John Bụnụgha-dawaị Bọọ Ẹrị Yebo

Fịrịmọpaa-owei John á mọ kọn Pattmos tụọ (island) bọọ kẹrịkaịwẹrị ifiemị, Jesus 16 bụnụgha-dawaịama duotolu a bọlọụ a paamọyeama akị John dịamị. Mị bụnụgha-dawaịbo Jehovah wó ẹrẹ mịẹ yalịyalịmụ bara mọ, wó Daabụọ kọn bomụ bara mọ, bá agọnọ mị wó dọụyọ mịẹmịnị bara bị kiriogbo kpọ a paamụ bara kpọ mịẹgaanmị.

Kẹnị bụnụgha-dawaị, John, Jehovah wó pẹrẹ-kasị bọọ tịtẹ-emi bara ẹrịmị. Sii-nei-fịnị (24) okosu-otuama pịna bịdẹ-ama tụa bá gold akị mịẹwẹrịemi tuun-ama teriwẹrị ụ yọrọwẹrị bara kpọ ẹrịmị. Agbarada-gburudu pẹrẹ-kasị duo fie paabomị, bá erein kpọ pẹrẹ-kasị duo malụ kụrọmọmị. Bịsẹ 24 okosuotubo tịbị-oboimọ Jehovah pịrịwẹrị ụ karịmị. John zịnị bụnụgha-dawaị a biin kịmịama ẹrịmị. Bịsẹ kịmịbo ibebosẹ, bá bẹẹlịbosẹ kị duo Jehovah karị yọ a bomị. Jesus kị Anịna bị, ómịnị á daamú ụndụ pịrịmịnị beni-emiyọ laamị. John mọkpọ zịnị bụnụgha-dawaị ẹrịmị, ómịnị Jesus agọnọma pẹrẹ asụọwẹrị 24 okosuotubo kpọ ụ mọ mọ́ sụọ daatimi bara ẹrịmị. John mọkpọ zịnị bụnụgha-dawaị ẹrịmị. Bịsẹ bụnụgha-dawaị bị, Jesus mọ Satan mọ bá wó seitẹmẹbo mọ sụụtimi bara John mọ ẹrịmị. Jesus agọnọ duo á duo kiriogboma bomị.

Bịsẹ yọ bụọmị, Anịna mọ 144,000 kịmịbo mọ Mount Zion a tịẹ-emi bara John mọ ẹrịmị. Kẹnị angel kiriogbo bọọ fiin yọrọtimi ụ pịrị ẹrịmị. Bịsẹ angel bị, kịmịsẹ Ọkpọnanaowei esiindá tokoni akị Ọkpọnanaowei pịrị bara gbaamị.

Barịị bụnụgha-dawaị bị, John Armageddon sụụ bị ẹrịmị. Jesus mọ wó army-otubo mọ, Satan mọ wó seitẹmẹbo mọ dẹịnmọmị. Kunumọ bụnụgha-dawaị bị, agọnọ mọ kiriogbo mọ dọọ kị timi bara John mọ ẹrịmị. Satan mọ bá Satan anga bọọ sụọemi otubosẹ kpọ á mọ baasinmị. Agọnọ mọ kiriogbo mọ a timi kịmịbosẹ Jehovah ẹrẹ mịẹ yalịyalị bá ụ bẹtịbị kị karịmị.