Paul Mọ Timothy Mọ

Timothy Lystra itu kọọ timi asịyaịpesi. Timothy daụ mị Greek-owei, wó yin bá Jew-ere. Wó yin Eunice mọ bá wó opu-yin Lois mọ kị, wó zaụtimi ifiema Jehovah emibara kọn ụ tolumọmị.

Paul maamụkaramọ ifiema yọụpaa egberigbaa yọ amú ifiemị, ómịnị Lystra laamị. Paul Bịsẹ ifie ka Timothy bịnaotubo tarịwẹrịemi bá baratụa bịnaotubo pịrị dọụtimi bara nimi mị. Anịduonị, Timothy ụ mọ mọ́ yọụpaa mú egberigbaa bara Paul mọ gbaa Timothy pịrịmị. Paul egberigbaamụ bara akị Timothy tolumọ duonị, Timothy laa ebibara ebiegberi gbaa bá akị kịmịotu tolumọmị.

Yalịyalị tẹmẹ kị baratụa Paul mọ Timothy mọ pịrịwẹrị egberigbaa fịrị wẹnịmị. Kẹnị dein, Paul bụnụgha-dawaị ẹrịmị. Bịsẹ bụnụgha-dawaị bị, kẹnị owei Paul, Macedonia abo baratụa á pịrị bara gbaamị. Anịduonị, Paul, Timothy, Silas, bá Luke mọ bịsẹ yọ bọọ mú egberigbaamị, bá itu-ama kpọ mịẹpaamọmị.

Thessalonica ama bị Macedonia ibe ka timi mị. Biin ereama mọ owei-ama mọ kị Thessalonica bọọ gesii kẹrị-akịmị. Zụa Jew-otuama Paul mọ bá ụ mọ mọ́ egberigbaatimi otubo mọ a fịọnkẹrịmị anịghakpọ tọrụdọọnmị. Anịduonị, ámịnị zụa kịmịama bẹnịmọwẹrị Paul mọ bá bịnaotubo mọ akị ama daatimi otubo yarịmị. Ámịnị ánị okolobo uwoumọwẹrị gbaamị: ‘Mị kịmịbo Rome daabụọ kị golumịnị!’ Ámịnị akị Paul mọ Timothy mọ gbaịnmọ egberi duonị, ámịnị Paul mọ Timothy mọ baa a paatimi mị. Anịduonị Paul mọ Timothy mọ dein bọọ baịn Beroea amúmị.

Beroea kịmịbo ebiegberi dịsẹ kụrọmọ duonị, ama bọọ timi Greek-otubo mọ Jew-otubo mọ gesii kẹrị-akịmị. Anịa, zụa Jew-otuama Thessalonica duo Beroea abo akpotu mịẹpaamọ dọụmị. Anịduonị, Paul Beroea duoserii Athens amúmị. Timothy mọ Silas mọ Beroea a timi bịnaotubo kụrọmọmị. Timi kẹnị ifie laamị, Paul waị Timothy fịrịmọ Thessalonica amú bịnaotubo kụrọmọwẹrị penimọyebo inemị. Bịsẹ ifie bụọmị, Paul mọkpọ Timothy fịrịmọ mú biin itu-ama kụrọmọmị.

Paul gbaa Timothy pịrịmị: ‘Jehovah karị dọụmịnị ụbọsẹ á pịrị ụyamọ mịnị.’ Timothy nanawẹrị peibolou duonị, kịmịotu Timothy penimọ bá ụ kẹrịkaịmị. Mọabịkpọ, Timothy benebene Jehovah a barasingha, bịsẹ yọmị ụ mịẹ pọwẹịmọ mị.

Paul gbaa Philippi-otubo pịrịmị: ‘Ịmịnị Timothy fịrịmọ á yarịmịnị. Ómịnị Ọkpọnanaowei karị agbẹị-emi bara mị akị á tolumọmịnị. Bá egberigbaamụ bara kpọ akị á tolumọmịnị.’ Paul mọ Timothy mọ ebi ikie-otuama bá kẹnịsụọmọ Jehovah karịtimi biin kụraị-ama baịdẹ. Anịduonị, Paul eti akị Timothy a tụamị.