Jesus Oi-maamụfịnị (12) Fịrịmọpaa-otubo Sẹlẹmị

Jesus egberigbaatimi kẹnị kụraị mọ ikise mọ timitimi bara laa ifiemị, ómịnị kẹnị kụrọ iroro tọnpẹlẹmị. Ómịnị te otu kị sẹlẹwẹrị ụ mọ mọ́ naịntimi egberigbaa fịrị wẹnịmịnị a o? Te otu kị ómịnị mọ tolumọwẹrị ituma bọlọụ daamịnị a o? Jehovah baratụa ụ pịrịwẹrị mị irorobo tọnpẹlẹ kị Jesus mọ dọụmị. Anịduonị ómịnị bẹtịbị mú kẹnị ogun a tẹẹtimi deinbaịmị. Pekei bị, Jesus wó tuuduo-otubo a zụa bẹnịmọwẹrị wó oi-maamụfịnị fịrịmọpaa-otubo sẹlẹmị. Fịrịmọpaa-otu ẹrẹbo ị́mịnị mọ ukie wẹrịemi a? Bei ánị ẹrẹbo, Peter, Andrew, James, John, Philip, Bartholomew, Thomas, Matthew, Alphaeus tọbọụ James, Thaddaeus, Simon, bá Judas Iscariot.

Jesus egberigbaa mụ bara akị Oi-maamụfịnị fịrịmọpaa-otubo tolumọsin ifie mị, ómịnị á fịrịmọ egberigbaa yọ a múmị. Ámịnị bá Jesus mọ kpọ yọụpaamịnị. Jehovah seitẹmẹ-ama duo paamọ mụ kụrọ mọ bá dọọnmịnị otu zụọ ebimọ mụ kụrọ akị á pịrịmị.

Jesus eti akị Oi-maamụfịnị fịrịmọpaa-otubo a tụamị, bá wó ikieotu akị á tịịnmị. Fịrịmọpaa-otubo fun nimigha bá ye a paagha bara kị Pharisee-otubo mọ kọn á diimọ wẹrịmị. Anịa Jesus egberigbaa fịrịwẹnịmụ bara akị á tolumọmị. Jesus ụndụ bọọ yelaadẹịn yebo paa ifie kpọ ámịnị ụ mọ mọ́ timi mịnị, gbaamaba wó fịịmụ ifie mọ, bá wó waị fịị duoserimụ ifie kpọ. Oi-maamụfịnị fịrịmọpaa-otubo kpọ biindẹịn yaị Galilee kị duo paaemi, Jesus kpọ Galilee kị duo paaemi. Fịrịmọpaa-otubo zụa ere-nana wẹrịmị.

Fịrịmọpaa-otubo kpọ yalịyalịgha duonị, ámịnị kpọ mịẹkiri timi mị. Zụa ifieama ámịnị ye iroro-pẹlẹghatimi ẹrẹtimi mị. Anịduonị zụa kịrịịgha yeama tọn angọ pịrịmị. Ámịnị zụa ifieama etipougha. Ánị ovuru bọọ yelaadẹịn emi ụbọ kpọ ámịnị mọ akị dụnịịtimi mị. Mọabịkpọ, ámịnị ebi kịmịama bá Jehovah kpọ tarị wẹrịmị. Jesus agọnọ a mú daba ámịnị kị ituma bọlọụ daa-mịnị.