiesẹ wo maa kịmị laa dọọ nanagha fa.’ Jehoram wó ogbo-arụ waịdá baịntẹị dọụ ifiemị, Jehu apẹpẹ kọn Jehoram tein baamị.

Jehu bá Jezebel warị kpọ a múmị. Jehu bomịnị bara Jezebel mọ naa ifiemị, amịnị anị andẹ paintị, bá anị tịbị mịẹwẹrị anị agọnọ-warị window bọọ timi ụ korumị. Jehu bo yọ laa ifiemị, amịnị labara-labara ka kị ụ mọ mọ́ ẹrẹmị. Jezebel odubo-otubo a mọ mọ́ tịẹtimi mị, Jehu wó okolobị uwoumọ wẹrị gbaa anị odubo-otubo pịrịmị: “Agọnọ duo a gbeinmọ koromọ!” Ámịnị window duo Jezebel gbeinmọ paamọwẹrị Jezebel paakị fịịmị.

Bịsẹ yọ bụọmị, Jehu mọkpọ Ahab 70 owei-awọụbo baawẹrị Baal karịbụọ bị akị ama bọọ kọnsiinmị. Jehovah paamịnị yebosẹ ẹrịwẹrịemi, bá agbẹị ifie laadaba sei-yaị mịẹ otubo gbẹẹmịnị baramị ị́ mọ ẹrị ma?