Jesus Ogun-agọnọ Bọọ Kịmịotu Tolumọmị

Jesus oi-maamụfịnị fịrịmọpaa-otubo sẹlẹsin ifiemị, ómịnị ogun bọọ biin kịmịama bẹnịịtimi yọ a múmị. Ámịnị Galilee, Judea, Tyre, Sidon, Syria, bá Jordan bọọ zịnị yọama kpọ duo bomị. Ámịnị dọọnmịnị otuama mọ bá seitẹmẹ-ama pịrị ụyamọtimi otuama mọ kọn Jesus pịrị zụọ yọ a bomị. Jesus ásẹẹ zụọmị. Ómịnị ogun-aka bọọ tịtẹwẹrị á tolumọmị. Jesus, omịnị mịẹdẹ kị Ọkpọnanaowei ikie-ụbọ a paamụ bara gbaamị. Omịnị Jehovah tarị agbẹị-emi bá Jehovah pịrị tolumọ agbẹị-emi bara kpọ gbaamị. Anịa, omịnị zịnịotu tarịghasẹ, Ọkpọnanaowei kpọ tarị a paagha bara kpọ ómịnị mọ gbaamị. Omịnị ebimịẹ bá tarịnana bara ka kị kịmịsẹ mọ inyenrin bara kpọ gbaamị. Bá wo egirẹn-otubo kpọ tarị bara kpọ ómịnị mọ gbaamị.

Jesus gbaa á pịrịmị: ‘Ámịnị ánị ikie-otubo bẹtịbị tarịgha fa. Ámịnị ánị egiren-otubo kpọ tarị agbẹị-emi bá adụdụ duo kịmịotu bụọmọ. Kịmị boloukọn ị́ pịrịmịnịaba ifie famọgha bara mú ụbọ laadá, ụbọ tẹẹ. Kịmị akị ị́ mịẹdaba, ị́ dịsẹmụ ye ka kị zịnịotu mịẹ.’

Ámịnị akị nana yeama diimọ agbẹị-emi bara kpọ Jesus mọ akị á tolumọmị. Ómịnị gbaa á pịrịmị: ‘Jehovah ikie-ụbọ a paamụ yọmị, ebi akị biin sịlịama nanamụ yọ dẹịn-emi. Furu-kịmị bo iné sịlịbo furu a paaemi, anịa kẹnị-ụbọ kpọ laa ị́ mọ Jehovah mọ ikie furu a paagha. Anịduonị, iné tụamụ bịdẹ, fịmụ fịyaị, anịghakpọ boumụ ye akị angọ a bụụdọọn kụmọ. Ofoni bo dii. Ọkpọnanaowei ifiebosẹ ánị fịmụ fịyaị mịẹpaamọ á pịrịmịnị. Kpekekpeke inyenrinbụọ mị, kẹnị erein kpọ akị ánị ụndụ bọọ tụagha fa. Ukie, Jehovah iné dọụ wẹrịemi yebo nimiwẹrịemi.’

Zịnị kịmị naa Jesus gbaa egberibo gbaatimi á pịrị naagha. Karịbụọ tịbị-otubo naa mị yebo akị á tolumọgha wẹrịmị. Tetuu kị duonị, Jesus ebi tolumọ-owei a paa ma o? Tuumị, Jesus akị kịmịbo tolumọyebosẹ Jehovah kị duobomị.