Jehovah Fịrịwẹnị Yọ Duo Ị Laadẹ Arerebo

BẸBẸ KARỊBỤỌ AMÚMỊNỊ DAỤ MỌ YIN MỌ KỊ PỊRỊ ZII MỊ

Ị́ daụ mọ yin mọ Switzerland ibe a barasiin wẹrị Canada bọọ timmins tịịnmịnị ama bọọ timi ifie kọọ ị zii mị, anị kụraị 1934. Bo kụraị 1939 laa ifiemị, ị yin koro lewarị funbo goo bá Jehovah otu sụọmọ Kingdom hall a yetolumọyọ amúmị. Ámịnị ị mọ ine sondịa bịnaotubo mọ kọn yetolumọyọ amú timimị. Alaghatimi ámịnị bo Jehovah Iseri-araụ a paamị.

Ị yin bịsẹ bara mịẹtimi ifiemị, ị daụ pịrị dịsẹgha, mọabịkpọ ámịnị fịrị bị akị bọlọụ kị wẹnịmọ timi mị. Canada ibe bị 1940 ovụrụ bọọ Jehovah otu fịrị tịẹmọ ifie kpọ ị yin fịrị mị kọn bọlọụ kị wẹnịmọ timi mị. Ị́ daụ yebị dịsẹgha duonị ifiebosẹ ị yin weritimi mị, anịa ámịnị angọ-iyerimọ, bá ụ didụbamọ mị. Ánị mịẹ bara duonị ị mọ ine bịnaotubo mọ gesii kẹrịakị mị. Bolouịmbẹlẹmọ yọbị, Alaghatimi wo daụ wo ịkịọụ deiwẹrị wo mọ mọ́ ebibara inyenrinmị.

KORO BEINMỌ BEINMỌ-ỤWỌỤPẸLẸ FỊRỊWẸNỊ BARAMỊ

America ibe mị, Theocracy Increase bẹnị mịẹmị, anị kụraị 1950. Ịmịnị akpọyọrẹị bọọ biin bịnaotu paamọdẹ yebo naá bá Gilead School amúdẹ bịnaotubo gbaa egberibo pei siindẹ bị, beinmọ beinmọ ụwọụpẹlẹ fịrịwẹnịmụ bara ịmọ gbinipẹlẹmị! Ịmịnị ifie famọgha bara ụwọụpẹlẹ fịrị wẹnịmụ fun gẹẹ akị Canada Branch Office yarịmị, anịa ámịnị ịmịnị naá benibilegha duonị bịsẹ fomuun mị kọn ị pịrịgha bara gẹẹ bomị. October 1, 1950 bị ịmịnị benibile mị. Kẹnị agọnọwei bụọdẹ mị, ịmịnị ụwọụpẹlẹ fịrịwẹnị kịmị a paamị, ị fịrịmụ Kapuskasing tiinmịnị yọ ka mú mị, bịsẹ yọmị ine inyerinmịnị yọ mọ alaemi.

Kụraị 1951 laa ifiemị, branch office mị French bẹẹlị fiemịnị bịna-ụbọsẹ Quibec ibe amú tịịn fun pịrịmị. Ịmịnị zaụtimi ifiesẹ ka laa beke mọ French mọ fietimi duonị, ịmịnị tịịnpọụn kẹrị akịmị. Bịnaotubo ị fịrịmọ akị Rouyn-ama kọọ múmị. Ịmịnị kẹnị yọkpọ nimigha, kẹnị kịmị kpọ nimigha, ama bọọ emiyọ bẹtibị kị gbaa ị pịrịmị. Ịmịnị bọlọụ Marcel mọ kị gbeleimi. Bịnaowei Marcel bo ine ebi ikie owei kọọ paamị. Bei ine bọlọụ gbaa timi yebị. Ịmịnị nia kụraị kọn Quibec a tịmịdẹ kị, Special pioneer a paamị.

GILEAD SCHOOL A MÚ BÁ TỌNGHA YEAMA WO PAAMỌMI

Ịmịnị Quibec a timi ifie kọọ 26 karamọ Gilead School bọọ mú tịịpọụn ị laamị, South Lansing New York ka mịẹmịnị. Ịmịnị February 12, 1956 ka Gilead School duo paamị, ámịnị ị fịrịmọ mú yọmị Ghana,b anị West Africa k’emi ibe. Ị Kọn Ghana amú mịnị funbo naá karaịgha duonị, ịmịnị “zụa wikiama” kọn waị Canada a timi mị.

Ịmịnị bịsẹ ibe bọọ timi yọpaa funbo korutimi sọnọma agọnọweisẹ kị laamị. Bịnaowei Cripps kị wó warị fịnị ị tụa wẹrịmi. Ịmịnị bịsẹ yọ ka Sheila ánị ịyọrọ tọbọụma mọ gbeleimị. Omịnị zọzọ tarị kụrọmọfa, omịnị bo zọzọ nana dọụtimi ifie kị ine funbo karaịdẹ bara ịmọ naámị (visa bị). Sheila mọ ị mọ mọ́ tọnpẹlẹ wẹrị ị pịrị Ghana amú mị. Anịa omịnị letter kị duo ẹrẹ mụ bara tọnpẹlẹmị, anị kala fịrịgha kị gbaa kpọ, omịnị mịẹmị, bei ye kị tuu ma bo baratụa wo pịrịmị.

Train, Beni arụ, bá agọnọ arụ kọọ lei dẹkị mú Accra, Ghana laamị. Ịmịnị District overseer ka paadẹ, bei fịrị bị baratụa ị pịrịwẹrị yọụ Ghana ibesẹ yọrọị, Ivory Coast kpọ (Tịekịri mị, Côte d’Ivoire kị kọn bei ibe tịịnmịnị) bá Togo ibe kpọ laamị. Iin biin ifieama bẹtịbị kị wẹnịmịnị anịa Branch ị pịrị wẹrịemi motor kị kọn yọụmịnị duonị, fịrị mị kụrọ bara ka kị angọ duosụọmị!

Wiki kunumọ ereinbo ịmịnị kala bẹnịị ka fịrịnana mịnị. Omịnị bẹnịị warị nanagha, anịa ụworaá duonị bịnaotubo ịkịraị lẹị pomoama ka kị warị mịẹwẹrị bẹnịị mịẹmịnị, Bá omịnị fridge kpọ fagha duonị, bẹnịị kị namabo baá wẹrị fịyaị mịẹpaamụ kịmiotubo gbalị timi mị.

Bẹnịbo zụa kịmị dẹrịmọ yeama paamị, gbaamaba. Bịnaowei Herb Jennings,c kẹnị ẹrẹ egberi pịrịtimi ifiebị, kẹnị malu kẹkawẹrị yọ duo pẹlẹị baịndẹ e, malu mị bo platform mọ bá kịmịotu tịtẹ emi yọ mọ laadẹmị ma mịẹmụye nimigha, bịnaowei Herb kpọ ẹrẹegberi tịẹmọdẹ, tebara kị mịẹ mịnị a o, Kụrọnana wẹrịemi bịnaotu kị laa zọzọ naa wẹrị malu bị kẹrị mú kẹkaị agbẹị yọ a kẹkaị mi. Bẹnị bọọ timi kịmịbo kụrọbara ka kị barapele bei bịnaotubo pịrịmị.

Bẹnị ereinbo, ịmịnị The New World Society in Action video kọn zụa ama-ama a mú kịmịotu dịamị. Vidio mị tịẹmọmụyọ fagha duonị, akị maá ogboloama anighakpọ tịịn-ama ka tịẹmọwẹrị dịamị. Ama-otubo yebị dịsẹ kụrọmọmị, tuumị zụa kịmịama benibene naa bei paaye ẹrịgha. Vidio bị dịa timi bo kịmịotu benibile mịnị anga laadẹmị, ama kịmịbo pọwẹị kụrọmọmị. Vidiomị mịẹgaan kịmịotubo pịrị amọ Jehovah Ogbomị, kẹnị kị sụọmọ wẹrị yemịẹmịnị e.

Africa a timi zụa ifie laadẹmị, 1958 kụraịmị Jehovah ogbo bị kẹnị opu bẹnịị akị America ibe New York a mịẹmị, ibebosẹ kị bẹnịmị, ị kpọ laamú paamị. Ịmịnị bịsẹ yọ kị waị Sheila mọ gbeleimị, ịmịnị pọwẹị mị. Ámịnị Quebec ka timi ụwọụpelẹ fịrị wẹnịtimi bẹnị bọọ boemị. Omịnị letter bẹtịbị kị duo zọzọ mó ẹrẹ timimi bo bẹnị ma gbeleidẹ. Ịmịnị ifie famọgha bara ka kị á biimị, ímịnị ị nana mịnị a? ámịnị biberin mị. Ịmịnị yebị mịẹ bịnaowei Knorr nimimọmịd bá Sheila Gilead School amúwẹrị bo ị mọ mọ́ Africa a gbelei fịrịwẹnị a paa emi bara kon ụ bii ifiebị bịnaowei Knorr biberinmị. Sheila kọkọ Ghana ibe a bo ị laamị. Omịnị Accra Ghana ka zọzọ nanamị, anị, kụraị 1959 October 3. Omịnị Jehovah karị but i will chat him up mịnị yọ ka kị bọlọụ daá duonị biin tarịama kị wo laadẹ.

CAMEROON IBE BỌỌ WẸNỊFỊRỊBO

Baratụa Jehovah Ogbo pịrị wẹrị Cameroon ibe ma Branch mịẹpaamọmụyọ duonị, omịnị Cameroon a múmị, anị kụraị 1961. Wẹnị fịrịbo biin emi duonị, ịmịnị benebene ifiesẹ fagha, mọabịkpọ ine tolumọ akị mọ yebo bein. Kụraị 1965 laa ifiemị ị taa ofurodẹ, gesii gbaamaba, ịmịnị kpọ bọ daụ a paamọ iroroye bị bọụbọụgha. Omịnị pọwẹị bara gbaapẹlẹ wẹrị waị Canada amú dọụmịnị ifiemị, kẹnị tọn kpọ tọnghaye wo paamọmị.

Wo owei tọbọụ bị naa zii kpọ ziigha timi fịịmị. Maá-sii oia kụraị bụọdẹ omịnị mọkpọ naá ụ baragha. Paayemị wo gbele kụrọmọ kị gbaa kpọ omịnị gbaapẹlẹ wẹrị mọkpọ fịrị kọn bọlọụ wẹnịmọmị.

Cameroon bịnaotubo politics a sụọgha duonị biin penimọyeama kọọ asụọmị. Cameroon ibe tịbịowei sẹlẹ dọụtimi ifiebị, bịnaotubo sụọ sẹlẹgha duonị ibe bị Jehovah fịrị tịẹmọmị, wo aya kẹrịsiindẹ Branch Office kpọ kẹrịakị, bá sọnran agọnọwei ovuru kị, ámịnị wọ duo paamọ wẹrị bịsẹ ebi Branch Office bị kẹrị akịmị, anị May 13, 1970. Zụa wikiama bụọdẹ mị, ibe government bị zịnị ibe a egberigbaa yọ a bo emi kịmịsẹ ẹrẹ dọụgha bara gbaamị—ị mọ Sheila mọ kpọ—sụọemi. Paabara paabara, omịnị bịnaotubo tarị kụrọmọ wẹrịemi duonị á gbein koromọmụ yọmị kala fịrịgha. Binaotubo tebara kị inyenrin timimịnị a? Ereinbosẹ omịnị beiye kị kẹrị iroro timimị.

Omịnị agọnọwei-ama ka kị France branch office a timi baratụa Cameroon bịnaotubo pịrị timi mị. Bịsẹ ifiemị Nigeria branch offfice kị baratụa Cammeroon pịrịtimi duoni, December agọnọweimị ámịnị wọ kọn Nigeria amúmị, Nigeria bịnaotubo zụzụ bara ka kị wo kẹrị akịmị, omịnị biin kụraị-ama ka kị Nigeria ibe ma fịrị wẹnịmị.

KỤRỌ TỌNPẸLẸYE

Timi kụraị 1973 laabị omịnị kụrọ iroro tọn angọ pịrịmị. Biin kụrọ dọọnama kị ị taa ụyamọ mị. Omịnị New York a timi bẹnịị mịẹmịnị mị, kẹnị ye paamị, ị taa kiri a korodẹ, ámịnị koroemi ifie kị gbaa ị pịrịmị: “ifiebosẹ ịmịnị dọọn kị dọọnmịnị duonị, ịmịnị laa bei fịrị wẹnị bọlọụ amúghafa!” Sheila ị mọ mọ́ Jehovah karị timi 14 kụraịama baịdẹ. Ịmịnị ánị wẹnịmịnị fịrịbo kọn á kụrọmọmi, anịa bei ṭiẹkirimị omịnị ebibara zọzọ naá wẹrị ye tọnpẹlẹ agbẹịdẹ. Omịnị tẹẹ, ebibara ẹrẹtei bá Canada kị á zụọmịnị duonị, omịnị Canada amúmị. Beinmọ beinmọ ụwọụpẹlẹ fịrị bọọ barasiin mịnị yekị kụrọdẹịn ye a paa wo pịrịmị

Omịnị waị mú Canada laa ifiemị, ị mọ mó zọzọ nimiwẹrịemi ikie ụbọ duo fịrị dọụ ẹrịmị. Omịnị warị gbẹẹ, warị tọlọmọ mịnị yeama fẹị, omịnị saá ghọ sụọgha bara ka kị laa bei yebosẹ mịẹmị. Ámịnị waị wo tiinmụ ukiemọye omịnị mọ nana wẹrịemi duonị, omịnị wo ụndụbo akị bọụbọụ bara kị wẹrị mị. Kọkọ wo ukiemọye paabein mị ámịnị waị wo tiinmị.

Ịmịnị Norval, Ontario emi aya Assembly Hall kẹrịmịnị fịrị kọọ angọ paamọmị, timi kẹnị ifie laabị Assembly Hall overseer fịrị fomuun ị laamị. June 1974 Sheila angọ dọlọ kụrọdẹ, anịduonị omịnị kpe Assembly Hall ka mú inyenrinmị. Omịnị waị laa beinmọ beinmọ bara Jehovah fịrị bọọ sụọ yọmị opubara kị ị mịẹ pọwẹịmọ mị!

Sheila angọ bị waị kụrọmịnị yọmị, wo bolouịmbẹlẹmọ kụrọmọmị. Maá kụraị bụọdẹmị omịnị waị itu dii fịrị wẹnị fomuun wo laamị. Wo dii mịnị itubo Canada ibe bọọ Manitoba ete ka emi, ibemị biin ifieama kịrịkịrị kụrọmọfa k’emi. Mọabịkpọ, omịnị bịnaotubomọ bolouịmbẹlẹ bara ka kị gbelei Jehovah karịtimimị. Wo dọụ ẹrịdẹ yemị, timi Jehovah karịmịnị ete kị bolouịmbẹlẹ pịrịmịnị bara fagha, anịa ụ karịmịnị bara kị bolouịmbẹlẹ kọn kịmị pịrị mịnị.

BARA FAGHAMỤ KỤRỌ TOLUMỌYE

Itu dii fịrị wẹnịtimi zụa kụraịama baịdẹ mị, Canada Branch mị wo tịịn akị Bethel fịrịwẹnị yọ amú mị, anị kụraị 1978. Ifiebo bụọmịnị mị, ịmịnị kẹnị yelaa tolumọye nana mị. Ịmịnị French kọn kẹnị, hour mọ ikise mọ ẹrẹegberi akị Special meeting Montreal ama bọọ nanamị. Ịmịnị egberi kerị ẹrẹtimi ifiemị, biin kịmị ine gbaamini egberi ma sụọtuu nimigha. Bẹnịị fadẹ mị kẹnị bịnaowei ị tịịn wẹrị tolumọye akị ị pịrịmị. Gesii gbaamaba, ịmịnị ebibara bei tolumọye bị kẹrịakịgha, iné gbaamịnị yebomọ wó gbaamịnị yebomọ kẹnị a sụọgha, iné tọnbarasẹ ómịnị kulebịbị akị ị pịrịdẹ kị tolumọye pịrị agbẹị-emi. Kọkọ ịmịnị tolumọye bị gbein koromọ wẹrị tọrụtụa akị pịrịmịnị kịmị kị dimịnị.

Zụa erein-ama bụọdẹ mị Branch Committee emi bịnaowei ị mọ mọ́ yebị kẹrị ẹrẹmị. Gaan barami Ịmịnị ebibara akị yebị mịẹgha, ịmịnị ụ tẹẹ bá bịnaowei kpọ tịịn wẹrị inẹ mịẹkiri bara gbaamị. Ómịnị adụdụ duo ị bụọmọmị. Angọ-iyerimọ gbelemọ yọmị ịmịnị bei paaye duo kụrọ tolumọye kị akịdẹ, ịmịnị benebene bei yebị baragha fa. (Prov. 16:18) Bei paaye duonị, ịmịnị biin ifieama ka tẹẹ Jehovah yarịdẹ, zịnị ifie zezemọye akị ị pịrịdaba, Jehovah baratụa ị pịrị wẹrị ebibara kẹrị akịmụ bara ị mọ tọnpẹlẹ mị.

Ịmịnị Canada Bethel a timi kụraị maá-sii baịdẹ, 1985 kụraị duobosẹ ịmịnị Branch Committee kọọ fịrị wẹnịmịnị. Anịa February 2021 mi, ine tarị wẹrị erema fịịmị yebị kụrọ bara ka kị ị gbelemị. Iin ị taa fịyọ kị bụọmọ kpọ, biin dọọn-ama kị ị gbelemị. Mọabịkpọ wẹnị Jehovah pịrịmịnị fịrịbo duonị, ịmịnị dọọn naágha bara ka kị fịrịwẹnị bọlọụ ghọ múmịnị.” (Eccl. 5:20) Ine ụndụmị, ma bọlọụ bara fagha kị gbaa kpọ, ine nanadẹ pọwẹịbo biin akị dọọnbo dẹịn-emi. Ịmịnị Jehovah karịtimi kụraị sọnọma-oi baịdẹ, bá angọ paamọ wẹrị beinmọ beinmọ bara fịrị wẹnị Jehovah pịrịmịnị yọmị, ị mịẹ pọwẹịmịnị. Ine tẹẹmịnị yọsẹ sọụpaamịnị kala-pesibo kpọ Jehovah karịmụ yọ ka kị bọlọụdá. Ine nimi wẹrịemi yesẹ ámịnị kpọ laa bei beinmọ beinmo bara wẹnịmịnị fịrị duo gesii pọwẹị nana a paaemi.