Jesus Á Mọ Kẹrịkaịdẹ

Jesus mọ fịrịmọpaa-otubo mọ Kidron Apọpọrọ duo wẹnị mú Olives Ogun agọnọ laamị. Bịsẹ ifiemị deinbiri, bá agọnọwei anịghakpọ atọnịye agbatụa wẹrịmị. Ámịnị mú Gethsemane fanụ-kiri laa ifiemị, Jesus gbaa á pịrịmị: “Beiyọ bọọ timi dá lee.” Jesus dọlọ wẹnị fanụ-kiri duo sụọwẹrị okoi tẹẹ Jehovah yarịmị. Ómịnị wó ịkịọụ bọọ bụụdọọntimi yebo gbaa Jehovah pịrịmị. Ómịnị gbaamị: “Pebidá iné dọụbara kị paa.” Jehovah angel-owei fịrịmọ ụ kụrọmọmị. Jesus waịmú fịrịmọpaa-otubo laa ifiemị, an’a tara kịmị bụnụ kị bụnụtimi ụ pịrị ẹrịmị. Anịduonị ómịnị gbaamị: ‘Serii! Mị bụnụ mụ ifiegha! Ámịnị ị kẹrịkaịmụ ifie laadẹ.’

Jesus bịsẹbara gbaasinwẹrị alaaghatimi Judas ogbolo-ama mọ bá agbọdọ-ama mọ sibewẹrịemi kịmịama mọ bo yọ laamị. Judas Jesus mọ bá fịrịmọpaa-otubo mọ a tuuduo fanụ-kiri bọọ bodẹ wẹrị duonị, ómịnị bịsẹ yọ bọọ Jesus ẹrịmụ bara nimiwẹrịmị. Judas, Jesus tọnmọ akị soldier-otubo pịrịmụ bara bị gbaa-pẹlẹdẹ wẹrịmị. Anịduonị ómịnị wẹnị mú Jesus laawẹrị gbaamị: ‘Tolumọ-owei doo e,’ bịsẹbara ụ mọ gbaasin mị, ómịnị mọkpọ Jesus tọtọmị. Jesus gbaa ụ pịrịmị: ‘Judas, ị́mịnị tọtọ ka kị ị yẹrị-paamọmịnị a?’

Jesus wẹnị paabo kịmịbo biimị: “Ámịnị te ụbọ kị dọụmịnị a?” Ámịnị ụ parụmị: “Jesus Nazareth-owei kị omịnị mọ dọụmịnị.” Jesus gbaa á pịrịmị: “Ịmịnị kị bịsẹ owei mị.” Ómịnị bịsẹbara gbaa ifiemị, kịmịbo tountiti kiri bọọ koromị. Jesus mọkpọ á biimị: “Ámịnị te ụbọ kị dọụmịnị a?” Ámịnị waị Jesus parụmị: “Jesus Nazareth-owei kị omịnị mọ dọụmịnị.” Jesus waị á parụmị: ‘Ịmịnị kị bịsẹ owei bara ị mọ gbaa á pịrịdẹ. Ine kịmịbo bụọmọ mú.’

Peter yọ bọọ paamịnị yebo ẹrị ifiemị, ómịnị agbọdọ paamọ-bowẹrị, agbọdọ bị akị odubo-gban tịbị ịkịankụn-owei pịrịtimi owei beri pẹlẹmị. Malchus kị bịsẹ owei ẹrẹmị. Anịa Jesus Malchus beri gbelewẹrị wó beri zụọmị. Jesus gbaa Peter pịrịmị: ‘Iné agbọdọ koromọ. Ị́mịnị agbọdọ akị sụụdaba, ị́mịnị agbọdọ fịị kị fịịmịnị.’ Soldier-otubo Jesus kẹrị bá wó barabo fịna ifiemị, fịrịmọpaa-otubo baịnfaamị. Ámịnị Jesus kọn mú ịkịankụn-owei Annas kị pịrịmị. Annas biibịbịama akị Jesus biimị bá ụ kọn mú Tịbị Ịkịankun-owei Caiaphas pịrịmị. Anịa teeki fịrịmọpaa-otubo paamọ ma o?