Jesus Golgotha A Fịịmị

Tịbị ịkịankụn-owei mị Jesus kọn mú Pilate warị laa ifie mị, Pilate á biimị: ‘Bei kịmị bị te yeama kị mịẹ bara kị, á mọ gbaa ma o?’ Ámịnị gbaamị: ‘Ómịnị pẹrẹ ka kị angọ tịịnmịnị!’ Pilate Jesus biimị: “Ị́mịnị kị Jew-otu Pẹrẹ mị a?” Jesus ụ parụmị: “Ine Daabụọ bị, bei akpọ mọ sụọsụọ-yọ fa.”

Bịsẹbara paadẹ ifiemị, Pilate kịmịotu fịrịmọ Jesus akị Galilee ibe daa-owei Herod yarịmị. Herod kpọ biibịbịama akị Jesus biidá, kọkọ Jesus baa agbẹị-emi anịghakpọ baa agbẹịgha bara dọụ ẹrịmụyọ kị duonị, Pilate Jesus akị Herod yarịmị. Herod, Jesus ye-mịẹkiri bara ẹrịgha. Anịduonị, ómịnị waị Jesus fịrịmọ Pilate yarịmị. Pilate gbaa kịmịbo pịrịmị: ‘Ị mọ Herod mọ bei kịmị mịẹ seiye ẹrịgha. Anịduonị, ịmịnị ụ baagha fa.’ Kịmịbo gịamị: ‘Ụ baa! Ụ baa!’ Soldier-otubo Jesus famụ, fịla akị ụ gbein bá ụ titimị. Ámịnị ịgbalị-ama akị tuun mịẹmị, bá tuun kọn wó tịbị teriwẹrị ụ yẹkwẹmị: ‘Jew-otu Pẹrẹ, doo e.’ Pilate waị mọkpọ gbaa á pịrịmị: ‘Mị kịmị mịẹ sei ịmịnị mọ ẹrịgha.’ Ámịnị mọkpọ ánị okolobo uwoumọ-wẹrị gbaamị: “Ụ Kọn tịn bọọ kaị baa!” Anịduonị Pilate, Jesus akị kịmịbo pịrịwẹrị, ámịnị ụ kọn baa yọ amúmị.

Ámịnị Jesus akị Golgotha tịnmịnị yọ a múwẹrị, ụ kọn tịn a kaị bá tịn serimọ tịẹmọmị. Jesus tẹẹmị: ‘Ị Daụ á bụọmọ, ámịnị ánị mịẹmịnị ye a tuunimigha.’ Kịmịotu Jesus yẹkwẹmị bá gbaamị: ‘Ị́mịnị kọkọ Ọkpọnanaowei Tọbọụ aba tịn duo korobo! Iné angọ zụọ.’

Ámịnị seiyeama mịẹtimi otuama akị ụ mọ mọ́ bịsẹ yọ bọọ kaịwẹrịmị. Bịsẹ otubo a kẹnị ụbọ gbaamị: “Ị́mịnị mú iné Daabụọ laadaba sisei ine ukie.” Jesus gbaa ụ pịrịmị: “Ị́mịnị ị mọ mọ́ Paradise a timi mịnị.” Erein birimị, amasẹ dụkọọtimi tara hour laamị. Tuuduo-otubo zụa ụ kaịwẹrị tịn mọ naịn tịẹtimi mị. Jesus yin Mary kpọ tịẹtimi mị. John, Mary akị wó yin bara kekere bara Jesus mọ gbaa ụ pịrịmị.

Kunumọ mị, Jesus gbaamị: “Paabeindẹ!” Ómịnị wó tịbị bị oboimọwẹrị wó kunumọ emba-saramị. Bịsẹ tịẹkiri mị kẹnị kụrọ kirizigei paamị. Karịwarị bọọ Yalịyalị yọ mọ bá Yalịyalị Dẹịn yọ ovuru bọọ timi curtain bị kaịn maa yọ dịẹịmị. Kẹnị soldier-owei gbaamị: ‘Bei kọkọ Ọkpọnanaowei Tọbọụ.’