Ebi Egberimị Biin Ibe-ama Laamị

Ebiegberi gbaa mú akpọyọrẹịsẹ laa bara Jesus mọ gbaamị. Anịduonị, fịrịmọpaa-otubo Jesus gbaa bara mịẹmị. Kụraị 47 C.E. mị, Antioch bọọ timi bịnaotubo Paul mọ Barnabas mọ fịrịmọ egberigbaa yọ amúmị. Paul mọ Barnabas mọ yọụ mú Asia Minor bọọ Derbe, Lystra, bá Iconium a egberigbaamị.

Paul mọ Barnabas mọ egberigbaa kịmịsẹ kị pịrịmị. Ámịnị egberigbaa ụya-otu, pẹrẹ-otu, okosu-otu bá kala-awọụbo kpọ pịrịmị. Biin kịmịama kị ámịnị Christ gbelemọ yọ bọọ tolumọyebo kẹrị-akịmị. Paul mọ Barnabas mọ egberigbaa Cyprus ibe daa-owei, Sergius Paulus pịrịtimi ifiemị, kẹnị Satan bụrụ-owei á tịẹmọ dọụmị. Paul gbaa ụ pịrịmị: ‘Jehovah boloukọn ị́ pịrịmịnị.’ Bịsẹ tịẹkiri bị, bịsẹ bụrụ-owei tọrụbo baanmị. Governor Paulus paayemị ẹrị ifiemị, ómịnị gesii kẹrị-akịmị.

Paul mọ Barnabas mọ yọmọsẹ kọọ egberigbaamị. Warị duo mú warị laa, fọụ-ama, ụwọụbiri, bá karịwarịbosẹ ka egberigbaamị. Ámịnị Lystra bọọ kẹnị okile-owei zụọ ifiemị, yọma timi otubo Paul mọ Barnabas mọ karị dọụmị. Paul mọ Barnabas mọ oru-ama kị ámịnị mọ tọnmị. Anịa Paul mọ Barnabas mọ á bụọmọ á karịgha, bá gbaa á pịrịmị: ‘Ọkpọnanaowei bẹtịbị kị karị! Omịnị kpọ ánị tọrụtọrụ kịmịama.’ Bịsẹ yọ bụọdẹ ifiemị, kẹnị Jew-otuama bo Paul mọ Barnabas mọ karị dọụtimi otubo tụamọwẹrị ámịnị paakị birisei Paul pịrịmị. Kịmịbo okuta-ama akị ụ gbein, bá ụ kọn ama duoserimị. Ómịnị bịsẹ yọ bọọ timi fịịmụ bara kị ámịnị mọ tọnmị. Anịa Paul naa fịịghatimi bịnaotubo kịalị mú Paul kọn waị ama bọọ bomị. Timi kẹnị ifie laamị, Paul waị Antioch amúmị.

Kụraị 49 C.E. mị, Paul mọkpọ waị yọụpaa egberigbaa yọ amúmị. Ómịnị waị Asia Minor bọọ mú bịnaotubo diisin ifiemị, ómịnị Europe kpọ amú egberigbaamị. Ómịnị bá Athens, Ephesus, Philippi, Thessalonica, bá zịnị yọ-ama kpọ amú egberigbaamị. Silas, Luke, bá Timothy tịịnmịnị asịyaịpesi kpọ Paul mọ yọụpaamị. Ámịnị gbelei itu mịẹpaamọ bá bịnaotubo kụrọmọmị. Paul Corinth a timi kụraị mọ ikise mọ baịmị. Ómịnị bịsẹ ifiebị akị bịnaotubo kụrọmọmị. Ómịnị egberigbaa, kịmịotu tolumọ, bá letter-ama gẹẹ biin itu-ama yarịmị. Ómịnị tapauline-warị mịẹ fịrị kpọ wẹnịmị. Timi kẹnị ifie laamị, Paul waị Antioch a múmị.

Kụraị 52 C.E. mị, Paul waị tarụ-karamọ ifiema yọụpaa egberigbaa yọ amúmị. Ómịnị bọlọụ Asia Minor ka múmị. Ómịnị Philippi kpọ a múmị bá Corinth kpọ a múmị. Paul biin kụraịama ka kị Ephesus a timi mị. Ómịnị bịsẹ yọma kịmịotu tolumọ, kịmịotu zụọ, bá baratụa itu kpọ pịrịmị. Ómịnị ereinbosẹ kẹnị sukulu hall a amabẹnịmọ ẹrẹ-egberiama ẹrẹtimi mị. Biin kịmịama wó gbaatimi yebo peiwẹrị boloudeimị. Paul biin ibe-ama amú ebiegberi gbaasindẹ ifiemị, ómịnị paakị Jerusalem amúmị.