Ọkpọnanaowei Wó Yalịyalị Tẹmẹmị Akị Cornelius Pịrịmị

Kẹnị Rome army opu-owei Caesarea a timi mị. Wó ẹrẹmị Cornelius. Ómịnị Jew oweigha, mọabịkpọ, Jew-otubo ụ didụbamọ wẹrịmị. Ómịnị baratụa ụya otubo mọ bá baratụa-pịrịye dọụtimi otubo mọ pịrịtimi mị. Cornelius peibolou akị Jehovah a tụamị, bá ifiebosẹ tẹẹ Jehovah yarịtimi mị. Kẹnị erein angel-owei Cornelius paamọwẹrị gbaa ụ pịrịmị: ‘Ọkpọnanaowei iné tẹẹbịbịbo naadẹ. Peter Joppa emi, kịmịotu fịrịmọ Joppa amú Peter tịịn ị́ yarị.’ Bịsẹ tịẹkiri mị, Cornelius tara owei-ama fịrịmọ Joppa a múmị. Tamụ anga duo kịẹn daba, 50 kilometers bara yọụdẹ kị mú Joppa laatimi mị.

Bịsẹ kpekẹnị ifiemị, Peter Joppa bọọ bụnụgha-dawaị ẹrịmị. Ómịnị Jew-otu fịmọ agbẹịgha nama-ama ẹrịmị. Ómịnị ba kẹnị okolo kpọ naamị, okolo mị ómịnị bịsẹ namabo fị bara gbaa ụ pịrịmị. Anịa Peter gbaamị: ‘Ịmịnị paasẹ naa yalịyalịgha nama-ama fịgha.’ Bịsẹ okolo bị gbaa ụ pịrịmị: ‘Mị namabo yalịyalịgha bara gbaa kụmọ. Ọkpọnanaowei a mịẹ yalịyalịdẹ.’ Okolo mị mọkpọ gbaa Peter pịrịmị: ‘Tara owei-ama iné warị-ogige bọọ tịẹ-emi. Ánị tuuduo mú.’ Peter ogige bọọ múwẹrị, kịmịbo wó warịma bo tuumị akị á biimị. Ámịnị ụ parụmị: ‘Cornelius kị wo fịrịmọ bomị, ómịnị Rome army opu-owei. Ị́mịnị wo a tuuduo Caesarea a bo bara kị, ómịnị mọ gbaamị.’ Peter bịsẹ otubo akị wó warị bọọ tụawẹrị barịị baị laamị. Barịị ereinmị, Peter bịsẹ otubo mọ Caesarea a múmị. Joppa bọọ timi bịnaotubo kpọ, zụa ụ mọ mọ́ múmị.

Cornelius, Peter ẹrị ifiemị, ómịnị okoimị. Peter gbaa ụ pịrịmị: ‘Seriitịẹ! Ịmịnị kpọ iné tọrụtọrụ kịmị. Jew ibe duo paagha otuama Jew-otu warị duosụọgha kị gbaa kpọ, Ọkpọnanaowei ị fịrịmọ iné warị bọọ bomị. Sisei, ‘ị́mịnị ị tịịn iné warịma bo tuu gbaa ị pịrị.’

Cornelius gbaa Peter pịrịmị: ‘Nia dein bụọdẹ ifiemị, ịmịnị tẹẹ Ọkpọnanaowei yarịmị. Ịmịnị tẹẹtimi ifiebị, kẹnị angel-owei, ịmịnị ị́ tịịn ine warịma bo bara gbaamị. Sisei Jehovah egberibo kọn wo tolumọ.’ Peter gbaa ụ pịrịmị: ‘Ọkpọnanaowei kẹnị-anga kpọ a sụọgha bara ị mọ nimidẹ. Ụ karị dọụmịnị ụbọsẹ, ómịnị mọ kẹrị-akịmịnị.’ Peter, Jesus gbelemọ yọbị biin yeama akị á tolumọmị. Bịsẹbara paadẹ mị, Ọkpọnanaowei wó yalịyalị tẹmẹ mị akị Cornelius mọ ụ mọ mọ́ timi otubo mọ pịrịwẹrị, ásẹẹ paakị benibilemị.