Ámịnị Paul Akị Rome A Múmị

Paul tarụkaramọ ifiema yọụpaa egberigbaa yọ amú ifiemị, ómịnị Jerusalem kị dụụmị. Kịmịotu Jerusalem bọọ ụ kẹrị ikoliwarị a kaịmị. Jesus dein bọọ bụnụgha-dawaị duotolu a gbaa Paul pịrịmị: ‘Ị́mịnị Rome amú egberigbaamịnị.’ Bịsẹ yọ bụọmị, ámịnị Jerusalem duo Paul akị Caesarea amúmị. Ómịnị bịsẹ yọma ikoliwarị a timi maa kụraị baịmị. Governor Festus wó ụgụla-sụọtimi ifiemị, Paul gbaamị: ‘Pebidá Caesar kị Rome bọọ ine ụgụla-sụọ.’ Festus gbaa ụ pịrịmị: “Caesar kị iné ụgụla-sụọ kị ị́ mọ gbaa duonị, ịmịnị ị́ kọn Caesar yarịmịnị.” Ámịnị, Paul akị Rome amúmịnị abadị-arụ a saịmị. Maa bịnaotu kpọ ụ mọ mọ́ múmị. Luke mọ Aristarchus mọ kị ánị ẹrẹbo.

Abadị mị kẹnị kụrọ kimé paamị. Kimé mị paatimi biin dein-ama kị baịmị. Anịduonị, ámịnị fịịsinmụ bara kị tọnmị. Anịa Paul gbaa á pịrịmị: ‘Ine kịmịama, kẹnị angel-owei dawaị-tọrụ a gbaa ị pịrịmị: “Paul, malafakụmọ. Ị́mịnị mú Rome laamịnị, kẹnịye kpọ ị́mịnị mọ bá arụma emi otubo mọ laagha fa.” Anịduonị, malafakụmọ! Omịnị fịịgha fa.’

Kimé paatimi oi-nia dein-fini (14 days) baịmị. Timi kẹnị ifie laamị, ámịnị Malta tụọ (island) mị ẹrịmị. Arụ mị kiri-igbewẹrị pẹị-fasinmị. Anịa arụma leitimi 276 kịmịbosẹ laa fịịghatimi ogbo laamị. Zụa kịmịama oki anịghakpọ okidi mú ogbo laamị, zụa ba arụ-aparabo kị kẹrịwẹrị tẹịn mú ogbo laamị. Malta kịmịbo ebibara á kẹrị-akịmị, bá fẹnịtụa á pịrịwẹrị ámịnị akị angọ mịẹ zuzumị.

Tara agọnọwei bụọmị, soldier-otubo waị zịnị abadị-arụ akị Paul saị Rome amúmị. Paul mú Rome laa ifiemị, bịna-otuama bo ụ laamị. Bịnaotubo ẹrị yọmị, ụ kụrọmọmị. Anịduonị, ómịnị Jehovah kulemị. Ámịnị Paul akị kẹnị warị ka kaịwẹrị mị, bá solidier-owei fịrịmọ ụ leemị. Ómịnị bịsẹ yọ bọọ timi maa kụraị baịmị. Kịmịotu bịsẹ yọma ụ diiyọ a bodẹ ifiesẹ, ómịnị Ọkpọnanaowei Daabụọ egberi gbaa á pịrịtimi mị. Bá Jesus gbelemọ egberibo kpọ akị á tolumọtimi mị. Paul letter-ama gẹẹ akị Asia Minor mọ bá Judea bọọ timi itubo kpọ yarịmị. Jehovah kọkọ Paul duotolu a ebiegberi gbaa biin ibe-ama laamị.