Ikoli-warị Lee-oweimị Gesii Kẹrị-akịmị

Kẹnị kala ịyọrọ-tọbọụ Philippi bọọ odubogbaa timi mị. Amịnị seitẹmẹ pịrị ụyamọtimi mị. Seitẹmẹ mị, a mịẹ bọlọụ a paamọye-ama nimiwẹrị gbaatimi mị. Amịnị bịsẹ yọ duo biin sịlịama mịẹ akị anị odubogbaa pịrịtimi otubo pịrịmị. Paul mọ Silas mọ Philippi laa ifiemị, bịsẹ tọbọụ mị biin erein-ama akị ánị tuuduomị. Seitẹmẹ mị a mịẹwẹrị amịnị kụrọ okolo akị gbaamị: “Mị kịmịbo odubogbaa akị Seriidẹịn Ọkpọnanaowei kị pịrịmịnị.” Kunumọmị, Paul gbaa seitẹmẹ pịrịmị: ‘Ịmịnị Jesus ẹrẹ ka gbaa ị́ pịrịmịnị, tọbọụ angọ duo paabo!’ Seitẹmẹ mị tọbọụ angọ duoseriimị.

Bịsẹ tọbọụma odubogbaa pịrịtimi otubo, tọbọụma bá sịlị mịẹ á pịrịgha fa bara nimi duonị, ámịnị boloukọnmị. Anịduonị, ámịnị Paul mọ Silas mọ kọn ụgụlawarị amúwẹrị gbaa ụgụlapẹlẹ-owei pịrịmị: ‘Bei kịmịbo oloko seimọwẹrị akpotuama mịẹ paamọmịnị!’ Anịduonị ụgụlapẹlẹ-owei mị kịmịotu fịrịmọ Paul mọ Silas mọ famụwẹrị á kọn ikoliwarị a kaịmị. Ikoliwarị lee-owei mị, á kọn ikoliwarị bọọ seidẹịn bá dụkọọdẹịn yọma tụawẹrị ánị barabo mọ bụọbo mọ kaịmị.

Paul mọ Silas mọ ikoliwarịma duma tuun Jehovah tokonimị. Ikoliwarị bọọ timi otubo ánị tuuntimi dumabo peimị. Deinbiri bị, kụrọ kiri-zigei paamị. Anịduonị ikoliwarị ogigebo finiimị. Bá akị ikoliwarị bọọ timi otubo kaịwẹrị agọrọrọbo (chains) kpọ finiimị. Ikoliwarị lee-owei mị, baịn ikoliwarị duosụọ ifiemị, ómịnị ikoliwarị finii-emi bara ẹrịmị. Ikoliwarị bọọ timi otubosẹ, baịn fadẹ bara kị ómịnị mọ tọn duonị, ómịnị agbọdọ paamọwẹrị wó angọ baa dọụmị.

Bịsẹ bara paadẹ ifiemị, Paul wó okolo mị uwoumọ wẹrị gbaa ụ pịrịmị: ‘Iné angọ baa kụmọ! Wo kịmịsẹ beiyọ emi!’ Ikoliwarị lee-owei bị baịn ikoliwarị duosụọwẹrị Paul mọ Silas mọ tọrụyọma okoimị. Ómịnị á biimị: “Ịmịnị teeki mịẹwẹrị zụọbụọmọye nana a paaemi a o?” Ámịnị gbaa ụ pịrịmị: ‘Ị́ mọ iné warị-otubo mọ peibolou akị Jehovah a tụa.’ Anịduonị, Paul mọ Silas mọ Ọkpọnanaowei egberimị akị á tolumọwẹrị ikoliwarị lee-owei mọ wó warị-otubo mọ paakị benibilemị.