Peter Jesus Piimị

Jesus agọnọwarị bọọ kẹnị warịbolou a wó fịrịmọpaa-otubo mọ timi ifiemị, ómịnị gbaa á pịrịmị: ‘Mị dein mị, ánị kịmịsẹ ị gbeinmọ koromọ mịnị.’ Anịa, Peter gbaa ụ pịrịmị: ‘Ịmịnị ị́ gbeinmọ koromọgha fa! Kịmịsẹ ị́ gbeinmọ koromọ kpọ ịmịnị ị́ gbeinmọ koromọgha fa.’ Jesus gbaa Peter pịrịmị: ‘Ị́mịnị tara ifie a ị piidẹ kị, ofoni fiemịnị.’

Soldier-otubo Jesus kọn mú Caiaphas warị laa ifiemị, biin fịrịmọpaa-otuama baịnfaamị. Anịa maa kịmị Jesus kẹrịakị kịmịbo a tuuduomị. Peter kpọ kẹnị ụbọ. Ómịnị Caiaphas warị tiri-anga bọọ kẹrịịtimi fẹnị-ama akị wó angọ mịẹ zuzutimi ifiemị, kẹnị odubo-gban araụ wó ẹrịwẹrị gbaa ụ pịrịmị: ‘Ịmịnị ị́ nimi wẹrịemi! Ị́mịnị kpọ Jesus mọ timi mị!’

Peter gbaa a pịrịmị: ‘Bịsẹ baragha, ịmịnị ụ mọ mọ́ fa! Ịmịnị iné gbaamịnị ye a sụọtuunimigha!’ Peter bịsẹbara gbaasindẹ ifiemị, ómịnị wẹnị gate anga bọọ múmị. Alaaghatimi, zịnị odubo-gban araụ wó ẹrịwẹrị gbaa yọ bọọ bẹnịịtimi otubo pịrịmị: ‘Bei kịmị bị Jesus mọ timi mị!’ Peter gbaamị: ‘Ịmịnị Jesus nimi kpọ nimigha!’ Kẹnị owei kpọ gbaamị: ‘Ị́mịnị kpọ ụ mọ mọ́ timi mị! Iné ẹrẹmịnị bara mị, ị́mịnị kpọ Galilee, Jesus duobo yọ kị duobo emi bara mị gaan k’emi.’ Peter kpoo-kpoo gbaa á pịrịmị: ‘Ịmịnị ụ nimigha!’

Bịsẹ tịẹkirimị ofoni fiemị. Jesus waị ụ diimịnị bara Peter mọ ẹrị ifiemị, ómịnị Jesus gbaawẹrị yemị ukiemị. Anịduonị, ómịnị tiri-anga bọọ múwẹrị youmị.

Sanhedrin-otubo Caiaphas warị bọọ Jesus kẹrị ụgụlasụọmị. Bịsẹ ifiemị, ámịnị Jesus baamụ bara gbaapẹlẹdẹ wẹrịmị, ámịnị bịsẹ tịẹkiri bị akị ụ gbaịnmọwẹrị ụ baamụ ye kị dọụtimi mị. Anịa ámịnị akị ụ gbaịnmọ mụ ye ẹrịgha. Kunumọ bị Caiaphas Jesus biimị: ‘Ị́mịnị kị Ọkpọnanaowei Tọbọụ bị a?’ Jesus ụ parụmị: ‘Ịmịnị kị Ọkpọnanaowei Tọbọụ bị.’ Caiaphas gbaamị: ‘Omịnị zịnị tuu ba dọụgha. Ómịnị Ọkpọnanaowei weridẹ!’ Ụgụlasụọtimi otubo gbaamị: ‘Bei owei bị baamọ kị agbẹị-emi.’ Ámịnị Jesus andẹ anịghakpọ koro polomị, fịla akị ụ gbein, wó tọrụbo gbaansin bá ụ famụ, bá gbaa ụ pịrịmị: ‘Ị́mịnị kọkọ bụrụ-owei aba ị́ famụ ụbọ gbaa wo pịrị!’

Erein baị ifiemị, ámịnị Jesus akị Sanhedrin bọọ múwẹrị mọkpọ ụ biimị: ‘Ị́mịnị kị Ọkpọnanaowei Tọbọụ bị a?’ Jesus á parụmị: ‘Ị́mịnị kị bịsẹbara gbaamịnị.’ Bịsẹbara paadẹ ifiemị, Jesus Ọkpọnanaowei weridẹ bara ámịnị mọ akị ụ gbaịnmọwẹrị, ụ kọn Rome ibe daa-owei Pontius Pilate yarịmị. Teeki mọkpọ paa ma o? Wo mú barịị yọ bọọ dọụ ẹrị.